副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

【好玩靚景】賽馬會西貢戶外訓練營@香港青年協會

「十二隻恐龍去野餐,齊乘坐旅遊車出發了,路上唱歌兒快快樂樂,Sing "I am on my way"...」,係就係搭旅遊巴喇!不過我哋今次唔係去野餐,係去camp呀!上次介紹過保良局北潭涌渡假營,

「十二隻恐龍去野餐,齊乘坐旅遊車出發了,路上唱歌兒快快樂樂,Sing "I am on my way"...」,係就係搭旅遊巴喇!不過我哋今次唔係去野餐,係去camp呀!上次介紹過保良局北潭涌渡假營,今次一於更上一層樓,嘗試一下傳聞中環境好、風景正嘅賽馬會西貢戶外訓練營啦! 一切就從旅遊巴到達營地開始!每個小朋友都精神奕奕,預備開展我哋嘅兩日一夜渡假之旅喇! 大人、小朋友都大包小包仲拖埋喼,準備十足! 嘩!呢度環境真係正喎!有山、有水,果然係非同凡響~ 快啲去check-in囉!班小朋友已經好興奮喇! 其實興奮嘅又點止小朋友丫!大人心情都好高漲呀!XD 我哋一行39人,浩浩蕩蕩。將會入住2人房、8人房同埋高級豪華嘅28人房。一定好熱鬧啫! 泳池背後就係渡假屋區喇!一幢幢西班牙別墅,成個view都好靚呀! 經過多幢別墅之後,終於到達我哋嘅28人複式客房~ 小朋友又推門,又按門鐘,勁hyper!但其實鎖匙響我度呀!唔該讓一讓開畀我開咗門先啦!XDD Wow~~ 房間光猛舒適,第一感覺已經正到秘!*o* 裝修和傢俱以白+綠色為主,既簡潔又乾淨企理~ 小朋友已經展開搜索行動,摛高摛低四處參觀喇! 由上層望番落去,呢個角度夠唔夠豪華先?*o* 帶大家睇埋洗手間啦!上層同下層都各有一間。內裡有多格淋浴間、廁所和洗手盆,可容納多人同時間使用。有啲似公眾泳池嘅更衣室呀! 晴朗已經揀好自己張床,仲開始鋪梗床單添! 有咩嘢開心得過可以同三五知己玩足兩日一夜丫!圍埋一齊玩囉喂!~~~ 坐響梳化,望住咁正嘅風景,簡直係人生一大樂事呀!好舒服喔~ 呢度嘅渡假屋都坐擁無敵大海景,真係住多幾日都願呀! 個咩個個突然急急腳落晒嚟樓下嘅?原來有電視睇,唔怪之得啦! 見到佢哋一齊睇到咔咔笑,真係好得意呀! 似乎大家都好滿意間屋。咁就好喇!不如出去行下囉!~~ 經過泳池,發現部份團友已經換晒泳裝落水玩喇! 嘩!可以邊賞風景邊暢泳,大家心情十分舒暢,環境真係正到呢? 我哋去咗海旁玩bubble,你吹我拍,好熱鬧! 晴朗真係好鍾意玩bubble,玩到啲小朋友都番晒屋,佢哋仲好有精力咁玩梗.... 番渡假屋途中,經過cafe,原來環境都好正喎!可以響度tea一tea~ 除咗有小食賣之外,仲有冷熱飲品同食物提供,唔怕會餓親啦! 下午茶時間盡情high tea囉!~ 上房執拾一下行裝,休息一下,又再出發lu~ yeah!!! 夕陽無限好,只是近黃昏。唔覺唔覺已經玩到日落西下~ 晴晴掃落去欄杆上嘅竹筒時,響起清脆悅耳嘅聲音,好有大自然feel呀! 就快天黑,要快啲為我哋嘅晚餐做準備先得! 在爸爸們分工合作之下,可以開始BBQ晚會喇!gogogo~ 晴朗都嚟幫手燒叉呀!(冇搞搞震)唔該晒喎!^^ 呢啲就係我哋嘅豐富晚餐喇!6大盤,好壯觀!@.@ 吹住海風,欣賞住周圍優美嘅環境,胃口都會特別好呀! 好肚餓...我哋唔客氣喇! 小朋友冇份燒嘅,圍埋一齊玩狐狸小姐幾多點?十二點!跑呀!~~~~ 第一次燒嘢食唔駛身水身汗,環境真係好好~ 大家都不停食,食到夠鐘都仲未捨得走呀! 食飽飽!梳洗過後,又係卡通片時間喇! 仲大玩紙牌遊戲添!晴朗第一次接觸uno,覺得幾新奇有趣,仲玩到唔願瞓添!^^''' 一晚瞓到大天光,好舒服喔~ 晨早起床,清新開朗~ 太陽伯伯好溫暖! 一大清早,女孩子就玩吸印遊戲,精力充沛! 晴晴都被呢一片海景所吸引~ 原來岸邊有兩隻小白鷺,一步一步沿住水邊步行,好可愛呀! 早餐時間到!齊齊到canteen拆餐飽囉喂!有腸仔、炒蛋、方包、榨菜肉絲米,仲有一大壺柯華田添! 邊嘆早餐邊欣賞靚景,如果日日都係咁嘆你話幾好呢?XD 大家都食飽飽,下一個活動係咩呀?小朋友都齊集晒響我哋間屋嘅? 一同來繪畫囉!渡假屋突然化身為海景畫室,係小朋友發揮無限創意嘅時間喇! 小朋友都畫得好投入,好開心呀! 課堂主題係獅子,呢幅係其中一位小朋友嘅作品,係咪好可愛呢? 認真學習過後,小朋友又再encore uno遊戲~ uno既富有挑戰性又好玩,唔怪得之咁受小朋友歡迎啦! 大船經過後,海上泛去一排一排嘅波浪,此情此景,好悠閒寫意呀! 大家估唔估到我哋嚟梗會進行咩嘢活動? 飛鳥?白鶴?花朵?蝴蝶?冇錯!就係同蝴蝶有關㗎喇!XD 一齊去上蝴蝶酥製作班囉喂!~~ 小朋友都好留心聽導師講解,期間仲有互動添! 原來做法好簡單㗎咋! 先將糖灑在已解凍嘅酥皮上面,灑完一邊反轉灑另一邊,鍾意食甜啲嘅就灑多啲~ 然後幫塊酥皮做按摩,均勻鋪平糖粒~ 酥皮向內摺四份一,再向內摺多一次到中間位置,另一邊都係咁做~ 摺好之後,就變成兩邊復合成六摺嘅長條形喇! 用手輕輕按壓,再放入雪櫃10分鐘~ 從雪櫃取出,切開約1/2吋闊嘅幼條~ 切好晒之後,可以入焗爐焗約20分鐘,直至金黃色就得喇! 呢啲係上一班嘅完成品,係咪好吸引呢?*o* 晴朗都開始動手做喇!奸爸嗲! 等梗出爐嘅時候係最期待㗎! 課堂上好多嘢都要靠自己,整完蝴蝶酥,大家都夾手夾腳清理枱面。完成晒之後亦要負責洗碗,係訓練自理嘅好機會呀! 嘩!全部都出晒爐lu~ 大成功!Yeah!!! 晴朗都好有滿足感呀!仲問可唔可以即刻食添!XD 自己整的確係特別好味呀! 食飽過後,又玩過,做小朋友真開心! 我哋仲去咗禮品店玩夾蛋機添!小禮物人人有份,永不落空~ 午餐時間到!今次order嘅係西式餐,有粟米忌廉湯、茄汁燴豬扒、芝士白汁什豆雞皇、炒雜蔬、脆炸薯條同埋肉醬意粉~ 優美嘅環境、美味嘅食物,一切都好美好呀!(攝自晴朗爸爸,見唔見到我哋呢?XD) 臨走嘅時候,發現原來最上層有一個平台,風景仲靚呀! 小朋友繼續你追我逐,精力無界限~ 大人就把握最後機會,盡覽呢一片湖光山色! 西貢戶外訓練營係我哋去過咁多個camp site,風景、環境最正嘅一個。靚景之下,心情都特別舒暢!Cafe同Canteen啲嘢食都煮得好好味!最緊要小朋友啱食嘛!唔需要用好多錢去住酒店,都可以渡過一個咁悠閒舒適嘅假期。真係唔錯喎!不過如果可以住多幾日就好喇!我哋原本想玩埋DIY pizza同埋果jam,但因為啲班已經一早full晒!想玩DIY嘅朋友就要預早book定喇!入camp之前仲以為只報蝴蝶酥一個班,冇咩活動可能會悶添!但原來響camp site自由活動都用咗好多時間,報一個班都夠喇!好彩當初冇位啫!大人同小朋友都各自搵到適合自己嘅活動,玩得好開心!呢度真係一個本地親子渡假嘅好地方呀! 賽馬會西貢戶外訓練營 地址:西貢大網仔路DD256地段 電話:27922727 網址:http://otc.hkfyg.org.hk/page.aspx?corpname=otc&i=3822營地申請:http://220.241.229.44/hkfyg-web/web/public/room_booking_public.faces?reset=yes FIND US on:      BLOGs: CONTACT US: