5 JUNE 2016(SUN) 早前朋友仔送左包有機赤靈芝片俾我，我諗左好耐都唔知用嚟煲咩好，最後就請教藥材店嘅店員，佢就教我簡簡單單咁用赤靈芝加羅漢果嚟煲茶，咁就已經係清熱解毒，我當然就即刻返屋企煲啦~ 赤 靈芝屬性平，有助養心安神、補益氣血、止咳平喘、改善食欲不振及消化不良。雖然有用途好廣亦都係好有益，不過就味道帶點甘苦，所以直接焗茶煲水飲就比較難 入口。所以就可以加入羅漢果一起煲，因羅漢果本身有甜味，可以中和個味道。而兩者一齊煲的話，既可以清熱解毒，亦對肝臟好，更加可以增強身體免疫能力。 材料就只係兩樣，赤靈芝片約15g及羅漢果1個~ 赤靈芝片水浸洗一陣；羅漢果壓碎~ 煲內放入4L水，然後加入赤靈芝片及羅漢果~ 待滾後，加蓋轉小火煲一小時~ 熄火後就要即刻夾起啲材料，因為如果浸得耐，個茶就會有苦澀味就會重啦~ 待涼後入樽，放入雪櫃就飲得啦~ 其實我初時都好擔心赤靈芝個甘苦味都會好重，不過只係初入口時有點微苦，飲落都唔覺得有味，就連小小豬都肯飲就知應該唔難飲啦~ 可以一星期煲一次赤靈芝羅漢果茶，放入雪櫃當水飲用，我都係嗰句....飲有益嘅涼茶好過飲冇益嘅嘢啦(雖然....我都仍然都係好愛飲檸檬茶，努力改善中)。   溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，睇下呢個湯水啱唔啱自己呀！     **我地嘅FACEBOOK PAGE，齊齊嚟交流親子、玩樂、烹飪啦**