虎乳靈芝我都幾鐘意煲，因為味道唔錯之餘好飲又有益。見屋企仲有一份虎乳靈芝係度，所以又嚟煲個虎乳靈芝無花果百合靚湯，等小小豬增強抵抗力啦~ 小朋友容易感染傷風咳嗽，所以用虎乳靈芝加埋無花果、南北杏同埋百合一齊煲，有補血氣、強體質及潤肺止咳嘅功效呀！ 虎乳靈芝可能唔係太多人識，就等我再同大家分享下先。其實個名就係叫靈芝，但就唔係屬於靈芝科，係真菌科嚟，對補益肺氣，增强肺都有一定療效。小朋友容易感染傷風感冒，所以飲多啲可以預防傷風感冒、强壯體質同埋增強抵抗力，打好個底咁就唔怕易病啦~  材料：虎乳靈芝(我買左一両，落左三分一份量)、無花果四粒、蜜棗三粒、南北杏一湯匙、百合半兩、蓮子半兩及瘦肉$40~ 所有材料先浸洗十分鐘；瘦肉洗淨汆水備用~ 煲內放約3L水，水滾後放入所有材料~  待再次滾起時，用大火加蓋煲約半小時~  最後轉慢火加蓋煲一個半小時~  加少少鹽調味就飲得啦~  小小豬一向都鐘意飲乳靈芝湯，所以今次都唔例外，話咁快就清左兩大碗了。依個湯雖然係好飲又有益，仲非常啱小朋友飲添，不過....如果係病緊嘅時候就千其唔好飲住，要等好番先可以飲啦！ 溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！ 繼續看： 幼兒湯品：蘋果雪梨粟米雪耳湯 [湯水]馬蹄紅蘿蔔海底椰湯 - 感冒初癒, 潤喉化痰 幼兒湯品：瑤柱螺片合掌瓜煲豬展 >>> 看更多湯水食譜 <<<