副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

桔餅止咳茶

自兩星期前小小豬病好左之後,雖然都係叫做好番晒,但啲痰同咳都仲未清晒,所以又試下煲新嘢俾小小豬試,估唔到勁WORK哦~其實為清小小豬啲咳同痰,真係好多方法我都有用,我又唔想俾佢食藥,所以唯有煲多啲湯水

自兩星期前小小豬病好左之後,雖然都係叫做好番晒,但啲痰同咳都仲未清晒,所以又試下煲新嘢俾小小豬試,估唔到勁WORK哦~ 其實為清小小豬啲咳同痰,真係好多方法我都有用,我又唔想俾佢食藥,所以唯有煲多啲湯水俾佢飲,希望可以用最簡單同安全健康方法清清佢。 正當我打算再次煲係小小豬身上都WORK WORK地嘅蒜頭水時(按此重溫),朋友仔就介紹左我另一個止咳茶,話依個比較甜甜地易入口啲。 雖然蒜頭水小小豬都唔抗拒,不過有啲甜啲易入口啲嘅,又唔難整都值得一試,剛好屋企又有齊材料,所以就即刻煲嚟試下啦! 桔餅2個(哈哈..因為上次煲桔餅湯用剩兩粒放左入雪櫃,今次大派用場啦)、蜜棗3粒、南北杏約1湯匙、果皮1小片~ 果皮浸軟刮囊,其他材料浸洗備用~ 全部材料放入煲內,然後加入水5碗~ 待煲滾後,然後改用慢火煲大約30分鐘~ 之後用匙羹壓下啲材料,等啲味再出啲,然後再煲10分鐘,大約煮成一碗左右啦~ 咁就飲得啦~ 當然,第一次煲我都一定會試左味先俾小小豬飲。認真講,入口第一啖都真係幾甜(可能我平日唔太"好"甜啦),不過佢嗰一種甜味又唔太濃,唔會有漲住喉嚨嘅感覺。奇妙地過左一分鐘之後,我會覺得喉嚨位幾舒服,條氣好似都順左好多咁哦! 小小豬又點呢?甜甜地佢當然係話好飲啦,轉眼間就飲左大半碗了。飲完之後又真係發覺小小豬啲咳係少左好多,同埋咳嘅時候又冇乜痰聲。最重要係佢瞓著嘅時候全晚都冇咳過,我同佢都可以一覺瞓到大天光啦!(相信好多媽媽係會知道,小朋友唔舒服時,真係連我地大人都冇覺好瞓依個苦況呀) 依個醒目小小豬飲完之後已經同我講:『MaMi....下次我再咳呢...你都煲依個俾我飲就得啦!』哈哈哈....好明顯佢係鐘意飲依個多啲啦! BTW....雖然小小豬鐘意,但其實我都唔係幾想再煲囉,因為一煲就即係小小豬又要唔舒服啦...唉!     **我地嘅FACEBOOK FAGE,唔知大家LIKE左未呢?** 小小豬的成長日誌 大家一齊嚟交流下煮飯仔及去玩嘅親子樂啦