副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

文一媽~瑪麗產後記(中篇)之照結構醫生嚴重失誤導致產後抑鬱

標題好似有點長~(笑)其實產後至第二日既記憶有點朦朧因為太累,可能會有少少miss左,但都係長篇希望你地可以睇下即使出名多人推薦既婦科醫生都係會有嚴重失誤我就係活生生既例子(唔都連個天都唔鍾意我)上回

標題好似有點長~(笑) 其實產後至第二日既記憶有點朦朧 因為太累,可能會有少少miss左,但都係長篇 希望你地可以睇下 即使出名多人推薦既婦科醫生都係會有嚴重失誤 我就係活生生既例子(唔都連個天都唔鍾意我)   上回講到經歷左27小時既陣痛 終於生左文一一出黎 但果陣由於我痛到全日都無胃口食野(甘都夠力生) 又chur笑氣chur得太勁 生完一放鬆,我係wing wing地 朦朧間聽到姑娘話BB度唔到體 但又見轉頭又比個BB我,擺係我心口 果下以為無事 伏係我身上其實好驚,因為真係好~細~粒~ 我完全唔敢郁,望住佢開左眼,手仔輕微甘郁 好感動,我得左啦,非常怕痛既我竟然能夠順產到(拍手) 叫老公幫我同BB影相 但好似無影到我地三個合照   突然望望下發現~ 佢一邊手係有6隻手指   30分鐘之後,BB就俾姑娘帶走左 我都被推落去產後房 果陣真係好眼訓,用盡全力 老公幫我擺好D袋就走左 我都即刻沉睡左   果陣的仲未知發生咩事~~~   之後半夜比隔離醒去廁所 果下都依然無為意點解BB無放係我身邊 加上又累又痛 又係再訓 直到第二日(27/1) 9點幾醒左 就諗住行出去搵BB 好多BB擺係姑娘center附近 但搵黎搵去都搵唔到 之後問姑娘可以係邊到睇BB 當佢check返就話bb 係上面10樓既NICU(新生嬰兒深切治療部) 果下都唔知邊到黎 就痛住甘上去,由於果陣唔係探病時間 本來唔入得,但我話生完就無見過佢,所以就比我入去睇一陣 終於可以好清楚甘望到佢 即刻影相sned比老公 中途姑娘問我知唔知BB咩事 照結構果陣知唔知?係瑪麗照定出去照? 我話出去照,照結構果陣醫生完全無講有問題,咩都話好健康 佢話甘一係你等一陣兒科醫生巡房,等佢詳細D同你解釋 我果下已經心知不妙~~   發現照結構醫生嚴重失誤 等左好十幾分鐘左右,兒科醫生就到 首先確認我身份,再問返姑娘問既問題 佢再話一樣都check唔到?因為初部check都幾多問題 之後就開始數比我聽有咩位置發現有問題同大約咩問題 (果陣係未知係各部分係大問題定小問題) 包括:心臟、肺、手指、耳仔、脊骨等等......(我都唔想再講落去) (P.S: Lucky,而家全部暫時都唔大影響,要將來幾歲開始先知道個影響性) 再講有個部位黎緊排期會幫佢做手術~~ 詳細等下午外科醫生巡房時同我講 What??? 我果下呆左係到,完全O哂嘴,個腦空白左 完全唔知發生咩事,眼淚開始想湧出黎 但見BB係到,唔喊得~ 之後都唔記得仲講左D咩 我睇左多一陣就出返去 一出NICU,即刻打比老公爆喊 佢聽完我講之後都呆一呆 但我喊到痴左線,佢第一時間都係安慰我先,話而家就過黎 收線我就喊住返病房 姑娘知道我返左黎,就黎的坐位搵我 佢地應該remark左我BB 係NICU同大約狀況 所以非常膽心我既情緒問題   導致產後抑鬱 其實真係點解可以一樣都Check唔到? 該私家婦產科醫生仲要係照結構方面出名 點解都可以甘?果陣照完仲同我講話好健康,樣樣都無問題 你知唔知尼個情天霹靂對我既傷害有幾大.... 作為媽媽,小朋友普通發燒都已經好心痛...更何況甘   由於我生完第三日早上前開始乳線炎發燒 (原因點解我住左甘多日) 仲要未上奶,個胸變左警鐘甘 仲有加拿大位又腫又痛先攞命.... 其實因為要繼續住院先係令我抑鬱狀況加劇既成因 BB因為係NICU,每晚旁邊床位都係有媽媽同BB 即使我食藥會累會訓 每個晚上都聽到其他BB喊,比佢地喊聲嘈醒 每次醒發現自己BB竟然唔係自己身邊 (都係比BB嘈醒,但唔係比自己BB) 當下真係每晚以淚洗臉 又發住燒又抑鬱....真係好辛苦 之後我媽,哥哥們,呀嫂黎探我,只要講錯一句說話 我已經會破口大罵,情緒係根本控制唔到 繼續喊喊喊.....悲傷無限放大   做手術前一晚,我其實都唔係好訓到(一黎BB喊聲) 好早就醒,幸好老公請假黎陪我 雖然對醫生黎講唔係一件大手術(大約定兩個鐘好似) 但對媽媽我黎講,幾細既手術都係大手術  (嬰兒做任何大小手術都需要全身麻醉)   等待既期間係最痛苦.....好~漫~長~ 當然手術非常成功,而家都康復得九九十十   但抑鬱都無因此而停止,因為佢比我住多左一星期醫院 我出院返到屋企,係覺得好奇怪~~ 點解? 自己一個望住BB床,個大肚消失左 但BB卻不在,果種空虛感,又開始蠶食意志 直至BB可以比預定日子提早出院 趕得切係新年前返屋企 抑鬱病先開始慢慢減退   產後抑鬱半自救 其實我既產後抑鬱係半自救 有一半係多謝老公一直係我身邊 因為我情緒十分波動 在佢角度而言,同我同時出世後先知道既事實 除了穩定自己意志之外,仲要望住我發癲又要安撫我 內心一定要非常強大先得 而另一半就係靠 ”母乳” 發生之後我咩都幫唔到仔仔 唯一可以做既就係,當你手術後可以食返野 我可以原原不絕甘比世上最好最有抗體最有營養既媽媽奶你 等你經過尼一次之後,永遠都能夠健健康康 即使係我坐月期間,堅持每日隔3個鐘泵一次奶 每日坐1.5知鐘車程先到醫院(來回3個鐘==) 手中拎住6-8支奶(加冰袋) 為的是令你能夠盡快康復出院(做到了....Yeah) 但坐月期間甘樣真係好辛苦...   另外想多謝奶奶同媽媽 由於我無請陪月同月子餐 另外加上我早產,媽媽請大假既日子完全錯開 所以要犧牲品佢地既睡眠同休息時間黎幫我坐月 不過基本上我好似無坐到月(因為日日去醫院)   除了家人,我仲想多謝一位媽媽 我地完全不認識 只係剛好我係母乳 whatsapp Group問有關帶奶到醫院既問題 佢竟然私下whatsapp我 以佢比我更慘既經歷去安慰我支持我 而我係當下真係得到安慰 (亦都係點解我會打尼篇既原因,希望可以帶比其他係困境中既媽媽少少支持) (始終家人唔希望我公開仔仔問題,所以我都唔特別詳細講)   請大家不要睇少抑鬱 唔係岩岩生完果陣先會發生 即使BB長大3個月6個月1歲2歲等... 小朋友愈大就愈難湊 自己不能對佢發脾氣,就只能屈埋屈埋 如果無適當既途徑或向人傾訴發洩..... 久而久之,只會日益嚴重 後果會不堪設想,最終受害者都只會係個小朋友   對我來說,由於我現在係全職媽媽 開始打Blog都係我其中的發洩途徑 點樣都要有個輸出既地方...... 同記錄文一一成長既小地方   下篇講下我個人上奶方法(佛系媽媽方法) ------------------------------------------------------------------------------------ ~~文一一的成長日記~~ Facebook Page: https://www.facebook.com/charlesmanmama/ Instagram: https://www.instagram.com/lai_hung_winnie/ 聯絡我們合作或試用產品: laihwong9@yahoo.com.hk