副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

葛量洪號滅火輪展覽館

自從上次為JOBSjunior拍攝宣傳片扮演過消防員之後,朗朗就愛上咗消防員呢份職業喇!對於消防員一切有關嘅資料都感到好有興趣,有見及此,不如去一趟滅火輪參觀啦!

自從上次為JOBSjunior拍攝宣傳片扮演過消防員之後,朗朗就愛上咗消防員呢份職業喇!對於消防員一切有關嘅資料都感到好有興趣,有見及此,不如去一趟滅火輪參觀啦!   葛量洪滅火輪曾經為香港進行過多次海上救援工作,而家已經光榮退役,改裝成為展覽館喇! 船上嘅消防設備同房間仍然保留着,展覽館以海上消防歷史為主題。事不延遲,我哋馬上登船睇下囉! 滅火輪附近設有波浪形水池,似乎係想形造番航行時候嘅海浪,可見設計都花咗唔少心思~ 通過小橋便到達滅火輪,晴晴同爸爸快人一步上咗船,樣子幾咁得戚?心情一定好興奮啦!等埋我呀!~~ 展覽館位於鰂魚涌公園,靠在海濱沿岸,響呢度仲可以欣賞埋維港景色,一舉兩得!哈!~ 晴晴二話不說已經展開搜索行動喇!gogogo~ 紅色嘅係消防栓,用嚟撲救船上有可能發生嘅火警,要配合埋消防喉用先得㗎! 透過潛望鏡,可以睇到機房內嘅兩部柴油主機,晴晴都好雀躍想望下呀! 不如我哋逐間房睇下囉!第一間參觀嘅係餐室~ 消防員就係響呢度開飯㗎喇! 牆上嘅掛鈎大概係畀消防員飯前脫下制服或裝備㗎啦! 由此路落去就係船員休息室喇! 滅火輪就好似一間流動消防局咁,消防員每間當值24小時。休息室係畀消防員當值日使用嘅!有6間房,每間都有上下格床~ 洗滌室設有廁所.... 洗手盆等設備~ 而廚房就有廚具、煮食爐.... 仲有餐具。唔知佢哋每餐係食啲咩㗎呢?@@ 到達船尾部份~ 船頭同船尾都有兩個通風口,係一組活動裝置,可以因應唔同嘅風向而轉動,令船艙內嘅空氣保持流通~ 呢部係尾錨機,當船響海面拋下船錨嘅時候,為免船隨風或海浪擺動,就會用佢嚟拋下尾錨,用嚟固定船嘅位罝同方向~ 救護室有擔架、床、藥箱等設備畀~ 嚟到呢間房,可以透過膠地板望落船艙,好得意呀!不過如果有畏高嘅朋友就要注意喇!^^''' 呢間係辦公室,有枱、有梳化,如果消防員入晒嚟開會都幾壯觀喎! 船頭 可通過船頭嘅樓梯前往救火層甲板~ 嘩!有大火呀!晴朗消防隊正為火警射水~ XD 驟眼看,仲以為真係出咗海添!其實響呢度欣賞維港景色真係好正呀! 沿岸都發生咗火警,快啲去救火啦! 呢個係出水口,可以經消防喉射水救火~ 當消防員需要去較高位置灌救船火嘅時候,就要上去水炮高台喇! 再上仲有控制室同水炮台,不過冇開放公眾參觀,所以就響呢個角度欣賞下啦! 我哋又長知識喇!Yeah!!! 參觀完滅火輪,到最下層仲多資料睇~ 船尾個螺旋槳好巨型呀! 底層展館設計為半露天式,落雨都唔怕~ 消防用具嘅展示~ 晴晴似乎比較鍾意射水呢一part~ XD 一齊嚟回味下葛量洪號嘅滅火回憶啦! 滅火輪上嘅消防員介紹~ 幾場大型火警嘅救援場面~ 葛量洪號嘅模型~ 朗朗睇到流晒口水,如果可以帶番屋企就好囉!XD 港督麥理浩伉儷響1972年曾經到訪,來賓簽名冊度有佢嘅簽名㗎! 1952年,響香港黃埔船塢建造中嘅葛量洪號~ 1960年代,響葛量洪號服役嘅消防員~ 1973年,掛上色彩繽紛萬國旗嘅葛量洪號~ 1997年開始使用至今嘅消防標誌~ 海上救援包括咗大小船隻嘅火災、颱風襲港期間嘅海上災難以及飛機事故墮海等工作~ 葛量洪號服役前,較早期嘅消防員帽就只係一頂紅色鐵殼,而家果啲安全同輕便得多~ 舊式滅火船 無論裝備、航速同射水量都好難應付複雜嘅救援工作,就係因為咁,葛量洪號就誕生喇! 以前嘅消防員好多都係外籍人士,仲好興留二撇雞添!金色呢頂係十九世紀末嘅香港消防員所戴嘅金屬頭盔~ 第一次咁近距離去望一隻船嘅船底,覺得自己好渺小呀! 船頭位置嘅刻度同船錨都清晰可見~ 牆上亦有貼上消防員嘅威猛事跡~ 參觀完畢!通過小橋離開lu~ 回程嘅時候,不妨多留公園一陣,享受大自然風光~ 我哋仲發現大蝸牛添呀!晴朗都十分興奮雀躍~ 未有「葛量洪號」滅火輪之前,香港只有小型嘅滅火船。\「葛量洪號」嘅出現,標誌住滅火輪隊伍響質量方面嘅提昇。\「葛量洪號」服務至2002年光榮退役,確實為香港服務咗近半個世紀,而家已經由「精英號」滅火輪取代喇! 「精英號」嘅排水量有六百多噸,配有電子自動滅火系統,水炮射程達150米,主要負責撲救發生響大型船隻嘅火警。係現時最先進嘅世界級專業滅火輪嚟呀! 展覽館除咗帶畀我哋香港海上救援歷史嘅認識外,仲可以實地登船參觀唔同嘅設施同設備,真係大開眼界!能夠滿足朗朗對消防員知識嘅求知慾之餘,我哋大人都識多咗嘢,可算係一個親子閒遊嘅好去處呀! 展覽館位於香港鰂魚涌公園內 (可按圖放大) 葛量洪號滅火輪展覽館 費用:免費入場 開放時間:星期一、三至日 上午10:00~下午6:00 *聖誕節前夕及農曆新年除夕:上午10:00~下午5:00 *星期二 (公眾假期除外)、農曆年初一及二休館 地址:香港鰂魚涌公園 電話:3580 6770 網址:http://www.lcsd.gov.hk/CE/Museum/History/zh_TW/web/mh/about-us/fireboat-alexander-grantham-exhibition-gallery.html