當BB開始踏入 4 個幾月就可以開始俾佢嘗試零食嘅滋味！ 當然沙律B未咁快試啦！ 因為佢早產左一個月，沙律媽媽差不多6個月先俾零食！ 生果就4個幾月開始試。 以上就係沙律B最近嘅零食櫃！ 記住食之前要留意 expiry date！ I: 果蓉 沙律B第一次食嘅零食係Ella’s Kitchen嘅果蓉。 我之前都講過，呢款有機果蓉加左檸檬汁，酸酸地。 開頭沙律B食都皺曬眉頭！後來熟悉左記勁鐘意！ 第一次食，我只係試佢反應，俾左幾啖佢食，後來佢已經可以食曬成包！ 初頭用匙羹食，宜家已經可以自己啜！ 一包90g，即係3oz左右，食曬一包都好飽肚。 平時去街我地都會準備一包，以備不時之需！ 如果佢食食下唔食，又可以擰番個蓋，休息一陣再食又得！ 開左後就要當日食曬，唔建議隔日再食！ 呢個牌子嘅果蓉好多地方都有得買。 一田，Watson’s Baby，iherb，甚至某啲惠康都見過！ 講平，應該iherb會平啲，有時 Watson’s Baby 做 sale 都唔算太貴！ 平均預 HK$15至HK$19 一包左右，各位媽媽可以格下價先。 除左 Ella’s Kitchen，沙律B都有食 Cow&Gate，同埋 Organix 果蓉。 呢款就唔係唧唧裝，而係一pot pot！每Pot都有100g左右，食完都飽曬。 Cow&Gate 味道唔似Ella’s Kitchen， 因為無加檸檬汁。 所以味道比較甜，除非買berries味，否則味道都比較易接受。 我暫時係香港未見過！呢啲果蓉全部沙律嫲嫲英國買的，好平！£1.75有4pots (1盒)。 呢兩款果蓉一pot pot，一定要用匙羹食。 Orgnaix 果蓉又有少少唔同，我地試左Mangoes，真係好似有粒粒係入邊。 唔似以上兩款咁 smooth，如果你BB初嚐果蓉，可以俾 smooth 少少果啲先！ Organix 我都比較少見，香港網店曾經見過！ 果蓉，點少得 HiPP 呢！沙律B 都有唔少！ 又係沙律嫲嫲買的，平均£90p 有一罐！香港真係要捱貴貨！ HiPP果蓉，有甜有鹹，甜果啲生果味真係好奶味。 但鹹味 (veggie, rich, chicken) 沙律B唔受落，已送曬俾人！ HiPP有唔同size 之分，最細好似125g，對於初嚐者 (6m) 可能會我多左少少！ HiPP我估無媽咪唔識，所以都唔使多作介紹！ II: 細細粒嘅餅仔 其實沙律媽媽好少俾零食沙律B食，所以買完之後，擺多過食。 但沙律媽媽都有俾沙律B食Gerber星星餅。   呢個牌子唔使我介紹，我估全部媽咪都應該知。 星星餅細細粒，又易食，好多一開始食零食都係食星星餅。 到BB大大下，就俾佢學下自己拎入口。星星餅可以測試到兩樣野。 1: BB拎小物件嘅技能 [用母指+食指拎] 2: 可唔可以準確地放入口 星星餅有分普通版同 organic 版，因為本身價錢好平，我地兩樣都有買。 HK$2x 有大大樽，好抵！ 每次開左，沙律媽媽會將少部分放入零食盒，唔使成日擰開個樽蓋。 成日擰開樽蓋，好容易拎到星星餅變淋。 除左星星餅，都有朋友送左 Kewpie 南瓜味餅仔。 呢款餅仔都係一遇口水就會溶果種。 但我我覺得Gerber星星餅好味啲，同埋食完無咁口渴！ *每次俾野沙律B食之前，沙律媽媽都會試左先 呢款餅仔勝仔細細包，無零食盒嘅情況下都可以輕易拎去街！ III: 手指形狀嘅餅仔 以上兩款餅仔又係沙律嫲嫲買的，finger biscuit！ 暫時只試左HEINZ，好好味！Cow&Gate無味! 呢兩款餅仔，我地主要用嚟訓練沙律B自己食野嘅能力。 因為沙律爸媽好驚污糟，所以平時食野都係放入沙律B口就算數。 原來錯曬，因為咁做，BB唔係好識放野入口食，或者唔係咁協調，放唔準。 所以呢排我地都成日俾佢拎住手指餅食，訓練下。 因為一歲去健康院check，如果唔pass，要再去多次架！ So far 沙律B放野入口是無問題的。 但食到最後一啖，或者食細細粒嘅野就困難啲。 因為佢唔識放開手，將細細粒嘅國放入口。 所以，各位媽媽要多啲俾BB試下拎小物件食，星星餅係唔錯嘅選擇。 除左以上兩款餅餅，沙律B仲有好多款零食，全部都係沙律嫲嫲買或者朋友送的。 食極都食唔曬，基本上沙律媽媽無買過零食！ 沙律B啲零食好快過期，各位媽媽唔好買咁多。 IV：Pigeon 蒸蛋糕仔 [Link] 呢個Pigeon蒸蛋糕仔係沙律媽媽唯一買過嘅零食，真心推薦！ 當沙律B去到9-10個月果陣，無意中發現左呢款蒸蛋糕仔，覺得好得意就買左嚟試，一試就愛上。 首先，日本生製，已加曬分。仲要Pigeon出產，應該可以放心俾BB/小朋友食。 最抵死佢一包有幾個味，仲要連蛋糕模都送埋，真心no complain！ 沙律媽媽3月頭同沙律B去旅行都有帶過去，好彩有佢！ Pigeon 蒸蛋糕仔非常user-friend，手殘都做到。 步驟1: 打開包裝，將一包蛋糕粉倒入蛋糕模 步驟2: 準備15ml (0.5oz) 鮮奶 / 人奶 / 配方奶，倒入步驟1，再拌勻 步驟3: 隔水蒸5分鐘左右，搞掂 成個過程只需要10分鐘時間，非常方便。 宜家沙律媽媽次次約左人食飯，都會蒸定一個俾沙律B。 等佢可以成餐飯都坐定定！ 呢款蛋糕仔由9m+開始食，小BB可大零食。 大BB番學可以當早餐，或者下午茶！   嬰兒用品系列︰ 如何選購嬰兒用品の消耗品篇！ 如何選購嬰兒用品の奶樽奶咀與配件篇！ 好物&癈物分享︰ 精明買物媽媽系列の嬰兒好物大分享 I 旅行系列︰ 小腳板走天涯の10m台灣旅行應該帶啲咩！