自孖吉一歲後，就開始病多左，繼7月頭發高燒(最高40.1度)後，2星期後就再一次發燒(大約38.6度)。   今次估計係因為婆婆帶左孖吉去大澳玩，婆婆份人好「好客」，見個孫可愛就任人抱，所以可能經其他人交叉感染，病徵係發燒、嘔同呼吸困難。 去完大澳返黎個晚，就發現孖吉訓覺時發出好大聲嘅鼻塞聲，同埋用口呼吸，第二朝開始發燒，就算食左退燒藥都冇退，而且食奶會嘔，食固體又冇胃口，全日都好忟憎。 之後孖吉爸帶左孖吉去私家睇症，當時醫生診症後寫紙認為要即時帶孖吉去急症，當時我仲係辦公室，知道後擔心度喊左出黎，就即刻去ＱＥ會合孖吉爸。   去到ＱＥ急症室，經分流後好快見到急症室醫生，醫生亦都建議要入院觀察，之後就去照肺部ＸＲＡＹ。 隔左一陣就安排上Ｂ９嘅兒科病房。循例度高磅重，孖吉一個月前係9KG, 今次度都係一樣，病左２次瘦左好多之後就安排入檢查室抽血化驗。原來父母唔可以陪伴要係外面等，我地都聽到孖吉喊得好厲害，姑娘都話孖吉好大力 探病時間係下午4-8點，除左依段時間只可以得一個家屬陪伴，咁果一晚就由孖吉爸爸頂夜更。孖吉爸話跟本就無可能訓到覺，因為隔離床嘅BB要聞氣，部儀器會好嘈好大聲，二黎姑娘每隔二個鐘就黎問孩子情況，所以孖吉爸訓唔到覺 (幸好都有張梳化床可以休息下)，孖吉係陌生環境下都算訓得唔錯。 第二日，孖吉退左燒，而且好有胃口食晒醫院安排嘅粥，又好好精神，所以我地決定問醫生可唔可以出院。醫生想孖吉留多一晚醫院，並解釋話由於孖吉係患上支氣管炎，發炎指數同白血球指數偏高，怕可能有病菌。如果我地要求出院，就要承受風險。如果出院就要我地每４個鐘量體溫，再有發燒就要入院或睇醫生啦～   最後我地決定簽字出院，因為返屋企佢有空間走動，家屬們又唔駛咁辛苦一個一個咁頂更，最重要係病房有大人小孩都咳嗽，我都唔想孖吉再俾人傳染。所以孖吉一共留左２４小時就出院啦～ 其實住院其間，孖吉都算係病房中最活躍個果，又唔駛食藥又唔駛聞氣，佢又自己突然退左燒。反而我對對面床一個11個月大嘅BB好難忘，因為佢係早產Ｂ，係25週就出左世，住左一年NICU。雖然佢爭孖吉一個月大，但係身體活躍度都係比較弱，我諗因為早產嬰肺部未發展良好，所以BB成日都要聞氣同埋嘔。作為母親嘅我真係好心痛，好希望BB可以健康成長，快Ｄ離開病房。另外都想感謝QE嘅醫護團隊，特別係兒科醫生姑娘同姐姐們，個個都好有愛心，並唔係想像中咁冷漠。   孖吉返到屋企又變回搗蛋嘅小朋友，而且再冇發燒啦。經過２次發高燒嘅經驗，父母們一定要冷靜面對，如果我地都驚慌，孩子們會更害怕。而且孩子們病嘅時候會鬧一點小脾氣，父母們要好好安撫佢地嘅情緒，多點擁抱孩子，等孩子得到溫暖。 孖吉呀，願你身體健康，病菌遠離你   ～～～～～～～～～～～～～～～～～～～～～～～～～～～～～～～～～～～～～～～～～～～～～ 合作可聯絡: qqyanyan@gmail.com IG Follow: qq_chinchilla 專頁: 孖吉的成長日誌 腳印: MamiBuy Esdlife Ohpama