孖吉依家已經10個月啦，等我分享下當初為左「加固」依個大Project準備左d乜， 以及用左一段時間後覺得邊樣先最方便媽媽烹調同幫助寶寶建立良好飲食習慣～～   ＊＊＊強調以下加固用品的好與壞只屬個人感想，不代表各媽媽及用家意見＊＊＊   １）Combi Baby Tableware step 1（必買心水❤️❤️) - 包括1個bb碗，3隻小碟，2隻匙更及1隻叉 ⇒ 用後感想：多數都用bb碗裝粥同糊仔，都會用埋2隻匙更協助；反而個3隻小碟比較少用，因為一放野上去，孖吉就會幫我掃林晒；隻叉係吉唔到d食物度，所以俾孖吉當牙膠係度咬。同埋當寶寶越大個，所需要固體嘅份量相對要增加，所以隻小碗又未必夠放咁多材料嘅粥仔，所以我認為買依隻牌子嘅Step 2會著數d。   ２）7-in1 Baby Food Professor Set (必買心水❤️❤️❤️❤️) - 包括食物過濾器、食物隔板、榨汁器、碟、匙更、研缽同研杵 ⇒ 用後感想：很好用，用得最多係過濾器同研缽研杵。蒸熟d生果或瓜類後放上過濾器再用研杵，就會變成適合孖吉入口嘅糊狀。食物隔板更可以將最難攪嘅粟米攪成粟米蓉。   ３）Philips Avent Blender (必買心水❤️) - 可以同時使用電動攪拌器及蒸煮食物，唔駛分開整 ⇒ 用後感想：好處係個攪拌器係好方便清洗，唔好處係要放大量既食物先可以攪拌到，如果分量少會攪得不夠均勻而且仲係好大粒，要整成糊狀就未必做到。蒸煮器對我依個老餅黎講好難控制火候，好多時都唔夠熟又要蒸多幾次，時間比用明火更耐   4）Richell 學習杯 (必買心水❤️❤️❤️❤️) - 1套有3個階段，有5個月用嘅鴨咀式；7個月用嘅飲管式同8個月用嘅直飲式 ⇒ 用後感想：我覺得Richell嘅學習杯幾好用，因為佢做到防漏嘅效果，而且孖吉好快就上到手拎住旁邊嘅耳仔自己拎住飲。但唯一唔好嘅就係5個月嘅鴨咀式對孖吉黎講太難啜，佢又唔識得45度傾斜黎飲，所以佢啜唔到會發忟憎，後尾佢5個月時就直接用7個月嘅飲管式，佢飲得好好，變得好鐘意飲水，所以其實5個月嘅鴨咀式可以直接skip不買。   5）手拉式小型剁肉碎菜器 from 淘寶 (必買心水❤️❤️❤️❤️❤️) ⇒ 用後感想：非常好用，拍得住大型攪拌機，佢唔駛插電，又易洗，又冇攪拌機咁嘈。放d食物落去再手動拉幾下就會攪成肉碎或粒狀，開始適合要進食粒狀或有口感嘅寶寶來訓練寶寶嘅口腔肌肉 (約7-8個月)。但係比較硬嘅食材，例如熟嘅豬肉就需要先切粒，再用力手拉多幾下先攪成肉碎。 淘寶link：多功能绞肉机家用手动绞菜绞馅料理机手拉式小型手摇打鱼虾碎菜机   ６）BB電飯煲（必買心水❤️❤️❤️) ⇒ 用後感想：好用，因為原本我用大人飯煲煮粥仔俾孖吉食，但好難預水份所以攪到一時好悕一時又好杰，又要成個鐘先煲好粥。依家轉用依隻電飯煲後，自動set左時間40分鐘開始，煲出黎份量好充足，又易洗唔怕煲瀉。   ７）嬰兒咀嚼訓練器（必買心水❤️) - 放生果入去網袋，然後合上，寶寶就唔怕哽親，又可以享受食物嘅味道 ⇒ 用後感想：我用左一兩次就放棄左佢啦～可能孖吉個人為食同猴擒，啜果汁滿足唔到佢，佢要有實物放入口，所以我之後就咁俾生果佢食，佢非常enjoy，但就要睇實佢因容易哽到。而且洗個網袋個時覺得洗極都好似唔夠乾淨，然後又再放野上去俾佢食，感覺不太衛生。   ８）嬰兒食物剪刀（必買心水❤️❤️❤️❤️) ⇒ 用後感想：要買一把可以剪得開麵條嘅剪刀，因為好多時一d品牌為左安全連基本嘅野都剪唔開。而且要易拆易洗，又要有保護套，方便攜帶。   ►►►當然以上係我本人主觀覺得好用或一般嘅加固用具，主要都係用家（即寶寶們）嘅反應，同埋最緊要方唔方便照顧者所用，夾到自己寶寶但又未必岩其他人用。所以每個媽媽都會經歷下一d雷品先會知道咩先最岩寶寶同自己～～各位媽媽加油～～     Email: qqyanyan@gmail.com IG Follow: qq_chinchilla 專頁: 孖吉的成長日誌 腳印: MamiBuy Esdlife Ohpama