早在放聖誕長假期之前，小b鼻敏感引發鼻水倒流，又咳又痰又鼻水又鼻塞，好一段時間，晚上瞓瞓下都會咳醒，仲咳到嘔。 無法啦！好番啲去返學，始終避免唔到交叉感染，加上天氣又唔穩定，睇咗幾次醫生都清唔到。 最後轉左睇另一個醫生，敏感加上感冒，支氣管仲有啲發炎，要聞氣食壯氣管藥。醫生叮囑水果唔食得，最多只可以食蘋果，但要蒸5分鐘先食得！仲要4日換一次床單，60度水去洗呀！   更叮囑一星期都唔可以飲湯 (其實媽媽都知傷風咳感冒唔好飲湯，但醫生叮囑都是第一次)！ 所以媽媽足足兩個星期多都無煲湯俾爸爸同小b兩隻湯怪飲！ 直到小b完全好番，媽媽就煲左呢個太子參湯，幫小b病後修護番，調理番身體，增強番免疫力。   太子參: 又稱孩童參，性質溫和，補而不燥，可以用於病後修護、調理身體，亦有助增強免疫力。 沙參: 清熱養陰，潤肺止咳。 海竹頭: 補而不燥、滋養氣血、生津。     材料: 1. 太子參 1 両 2. 沙參1 両 3. 海竹頭 2両 4. 麥冬 1 両 5. 生曬淮山 約10 塊 6. 陳皮 1瓣 7. 乾螺頭 2-3個 8. 排骨 約30蚊   做法： 1) 排骨洗淨汆水。 2) 陳皮用水浸軟，刮瓤。 3) 乾螺頭汆水10分鐘，用清水放入雪櫃浸一晚，浸螺頭水保留。煲湯前將螺頭剪開，更出味。 4) 海竹頭洗淨，切塊。 5) 太子參、沙參、淮山及麥冬，用清水浸10 分鐘，瀝水備用。 6) 鍋內注入適量水，水滾後，加入所以材料，大火滾10分鐘，轉細火煲2小時，加少許鹽調味，飲得。   notes: 1) 傷風感冒喉嚨痛未清，不宜飲用。 2) 材料有藥材成分，要了解下自己個人體質，是否適合飲用。         #多謝Natalie經常教媽媽煲湯   Facebook: www.facebook.com/MyBabyAustin Instagram : www.instagram.com/babyaustin06 Blog:  https://babyaustin0606.blogspot.com