今次「WE嘩！充氣嘉年華」除咗不同種類嘅恐龍充氣彈床，仲加入咗考古學元素，好吸引呀！喜歡恐龍嘅晴晴，屋企啲恐龍玩具同書藉多到要搵個櫃擺放，簡直係不折不扣嘅恐龍迷！所以我哋又點會錯過「WE嘩！」嘅「恐龍遊樂園」呢？趁住假期，帶埋晴朗向青衣出發！仲未去「WE嘩！」嘅朋友，要把握時間喇！ 熊啤啤方舟 身高限制：90 – 140cm我哋晨咁早閘門都未開已經到達，「熊啤啤方舟」就係晴朗揀選嘅第一個遊戲喇！ 大部份遊戲都設有身高限制，有啲仲會有重量限制添！所以玩之前記得要度一度先好去排隊呀！ 「熊啤啤方舟」除咗有滑梯、彈床，底層仲有森林迷宮同障礙區，晴朗一入到去已經喪跳喪瀡，好快就進入咗忘我境界~ 瀡極都未見晴晴嘅？原來佢覺得滑梯太高，淨係玩底層已經足夠喇喎！每人膽量唔同，玩得開心就得啦！^^ 恐龍生蛋三角龍媽媽啲恐龍蛋陸續破殼而出，快啲過去睇下囉！ 按個掣，三角龍媽媽就會生蛋，可以見證生命嘅誕生，太神奇喇！啱啱出世嘅bb恐龍郁嚟郁去，好逼真呀！ 玩完仲有恐龍蛋送添！開心到震啦！ 恐龍蛋有工具跟埋畀你去挖隻恐龍仔出嚟！過程都幾考手力同耐性，晴朗都覺得好有趣呀！ 歷奇電船仔、波板糖賽艇 身高及體重限制：95 – 135cm，25kg或以下船仔係大熱遊戲之一，好受小朋友歡迎！而場內有兩款船仔，首先玩咗手動嘅先啦！ 工作人員都好小心接送小朋友落船，值得一讚！ 手動嘅意思，真係要運用雙手去轉動船兩側嘅巨輪，咁先會郁動㗎！晴朗好快就掌握到箇中竅門，化身成為小小船長喇！ 另一款係電動船，只要扭動軚盤，就可以穿梭湖中，幾咁休閒自在呢？ 排咗好耐，終於到我哋，心情極之興奮呀！ 晴朗就好似揸車仔咁左右飄移，好好玩！仲同其他小朋友有互動交流，你追我逐，快樂嘅時間過得特別快~ 如果想玩船仔，最好預多少少時間排隊，因為條龍真係都幾長㗎！ 恐龍騎士 身高及體重限制：90 – 140cm，40kg或以下想唔想像得到騎咗上去識郁動嘅恐龍身上係咩嘢感覺嘅呢？我未玩過唔清楚！但晴朗騎咗上去，就好似恐龍騎士咁，好威風呀！「吼~」 逃出速龍口 身高限制：100 – 140cm張牙舞爪嘅恐龍頭好巨型！原來有成25呎高，唔怪之得咁有氣勢啦！晴晴見到滑梯嘅高度，即時淆底，但朗朗就好雀躍走咗去排隊喇！ 巨型速龍頭充氣彈床共有3條滑梯，朗朗先瀡中間，再瀡左右兩邊，不停loop，幾分鐘嘅時間好快又過去喇！上上落落，不但精力無減，仲要encore多次添！真係要寫個「服」字畀佢呀！ 長頸鹿樂園 身高限制：90 – 140cm睇完哥哥玩彈床，今次輪到朗朗陪晴晴玩滑梯矮啲嘅「長頸鹿樂園 」。見到高高嘅長勁鹿咁可愛，小朋友又點會唔心動丫？ 彈床由長頸鹿、獅子同小白虎組成，晴朗除咗不停loop滑梯之外，仲響充氣小森林之中穿越同喪跳，好似變咗兩個小泰山咁囉！XD 雖然滑梯矮過之前玩過嘅彈床，但一樣咁好玩，晴朗一瀡到落嚟又急急腳上去再瀡過，真係精力無界限呀！ 狂歡地帶 身高限制：90 – 140cm「狂歡地帶」嘅設計就好似置身於西部城鎮一樣，小小西部牛仔are you READY？ 晴朗又再一次展示自己高度合適，為咗去玩變得相當合作呀！^^ 彈床內有充氣木桶、圍欄等障礙物攀爬滑梯，晴朗不停你追我逐，玩到癲晒！揸住相機嘅晴朗媽媽都追到索晒氣喇！@@''' 森林越野車 身高及體重限制：95 – 135cm，25kg或以下嘉年華又點少得電動車呀？全部車款都係適合行凹凸不平嘅野外路面，一齊嚟越野一番囉！ 晴朗玩電動車就玩得多，響草地呢啲粗糙嘅路面玩都係第一次，感覺就好似越野賽車手一樣，玩得好狂野呀！呢個亦係需要排得耐少少嘅遊戲，想玩就要預早啲去排隊喇！ 鯊魚探險 身高限制：90 – 140cm嘩！大白鯊呀！睇見個大口都驚驚，但就係咁先夠驚險刺激加嘛！gogogo~ 晴晴又拗底，朗朗加油呀！XD 見佢不停瀡完又上去再瀡過，似乎都習慣咗「把握時間」嘅遊戲玩法，幾分鐘真係好快過㗎咋！ 越押威龍 身高限制：90 – 140cm凶惡嘅大暴龍被困在籠中好似隨時會破籠而出咁，情況相當危急！小朋友竟然爬入籠中試圖馴服惡龍，衝過彈床區之後再經滑梯脫險，唔驚之餘仲重複又重複做同一件事，勇氣可嘉！真係難佢哋唔到喎！^^V 恐龍仔滑梯 身高限制：90 – 130cm性格友善溫馴嘅劍龍同其他暴龍截然不同，佢好鍾意同小朋友玩㗎！ 晴朗二話不說就已經爬咗上去劍龍身上面~ 仲嘗試用唔同姿勢瀡滑梯添！好搞笑！呢條滑梯速度特別快，好有速度感，爽呀！ 考古天秤機 身高及體重限制：90 – 140cm，40kg或以下天秤機嘅玩法係要操控吊臂，透過磁力吸吊七色龍珠落去中間個車軚內。晴朗都玩得好投入，相當考驗手眼協調同耐性㗎！ 考古挖掘機 身高及體重限制：90 – 140cm，40kg或以下晴朗玩完天秤機好似上咗考古學癮咁，跟住走咗去操作挖掘機，實行要將所有恐龍蛋都挖晒出嚟呀！ 場內除咗不同關卡之外，仲有其他攤位同設施~好似呢條像真度極高嘅暴龍咁，頭、手同尾巴都識郁動，十分吸睛！晴晴勁鍾意佢，仲同佢鬥「吼」添！XD 轉個頭竟然見到一條識行識走嘅暴龍出沒，但冇想像中咁可怕，可以同佢握握手，感覺就好似馴服咗一條暴龍咁呀！Yeah!!! 晴朗被懷舊糖果吸引咗埋去一個檔攤，朗朗嘗試自己吹出一個波波糖果。有得玩又有得食，好過癮！ 天色開始昏暗，玩到差唔多關門，其他攤位條條龍都咁長，唔夠時間玩喇！ 幾個攤位啲遊戲都吸引，不過都幾考智力、眼界、判斷力同觀察力㗎！臨走唔好忘記去一去精品廊同汽球攤位睇睇，啲汽球都好受小朋友歡迎呀！ 「WE嘩！恐龍遊樂園」好好玩！我哋由朝玩到晚，玩足全日都未夠喉！有啲遊戲唔淨只玩一次，要encore嘅有「恐龍騎士」、「逃出速龍口」、「狂歡地帶」同「恐龍仔滑梯」。晴晴最鍾意騎暴龍，而朗朗就至愛挖恐龍蛋喇！中場休息過咗去對面嘅青怡花園食嘢！有小食店亦有餐廳，都好方便！食飽又繼續再玩過，真係冇諗過一日都玩唔晒！好開心！嘉年華仲有幾日就完結，大家都趁住假期帶埋小朋友嚟湊下熱鬧啦！「吼~」 精華片段： WE嘩！恐龍遊樂園．聖誕慈善嘉年華 日期：2017年12月23日至2018年1月1日 (共10天) 時間：上午11時至下午6時 地點：青衣體育會足球場 (青衣青綠街 38 號) 票價：按遊戲而定，每款$50或$10；另設$180優惠套票，包括：4款$50遊戲及2款$10遊戲 主辦單位：We 嘩充氣嘉年華 協辦單位：青衣居民聯會 受惠機構：香港移植運動協會查詢電話：8203 3323 網址：http://www.wewaland.com Facebook：http://www.facebook.com/wewaland ※ 以上資料只供參考，行程有機會因實際天氣或交通情況而更改。詳情請參閱 WE嘩充氣嘉年華Facebook專頁。* 如有任何爭議，We嘩！充氣嘉年華保留最終決定權。 FIND US on: BLOGs: CONTACT US:
