副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

他/她的名字, 我的姓氏

之前黃曉明同Angelababy 係香港生左個BB 仔, 名人之後當然矚目, 大家最關心嘅係BB 仔到底會似阿爸定阿媽? 定兩個都唔似呢?黃小朋友花名叫 「小海綿」, 而另一對明星夫婦劉愷威同楊冪,

之前黃曉明同Angelababy 係香港生左個BB 仔, 名人之後當然矚目, 大家最關心嘅係BB 仔到底會似阿爸定阿媽? 定兩個都唔似呢?   黃小朋友花名叫 「小海綿」, 而另一對明星夫婦劉愷威同楊冪, 佢地嘅女花名叫「小糯米」, 我初時以為呢D 花名係為左保護名人後代嘅私隱而改, 但如果大家有印象, 去年台灣一宗不幸事件, 受害小朋友都有個花名叫「小燈泡」, 原來唔係只有名人後代會改呢D 名。 講起改名, BoxingDad發現香港家長越來越鍾意改「風水名」, 即係搵風水師父去幫小朋友改名, 因此呢一代小朋友嘅名, 會出現好多你以為係化學元素嘅字, 例如沚, 鉎, 煾, 壕, 楹, 因為風水師父通常會先睇下小朋友嘅八字, 再夾下父母八字, 得出小朋友五行欠乜野之後, 就建議一D 可以補足番五行所欠嘅名, 例如想用個「恩」字, 而小朋友欠火, 就會變左「煾」; 想用個「盈」字, 而小朋友欠木, 就會變左「楹」。 BoxingDad唔會反對人改「風水名」, 但我自己對此就敬而遠之, 我家公子個名都係我自己改, 原因係我覺得名字係父母送俾子女人生第一份禮物, 將佢由nobody 變somebody, 好比一個卧底終於恢復警察身份, 可以堂堂正正講一句:「我係差人。」, 當某人個仔/女有左名之後, 佢就唔再係叫「某人個仔/女」, 而係有自己嘅名字。   一份咁重要嘅禮物, BoxingDad唔想假手於人, 所以當我知道老婆有左之後, 已經開始構思改名, 而有幾大原則, 我覺得係必須留意嘅: 1. 唔好用D 太深, 太罕有嘅字 一係就成日俾人讀錯你個名, 一係次次都問你點讀, 過一排唔記得又問, 成世係都係咁咪話唔煩。 2. 避免有諧音字 教中文個Ben Sir 叫歐陽偉豪, 「陽偉」叫叫下就變左…; 某地產企業高層姓范名統, 決定用咩名前最好讀多幾次, 避免尷尬。 如果再小心D, 可能就要考慮埋普通話發音會唔會出現諧音, 如「健」同「賤」係諧音, 「菲」同「廢」都係諧音。 3. 聲調 蘇民峰原名蘇民立, 佢改名係因為覺得男人係社會上做事, 個名要有D 氣勢, 所以最尾個個字叫起黎要夠響亮。「立」字讀起上黎唔夠響, 所以佢幫自己改左個「峰」字。 有位牙醫, 叫莫黃維, 成日俾人叫錯做黃醫生, 因為「莫」同「黃」發音相似。 改名除左讀出黎要好聽, 仲要小心會唔會用左D 好易令人講錯嘅字。 4. 意義 意義呢樣野有好多種睇法, 可以係你對小朋友嘅期望, 如健康, 聰明等, 文化水平高D 可以引經據典, 亦有一D 係情景描述, 其實咩意思唔緊要, 重要嘅係將來小朋友大個問你點解改呢個名俾佢時, 你識得講番出黎就得。 5. 筆劃 唔係指風水個D, 只係考慮筆劃嘅數量多少, 方便書寫, 如非必要太多筆劃嘅字應該避免, 如「曦」, 「靈」等。   對以上原則有左概念之後, 就要開始揀字, 我地當然識唔晒所有字, 所以最好就係準備一本字典, 呢D 咁少用又阻地方嘅野千祈唔好買, 去圖書館借啦, 乜典都有。   唔講唔知, 讀字典其實幾有趣, 好多中文字都有深遠嘅意義, 只不過平時少用而忽略, 分分鐘你個個用左幾廿年嘅名可能有你意想不到嘅意義, 兩公婆睇下讀下, 講下笑下, 亦不失為一種生活情趣, 好過對住部手機啦。   最後提醒大家, 新生BB 係出世42日內(星期日及公眾假期除外) 申請出世紙, 係免費, 係免費, 係免費 (重要的事講三次), 42日後至一年內做, 就要收140蚊, 而如果一年之後先申請, 咁就要先得到登記官同意, 仲要俾多680蚊先申請到。攞左出世紙之後, BB 就有自己正式嘅名喇。   參考資料: 入境事務處 http://www.immd.gov.hk/…/birt…/Registration_of_a_Birth.html…