副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

【簡易夏日消暑湯水】奶媽恩物。清甜勝瓜煮蜆湯

大熱天時又真係唔太想煲老火湯,但又想屋企人有啖清甜湯水飲,點攪好呢?喺唔知煮咩好嘅情況下遊走下街市都好嘅,仲俾我見到又大又好肉嘅新鮮蜆添!買來蒜蓉豆豉炒就夠晒惹味,不過今次我就揀咗用來滾瓜湯。今晚一於

大熱天時又真係唔太想煲老火湯,但又想屋企人有啖清甜湯水飲,點攪好呢?   喺唔知煮咩好嘅情況下遊走下街市都好嘅,仲俾我見到又大又好肉嘅新鮮蜆添! 買來蒜蓉豆豉炒就夠晒惹味,不過今次我就揀咗用來滾瓜湯。 今晚一於整個清甜又消暑嘅勝瓜蜆湯啦!   勝瓜嘅好處 勝瓜亦即係絲瓜,最啱就係夏天食用,既可消暑解熱、化痰止咳又可以疏通經絡,而且仲有美顏嘅作用添架,所以我同小JM都好喜歡食。 同時勝瓜亦係一眾女性及母乳媽媽嘅恩物之一,因為勝瓜對產後乳汁不通、預防乳腺增生及月經不調都有一定幫助架。 當然,孕媽媽及體虛易肚瀉人士就要少食啦!   材料: 勝瓜 一條 蜆 一斤 蝦乾 適量 薑絲 適量   做法: 1.) 先將勝瓜洗淨,再刨去皮及以滾刀切成三角形狀,備用。 2.) 將蝦乾浸至軟身及洗淨已吐沙嘅蜆,備用。 3.) 預熱小鍋並加油,再爆香薑絲。   再加入蝦乾稍為爆香。 4.) 將勝瓜加入蝦乾及薑絲之中,並注入三份二煲水。 5.) 水滾後可加入蜆。 6.) 煮至蜆打開即成,並按個人喜好加入鹽作調味。   其實除咗當湯飲之外亦可以加入粉麵或粉絲一齊食,會更滋味添架! 整湯飯亦得,真係一湯幾食無難度。     小提示: - 為方便拎嘅關係,街市姨姨都會幫你將條勝瓜一分為二,等你唔駛拎得咁辛苦嘅,   如果想保留原條就可以同姨姨講聲喔 - 蜆可以用鹽/生粉加水浸一小時,以便吐清雜質及沙石