天氣好嘅時候，我都會盡量安排戶外活動俾和牛B。 讓和牛B可以吸呼新鮮空氣，曬多啲太陽，吸收維他命D，睇多啲綠色嘢。     今次，我哋嚟到九龍區樂富與黃大仙交界嘅「 摩 士 公 園 」。 呢個地點，如果搭地鐵去黃大仙站又或樂富站落車，都一樣需要步行大約10分鐘，路程亦都差唔多。     摩士公園其實分咗四個部分，有一號、二號、三號及四號。而我哋今次主要係去三號公園玩，因為已經好夠放電了!     三號公園入面嘅兒童遊樂場區域，分成咗八個小區。六個鞦韆、八條滑梯，攀爬類嘅遊戲組亦都有唔少。     我哋從鳳舞街近摩士體育館入口進入，途經會見到公廁及小食亭。     而兒童遊樂場附近都有一個公廁，仲有育嬰室。   第一區，適合幼兒嘅滑梯遊戲組，旁途仲有軚盤遊戲及鼓。       可以作親子互動嘅圓圈板。     唔會太斜或太高，有少少波浪形嘅滑梯。     旁邊仲有訓練小朋友平衡、力量、膽量嘅搖搖遊戲組。     小朋友要靠自己運用力量，將重心轉移，令到搖搖裝置郁動，彈下彈下。     第二區，有一支圓柱體，企上站台，家長在旁幫忙轉動，佢係迷你版嘅氹氹轉遊戲。       旁途仲有三隻搖馬遊戲組。     第三區 - 鞦韆區，鞦韆分咗幼兒款(有個兜型)同一般嘅款式。     幼兒款鞦韆一組有兩個，一般鞦韆有兩組共四個。     準備進入第四區至六區嘅兒童遊樂區了。     呢個區嘅遊戲組適合4歲以上小童，有攀架、斜台板、滑梯三條等。     斜台板附有一條鐵鏈，輔助小朋友登上遊戲區，旁邊仲有條滑梯。     力量型遊戲攀架，和牛B當然未夠力支撐、同未夠高去玩啦~     另一邊仲有仿石梯嘅膠質樓梯。     淨係樓梯，呢一組遊戲組都有三個款式。     呢到亦都有軚盤遊戲組     滑梯組有三條，最後一組就喺了。     第五區 - 幼兒與兒童嘅遊樂區   八個小區入面，呢個區有兩條滑梯，一條短滑梯，而最高就係呢一條黃色滑梯了。     要上去瀡滑梯，首先要通過體力考驗。 和牛B剛剛夠高、夠力氣，自己爬上去呀。       第六區 - 幼兒遊樂區 此區滑梯組都係比較短同埋設計得比較矮身，所以好適合幼兒遊玩，而滑梯組有兩條。     行過天橋就會見到另一條滑梯。     第七區 - 啟發小朋友音樂天份   此區嘅遊戲同音樂有密切關係，有鼓、有叮叮琴。     第八區 - 搖搖板，呢個款式嘅搖搖板，可以俾4個小朋友玩。 打交叉方式進行遊戲     假日想戶外活動，跑跑跳跳，公園夠大確實好重要。 摩士公園嘅設施，可以話好多又唔算係超多，好少又唔係，市區嚟講呢到活動空間好大。 嚟到呢到，和牛B真係放咗唔少電，同埋好開心。     去完公園玩，仲需要留返啲氣力離開公園呀~     前往方法： 文中都有提及摩士公園位於樂富與黃大仙中間，如果搭港鐵嘅話兩個站都去得到。 而喺正摩士公園門口落車嘅巴士有: 1/ 11K/ 113/ 7   近摩士公園泳池落嘅巴士： 2F, 3C, 258D, 259D, 268C, 269C, 38, 40, 42C, 89, 80, 89B, 61X, 74A, 75X, 84M  *不過落車都需要步行大約5分鐘，但相對比黃大仙港鐵站行過去會近咗少少腳程。   -------------------------------------------------- 歡迎聯絡我&和牛B: chungying56@hotmail.com Facebook專頁: 和牛B嘅成長專頁 Instagram: wagyubmami                -------------------------------------------------- 姊妹合作**Precious M accessories** 利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。