副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

【豐富精彩】聖誕全城Hohoho@海洋公園

又到聖誕!又到聖誕!今年嘅平安夜,我哋去咗海洋公園「聖誕全城Hohoho」感受節日氣氛。去之前都冇特別plan行程,但節目竟然比預期中豐富精彩,到處都是驚喜!同大家分享一下先得!嘩!哈!知道有得去玩,

又到聖誕!又到聖誕!今年嘅平安夜,我哋去咗海洋公園「聖誕全城Hohoho」感受節日氣氛。去之前都冇特別plan行程,但節目竟然比預期中豐富精彩,到處都是驚喜!同大家分享一下先得! 嘩!哈!知道有得去玩,之前一晚好早瞓,所以特別精神奕奕呀!Woo~ho~ 帶住悠閒嘅心情入場,第一件事唔係去玩,而係去「水都餅店」坐低嘆下。店內佈置好有聖誕氣氛,蛋糕、甜品種類多籮籮,睇到流晒口水喇! 好多食物都做梗聖誕主題,真係想每款都試下呀! 晴朗一同分享沙律杯,而我就揀咗件聖誕朱古力mousse cake嘆下,點知食食下朗朗又要嚟分一杯羹,胃食樣係收藏唔到㗎! 嘆完甜品出到去就遇上聖誕歌舞表演,好多人圍觀,場面好熱鬧呀! 經過巨型聖誕樹嘅時候,發現正進行聖誕佈佳音,一家人坐低細心欣賞,節日氣氛好濃厚,正正就係我想要嘅嘢嚟喇! 難得來到,一定唔可以錯過去聖誕老人屋探訪聖誕老人啦! 可以同聖誕老人影合照,好開心!影完之後,聖誕老人仲會同小朋友傾計,英文麻麻哋嘅晴朗唔知聽唔聽得明呢?我就偷聽到一句:「今晚我會到你們家」。哈哈!呢位聖誕老人都好有heart喎!咁識得氹小朋友開心~ 除聖誕主題外,恆常嘅親親動物都繼續會有,睇下我哋遇到邊個?係一隻禿鷲呀! 入海洋公園睇熊貓已經唔係第一次,但咁近距離睇到佢哋走動同食竹葉都係第一次,勁興奮!*o* 晴朗仲參觀埋介紹熊貓頭骨、叫聲同便便嘅展品,對熊貓嘅知識又了解多咗喇! 參觀完「熊貓山莊」後,巧遇小爪水獺,佢識得同在場朋友握手㗎!好聰明! 差唔多每間精品店門外都擺放咗bubble槍,每次經過都會玩到唔捨得行,bubble對於小朋友嚟講實在係太吸引喇! 嚟到「威威天地」當然要玩番幾鋪喜歡玩嘅遊戲啦! 攀石、騎木馬、玩跳樓機、大鬧堡壘,盡情地玩~~ 「冰極運動會」即將開始,未玩已經企定冠軍位置,睇嚟晴朗都好有信心喎! 心情既期待又興奮呀! 做一啲熱身遊戲先啦!姐姐請小朋友扮企鵝,再扮北極熊,晴朗都玩得好投入~ 跟住就一齊推冰壼,邊組推得最高分就嬴喇! 我哋係「士多啤梨」組,成績.... 運動會都係志在參與啫!每個小朋友都得到獎牌呀!Yeah!!! 攤位遊戲啲獎品好有聖誕feel,想碰碰運氣中番個雪人或者聖誕襪公仔,但似乎運氣爭啲。唔緊要啦!再接再勵! 換上聖誕服飾嘅小紅熊,好可愛呀! 動物係無處不在㗎!又畀我哋遇到貓頭鷹。呵呵! 玩完「威威天地」之後,途經此地,就入咗去睇「海洋小勇士」劇場喇! 等待開場嘅時間最好用嚟醫肚,熱狗可以自己加醬汁,好好味! 開場喇!開場喇!套劇教導小朋友要愛護環境,唔好亂拋垃圾,藉此傳揚保育意識,好有教育意義,歌舞又好睇,真係好值得帶埋小朋友一齊去睇呀! 完場後仲可以同演員合照留念,晴晴都好鍾意套劇,係佢主動話要上台影相㗎! 換上聖誕服飾嘅小海豚,好特別呀! 原來我哋響海濱樂園呢邊都玩咗咁耐,係時候要搭海洋列車過去對面山喇! 落車出到去就遇到「企鵝粉絲過聖誕」,一班舞蹈員同巨型企鵝又跳又耍雜技,落力演出,好好睇!引來大批遊客圍觀,好有氣氛~ 遇上聖誕角色,梗係要嚟番張合照啦!今次呢位士兵哥哥好入戲,仲教小朋友點樣立正企好,好搞笑!晴晴都學得似模似樣喎! 小朋友玩咗咁耐,輪都輪到我哋大人展新手啦!「VR至FUN專區」有多款新奇刺激嘅體感遊戲玩,場景逼真!我哋玩咗水果忍者,限時之內要斬晒所有飛出來嘅水果,我同晴朗爸爸都玩到好似痙攣手咁,旁觀者望落去應該會覺得好奇怪,但我哋玩梗嘅就樂在其中,緊張刺激! 中場休息,去附近食少少嘢再戰VR~ 跟住落嚟嘗試「VR森度行」,戴上眼罩同headphone之後隨即開展熱帶雨林嘅旅程。套戲以360度實景拍攝,我睇嘅時候不停周圍望,甚至旋轉座椅睇晒全景,好過癮呀! 晴朗乖乖等待我哋完成VR遊戲,一於去玩下攤位遊戲當係獎勵啦!啲聖誕公仔好靚,如果可以帶一個番屋企就好喇! 嘩!願望成真!玩彈青蛙中咗珍寶獎,即時可以攬住聖誕老人番屋企呀!超興奮囉!*o* 聖誕精靈趕住去開Party都不忘抽空同我哋影相,太好喇! 我哋仲發現摩天輪附近多咗個影相位,帶埋聖誕老人一齊合照囉! 就連吊車都要綁上紅絲帶,佈置到成份聖誕禮物咁,馬上去搭番轉吊車喇喂! 去到邊就攬到邊,其實聖誕老人幾有份量,攬得耐都幾攰,但晴朗輪流抱,都忘記咗個「攰」字點寫喇! 入夜後,聖誕樹亮起燈飾仲靚呀! 就坐人力車過去影聖誕樹囉!麻煩晴朗爸爸加把勁啦!XD 半路中途晴晴想玩番轉「環迴水世界」,騎住殺人鯨嘅晴晴真係好開心喎! 陪完晴晴玩木馬,又點少得朗朗至愛嘅「澳洲歷奇」丫!馬上入去親親樹熊囉! 通過燈海小徑就到達樂園廣場,呢度除咗有聖誕樹,仲有真人雕像、熱情天使同埋飄雪效果~ 臨走打算行埋聖誕巿集,想睇下啲插畫精品、立體砌圖、紥染精品同埋皮革藝術品....等等。但由於晚上開始免費入場嘅關係,遊客越來越多,寸步難行,所以決定放棄喇! 睇完精彩嘅煙火表演就回家去,滿載而歸!Hohoo~ 聖誕假期到海洋公園真係冇揀錯呀!無論食物、人物、表演、佈置都好有氣氛!本身冇計劃過行程,但好多事物都會突然出現或剛巧遇上,令旅程更加豐富精彩。認真樂而忘返!晴朗兩個參加完「冰極運動會」之後,個獎牌戴足全日都唔捨得除,好搞笑呀!最欣賞嘅係我哋玩VR嘅時候,職員幫忙睇住等待嘅晴朗,令我哋玩得開心又放心!本來諗住悠悠閒閒咁周圍行下,點知卻意外地變為多姿多采嘅旅程,好開心!今個聖誕真係好難忘呀!MERRY CHRISMAS & HAPPY NEW YEAR!!!  精華片段: 海洋公園聖誕全城HOHOHO活動日期:2017年12月16日 ~ 2018年1月1日網址:https://www.oceanpark.com.hk/tc/park-experience/christmas-sensation-2017 FIND US on:        BLOGs:  CONTACT US: