副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

【BB也歎SPA】嬰兒下水禮初體驗

近年流行Baby Spa,未有BB時見啲BB突個頭出嚟係咁踢水已經覺得好得意,而家機會嚟啦!Aster平時沖涼都好鍾意玩水、 踢水,所以一早決定咗等佢「大啲」 就帶佢嚟玩水! 就近揀咗屋企附近嘅Bab

近年流行Baby Spa,未有BB時見啲BB突個頭出嚟係咁踢水已經覺得好得意,而家機會嚟啦!Aster平時沖涼都好鍾意玩水、 踢水,所以一早決定咗等佢「大啲」 就帶佢嚟玩水!   就近揀咗屋企附近嘅Baby Spa,同BB去玩,返屋企方便好緊要!其實Baby Spa真心唔平,今次試玩價都要$368游水+按摩(平日$298),但係咁細嘅BB又真係唔適合去公眾泳池呀,所以都可以接受嘅。   Baby Spa/游水可以讓BB進行大肌肉運動,促進肺活量、血液循環同增高都有幫助㗎! 運動仲可以刺激大腦皮層神經,促進大腦發育,仲培養到BB適應能力同反應協調。不過要留意,游水前一個鐘要餵好奶,BB唔可以太餓或者太飽,保障BB嘅健康同安全。   今次去嘅Baby Spa喺商塲角落位,小小一個鋪位,但係去到門口,已經見到「泊滿車」。 入面有3個獨立小水池,同1個可以容納4個BB一齊游水嘅大池,乾淨度都ok。不過由於BB會除衫,所以Baby Spa入面唔會開大冷氣,怕熱嘅家長最好自備風扇仔喇!   落水前Baby Spa姨姨會先同BB做下伸展運動,好似同佢玩咁,等佢哋熟習下環境無咁緊張。Aster暫時仲未怕生保,姨姨同佢按晒手、腳、身、背脊,睇下佢心情幾靚,幾咁期待,跟住麻媽揀埋個水泡,Aster就換埋泳褲仔,然後可以落水啦!    今次試咗細池先,仲有迷你水泡同沖涼玩具陪佢,啱啱落水真係會唔知發生咩事,不過Aster好快已經fing手fing腳,係咁自轉,仲好勁咁識踢牆反彈,真係識玩!通常Baby Spa都可以游15分鐘以上,最多唔過30分鐘,Aster第一次竟然游咗29分鐘!! 分享一下Aster嘅美妙泳姿(Click圖)   之後洗埋個靚頭沖埋涼就上水着返衫啦。 第一次游完水之後,Aster竟然攬住Baby Spa姨姨唔肯返爸爸度,爸爸表示。。。而且的確同其他爸爸麻媽分享一樣,跟住好易氹瞓覺,仲有嗰晚真係好好瞓,哈哈! 是次小分享完畢,有興趣可按 麵語錄食玩遊記 by Aminn 或 C家重地 其他分享 :)   Aminn | Beauty.Food.Fun.Travel.Trendy|    麵語錄食玩遊記 by Aminn (Lifestyle) www.facebook.com/m.for.aminn / www.instagram.com/starzaminn    C家重地 (Parenting) www.facebook.com/sy.lam.family   任何合作請接洽:aminn613@gmail.com