7月 2日零晨跟媽媽說聲「生日快樂」，再跟媽媽懷內的湯丸仔講：「你有無同媽媽講生日快樂嫁？」媽媽甜笑：「你唔好過期居留呀！」我完全陶碎同BB的世界：「你會唔會選擇今日出世嫁？送自己做生日禮物嫁？」「嗱～出世果陣， 爸爸會陪住你同媽媽嫁，你一直向上推向上推，就會見到好光好光嫁啦！」媽媽摸摸肚：「係咪呀BB？」如是者，梵高爸爸做了「滋養生命」的靜坐冥想，就睡了。 大約5時，廁所傳來聲音「爸爸，我好肚痛呀！又唔係大便！」但當時我太熟睡，再過15分鐘，媽媽坐喺馬桶上叫嚷：「爸爸，疊高幾張櫈俾我伏喺前面？」我朦朧望到媽媽捧著肚子的痛，即刻甦醒：「你應該生得喇！」然後隨手拎起紙筆紀綠陣痛時間，每5分鐘陣痛一次，每次痛1-2分鐘，之後更頻密，但無見紅，亦無穿羊水。但痛到不得了！火速把握未陣痛的一刻，幫媽媽著好大肚衫、胸圍、外套、長褲、襪  正當快拎走佬袋走佬，落樓搭的士嘅moment，頂！又陣痛，媽媽已經痛到行唔到。大家已預備好一切，無事前唸到咁緊張。Call 999時已冷靜講：「我要Call白車，太太懷孕39周，強烈陣痛要生BB喇！地址係… 幾耐到？」5分鐘救護員即到， 問大概情況，最重點：係咪第一胎？「得！預咗有排痛」救護車又快又安全，救護員對父母身份證：「依～太太今日生日喎！」 到屯門醫院急症室，即刻拎爸爸媽媽身份證同產檢覆診咭登記，直接打排版，推上A7產前病房，媽媽即做評估，發現已經開到4度！！（心唸！咁快！呀B真係叻仔，咁快就4度，媽媽快速KO）醫護人員即推媽媽入病房，爸爸就要醒水喇！拎哂媽媽除出嚟嘅衫褲鞋襪入走佬袋，我就用美贊臣媽媽袋，都夠裝，但我跌咗。。。1條bra帶  媽媽被推到D7產房，爸爸未能進入，產房打電話俾爸爸先可以入去，所以要，帶足幾個尿袋，電話隨時stand by叉足電。產房門口等呀等，等咗半個鐘。電話響即聽：「老公，原來我開2度咋！A7同D7的準則唔同。姑娘話正常一小時開1度，真係開到4度，先再打俾你。你食早餐先。」我老婆真係好好，就算生仔都咁細心。「媽媽，妳都未食野？妳食唔食得野嫁？」「唔緊要啦！」 兩個鐘之後，真係打嚟「老公，我開到4度啦！你可以嚟陪產」我即刻按鐘，隨即入去跟姑娘指示做：戴好紙浴帽、紫色長袍、拖鞋，貼好病人名的label，就入得去搵老婆喇！記得記得之前要去定洗手間。 見到老婆臥在床上，種了豆 ，另已見紅，樣子有點痛苦的樣子。而在她肚上，博上兩個圓貼﹣1個測BB心跳1個測媽媽宮縮情況。我不發一語，只是輕吻好額頭 ：「辛苦老婆！」只伸出左手，給她捉緊。爸爸不用口，只用心用耳聽媽媽的需要 「幫我叫姑娘」「姑娘，我好痛呀！我可唔可以選擇無痛分娩，或者打無痛針？」 「太太，你依家宮頸開得好好，開到5度啦！呢個情況我哋唔建議打無痛針，因為5小時後先發揮效果，但以目前進度，太太好有機會5小時生得。太太，妳還是選擇聞笑氣？」「我擔心聞笑氣對BB唔好。」適當的時候，媽媽未能做決定，爸爸就要出聲「咁我哋都唔選擇無痛分娩，唔打無痛針。」  助產士續說：「太太，我可以幫妳人手整穿羊水，加快產程，好嗎？」交代一些輕微的潛在風險，老婆就好勇：「好呀！」 呢一刻，我真心覺得老婆好型 ，選擇順產，咁痛但唔聞笑氣，亦無大叫，齋靠呼吸法冷靜自己。但爸爸記住，唔好擾亂媽媽呼吸節奏，總之，除非有事需要幫手， 否則唔該爸爸Shut Up 過一個鐘左右，媽媽開到8度 「老婆加油呀！呀仔你再向上D向上D，就好快見到爸爸媽媽」跟住，媽媽話「好屎急，唔得啦！叫姑娘。」 呢位助產士態度就好一般「太太，係咁嫁啦！係好屎急，因為壓住妳直腸呀嘛！妳明唔明呀？妳話妳屎急呀嘛！你痾啦，你痾出嚟啦。」呢一刻爸爸超不屑。「我哋第一次生呀嘛！點知係咪開到9度啫？我知都唔洗叫你嚟啦！」火速收皮。 屯門醫院其他助產士都好好的。等到下午兩點，未有起色，助產士好言勸我先食午飯。呢一刻，老婆點點頭，我就離開了。 放lunch心情挺輕鬆，因為一切來得順利，亦比預期快開到8度。但等了2-3小時，仲未收到產房打嚟，心開始有點著急。來回行7樓長廊N次，終於忍唔住，襟鐘問老婆情況。 如是者，我穿好衣物去到產房，老婆面色比之前蒼白：「老公，你走無耐我發燒！要打抗生素」「辛苦你啦！你無大大礙嗎？你需要食D野嗎？」當然內心想知，對胎兒有咩影響，但始終唔想影響老婆情緒。 此時，助產士來到：「胎兒心跳頭先低咗，情況不穩定，暫時回穩喇！」「對胎兒有副作用嗎？」「以我哋過往的經驗，胎兒無太大影響。」等了又等，等了半小時「你開到幾度？」「唔知呀！你走咗之後你驗」「姑娘，我太太宮頸開到幾度？」「上午驗咗好多次，唔方便再驗。」我無名火起「我太太有成3個鐘無驗喇！又咁虛弱，BB心跳drop左，點算？」之後某位較高級的助產士，憑經驗憑肉眼判斷，都係八度。 好，唯有等，已經唔知幾時，老婆陣痛加劇，隨即由1個慢慢增至4個助產士，亦多了2位男／女醫生介備。當時，佢哋用手指探測宮頸情況，已經係10度。（記住，先生請不要太介意醫生陰碰太太私處，只是專業人士的工作） 病床斜度調至60度，方便順產「太太，當你feel到痛時，好急好急想出大便時，捉實扶手，吸一大啖氣，然後閉氣。谷佢出嚟！」 嘗試10﹣15分鐘左右，由於陣痛太短促，所以未成功push到。而忽然間，又多了2位醫生，即是總共4位醫生4位助產士在場，心未知不妙，但我心唸，咩事咁大陣象呀？ 然後「太太你試吓叭喺度生？」但記住，佢左手種了豆，所以要好小心扶住佢，幫手調整枕頭位置，但經過一輪工夫，都係唔成功。 結果，又轉姿勢「老婆，BB加油呀！」「太太，BB個頭仔就嚟出嚟喇！」下巴貼頸，雙手貼住手把，腿張開， 一鼓作氣。但幾次都未成功，醫生亦好motivate。過一陣，醫生有擔心的樣子：「要剪會陰」老婆都好驚「可唔可以唔剪」雖則理智上係需要，但情感上要記得，佢無止痛針同聞笑氣。 此刻，醫生向我說「先生你出一出去， BB就出世再叫你入番產房。」走的一刻，其中一位女醫生即時遞同意書俾老婆簽名。 在產病門口等候，約半小時，有位姐姐推了氧氣箱車，入面有個BB，我直覺覺得係湯丸仔。5分鐘後，收到產房電話，即刻聽：「老公，我生咗啦！」「老婆，辛苦你啦！我愛你。」「BB重3.27kg，有同我skin-on-skin，但因為我打咗抗生素，所以唔可以即刻俾BB啜nipples。」「唔怕，你休息一下先，唔好擔心太多。」「都係我唔好啦！個仔依家要推去兒童病房， 要打抗生素。喺D6病房，同埋你要睇個仔個頭，因為頭太大，要用鉗鉗出嚟，擔心會有紅印，有破相。」「唔會，之前講座講咗2~3日都退。我陣間探完你，餵完你食野，先再睇BB啦！」  去到D6病房，門前對講機講BB媽咪名、我的身份、探房原因等。熄電話，洗手搵BB。呢個感覺好fantasy，本來我想像中的畫面是BB喺媽媽產道出來，聽佢初啼哭聲，幫BB剪臍帶。但無expect到，係會喺病房見第一眼，係喺某病房眾BB床搵仔。BB睡著，但不能碰他，只隔著氧氧箱，影一張相，望了一眼，但說不出的感覺。