副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

當年今日//穿水見紅、產房、產後醫院花絮

7月,哥哥細細邁向一歲啦!猶記起一年前,一個驚險嘅上午,代表住新手媽媽非人生活嘅展開。

7月,哥哥細細邁向一歲啦!猶記起一年前,一個驚險嘅上午,代表住新手媽媽非人生活嘅展開。 預定開刀日係8月頭,哥哥細細心急出黎見爸爸媽媽,早過原定計劃的一星期前出世。 回想當日早上,成個過程好似拍戲咁驚險。 當日,本身安排左產檢。同平時一樣,半夜5點腰骨痛責醒,諗住去完小便再瞓過,順便留埋小便產檢用。留小便嘅時候發覺控制唔到下陰肌肉,一路巴巴聲流,心諗:真係好急喎!(其實哥哥細細已經準備出黎同大家say hi) 未知哥哥細細俾緊訊號我,玩一陣手機再瞓過。發夢自己又去小便,同一時間,自己條褲濕~嘅~有野湧緊出黎,感覺好真實。醒左衝去廁所,原來已經見紅同時穿水。 大叫爸爸,佢叫我瞓係床唔好旭。我係好驚成身震晒嘅情況下,仲好理性咁叫爸爸攞毛巾墊住,唔好整污糟張床。早上7點半繁忙時間冇的士,爸爸call白車。自己就攞衫換、攞手袋仔。救護員黎到,我自己落床,上擔架床。 因為將軍澳醫院冇產房,但call左白車又一定要去就近嘅醫院,所以先去將軍澳檢查,再去聯合醫院接生。 檢查照到兩隻BBs頭仔都向上,一定要開刀。好彩醫生臨床經驗知道開得少,個心都定啲。白車司機仲緊張過我,佢話:冇設備下接生孖胎,佢係束手無策。所以,我接受檢查嘅同時,白車幾位救護員叔叔已經計劃路程,stand by好隨時開車。朝早繁忙時間塞車,要改行山路。瞓係床上面,只係聽到司機一停燈位就:唉!~而我就諗埋啲無聊野,例如:早知唔換白色衫啦!整污糟曬! 托賴有驚無險,安排緊急開刀,過程亦順利。花絮包括:   救護員專登返黎睇下我,好有愛喔!  護士姐姐要我剪指甲,可以幫助分散注意力  要除手飾,千叮萬囑護士姐姐叫爸爸袋隱佛繩,保平安  原來開刀半身落麻醉唔痛  聽到BB喊聲,不期然會感動喊起來  心諗細佬仔都要加油。哥哥細細出世,前後只要2分鐘  手術室好凍,成身震。聽到好多個醫護人員數1、2、3、4、5,數左5次  抱BBs埋黎,心諗終於見到你地啦,兩隻醜怪豬  一個鐘觀察,瞓唔著望住個鐘,想快啲見BB  走佬帶左2包90NB片,原來個個孕婦買細包裝,我買大包,仲過份到X2。產房孕婦嘅locker細細,要護理員幫我看管住。於是乎。。。每個check point 嘅姨姨都認得我: 哦~兩包大片個個呀!  出手術室,哥哥細細住箱仔,爸爸影左相俾我睇  番到病房太興奮,一直收相send相,公怖好消息(事實上興奮左好一段時間,4日係醫院餵夜奶,仍然好抗奮)  第一日要落床去廁所,龜速一路行一路望行得走得嘅順產媽媽  病房全部係食全餐媽媽,我已經係最感恩  廁所係走廊尾,行到去傷口已經痛到一個點。點知暖水水龍頭亦係最尾個個。行到去,不如用凍水  姑娘時不時提你參加母乳工作坊,行到去已經開始左一陣。坐低難,起身仲難。點餵都餵唔到,抱住細細中眼瞓  宮縮痛,較起張床,準備轉身落床小便個下,用30分鐘。俾姑娘嚇去唔到小便插尿喉仲痛。全間病房都係開刀媽媽,集體攞止痛藥,每次食2粒  床尾係射燈,病房係人奶媽,個個累到用腳推BB床  病房旁係護士站,部分時間集合晒所有BB沖涼、休息,咁多個BB一齊喊,聽落似狗仔叫  第一次用奶樽,兩個人一組,對面個個係二胎媽,熟手過我,好快走得。我掃極風都掃唔到,助產士話大力啲BB唔會痛  第一次換片,貼好但兩邊有大洞  成日俾姑娘提餵奶前洗手,我只係唔想行去洗  我自己已經久唔久搓肚,但暗牙底錫自己輕力搓冇咁痛。誰不知姑娘用盡全身嘅力按落去子宮,用心良苦喔!  床兩邊都放BB床,餵完細細,餵哥哥。未餵完一個,第二個就喊,姑娘好心幫我餵  哥哥聯合細細同媽媽玩考記憶遊戲。哥哥四小時食一次,30ml起,每日加15ml,加到120ml滿月。細細三小時食一次,25ml起,每日加5ml,加到90ml滿月。  相同嘅,就係2個都鐘意餐前餐後,沖涼前後排泄,唔駛記得買左幾多尿片,盡買!到而家都係長備10幾包片,但周不時一下子用晒  出院日期唔同,一星期輪流去四次健康院。每次返健康院都遇到隔離床嘅姨姨,仲要逃避健康院四角嘅電風扇 一年話長唔長,話短唔短。所有野都記憶猶新,關關難過關關過。未來接著有更多挑戰,希望大細健健康康,做2隻開心BBs   #新手媽媽歡迎俾意見 #交流嘅好處 fb.              哥哥細細 //小眼睛s看世界 ig.              cannyahn