副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

教育系列のPN Interview 有感!

 

不經不覺,沙律B已經19個月,又是時候考慮沙律B讀書嘅問題! 沙律爸媽係在職父母,只依賴一個姐姐湊沙律B,所以沙律媽一定會報PN班。   由於沙律爸媽對於本區嘅幼兒/稚園真係零知識,完全無從入手! 所以喺今年3/4月左右已經買左一本荷花出嘅預備班天書,準備做下功課。 HK$130/本,好多地方都買到,如果爸媽對於該區預備班零知識,都可以參考。 當然,坊間亦有好多其他參考書,買邊本,就取決於父母!   唔報PN班都唔知,原來香港嘅教育已經去到扭曲以及瘋癲嘅狀態! 身邊嘅過來人同我講,報學校係有 strategy 架,你要諗好長遠架。 首先,你要決定你小朋友將來想讀 IB 定 DSE [已講到中學升大學]! IB 函接外國嘅學校會容易啲,考本地就 DSE 啦![下刪一萬字] 如果已 target 左心儀嘅中學,你就要諗下邊一間小學可直升,或者可以升上心儀中學! 再推算落去,就要睇下間小學收邊幾間幼稚園啦!繼而再睇埋果啲幼稚園有無PN班! 宜家時代唔同左,係要咁玩架啦! 呢位過來人就係根據上述玩法,佢個仔兩年前已成功考入Imperial College London! 好老實,聽完覺得好癲,因為沙律媽媽當年仲係玩緊 Cert-Level 同 A-Level! 宜家呢個新玩法,真係知咩玩法!無言!   但點都好,沙律媽媽前前後後都幫沙律B報左8間PN,採取大包圍形式! 沙律媽媽呢區大部分都係私校,真心覺得好貴好貴,好L貴,仲要好多都係集團式。 但無計,沙律B 4月出世,如果報X世軍果啲屈機學校,係零機會! 不如慳番HK$20/HK$40 食個好啲嘅早餐  沙律媽媽報左8間,當中有4間都係同一個集團,有2間又係另一個集團! 都係8月中陸陸續續開始報!10月左右先開始 interview! 報名除左要俾HK$40報名費之外,要俾4個self stamped envelop,3-4張相左右! 仲要俾埋出世紙,同埋針卡! 宜家好多父母都係虎爸虎媽,都想小朋友入好啲嘅學校。 交表時,啲資料想更 presentable,就同小朋友去影樓影沙龍式學生相,幾百蚊幾張! 真係好L誇張!沙律媽媽無玩到咁癲,平常心對待,只係去X圖美就算數!   8月完曬所有報名工作,10月就開始進入 interview 時期!   A校: 5-Oct-2018 / 10:30am / 私校,集團式,全港有4間分校 Interview 封信無話面試當日要幾多人陪同,但多數都係父母上陣 到左,去reception 報到,reception 有兩位老師,一港人,一外藉,全英溝通 拎 form,即場填,basic 野,外加對學校之期望,同對小朋友之期望 準時入房interview,只可以一位家長陪同,每間房有3家人,外加2位老師 入到房,小朋友自由活動時間 [有好多玩具可玩] 幾分鐘之後,老師會one on one interview 家長,全英對答,5-8分鐘左右 問題: how you know our school? why choose our school? who's the main care taker for your kid? Any siblings? personality of your kid? your expectation ?  問完家長,同小朋友唱一首歌,睇小朋友反應 [唱左沙律B至愛之歌嘅其中一首] 唱完即叫小朋友收玩具,都係睇小朋友識唔識收 [平時PG都有教,所以沙律B係問題] 收完玩具,圍圈圈坐,有一位老師陪玩陪唱睇反應,有另一位老師從外圍觀察 不外乎都係唱有動作嘅歌,同埋玩泡泡機 pop the bubbles [近年大熱]  全程30分鐘,走果陣仲拎左個小禮物離開 [貴校 logo 嘅公仔一個]   B校: 5-Oct-2018 / 12:00am / 私校,集團式,全港有9間分校,本區已有4間 同A校 Interview 撞日期,In 完一間,急急腳走去另一間,一站之隔! B校交報名表當日已講左幾時 interview,指明要有2位家長陪同,又係父母上陣 B校交報名表當日已俾左張 form 家長填,我忘記了,所以要即場填,好樣衰! B校arrangement 唔夠A校完善,搞到好混亂!當安排入房時,先知係 group interview 每個房有2位家長陪同,即一家3口入房,每房有15-16家人 [即45-48人],再加3-4位老師 入到房,只有4張台,每台都逼到沙甸魚咁,又熱又焗! 一入房,即有2位外藉老師俾指令,其實就係coloring,同埋痴膠水! 整個氣氛都好麻麻,完全唔似 interview 囉! 兩位2位外藉老師行來行去睇下夠唔夠物資,另外仲有1-2位老師拎住排板左寫右寫 沙律爸爸即場話 [細細聲] : 妖,感覺好差,納粹黨咁! 呢個 coloring section 用左10分鐘左右,就轉去另一間房,story time section Story time section 只可以一位家長陪同,另一位要去聽 briefing Story time section 都係由2位外藉老師講英文故事,再配合玩具,睇小朋友反應 講左10分鐘,完左,就叫小朋友出去拎玩具,大約6-7份左右,但小朋友有15-16個 總括一個字: 亂! 全程都係30分鐘,呢30分鐘當中,我地都唔知自己做緊咩! 沙律媽媽試後感: 10月5日,第一日 interview ,已 in 左2間感覺完全唔一校! A校有 heart,完全唔hea,老師同家長有交流,同小朋友有互動,感覺良好! B校好亂,家長同老師零交流,同小朋友互動近乎零,人又多!好多家長都知自己做緊咩! Overall A校比B校有系統好多,舒服好多! 同埋沙律媽媽都好有信心沙律B會有A校 offer,因為沙律B當日表現良好! 基本上老師唱嘅歌,佢九成都識,老師講嘅指令,好多都做到,因為PG都有學。 同埋沙律B識分邊啲係老師 [上慣左PG],成日同人笑,離開又同人拜拜!   至於B校,機會5050,一來人多,二來唔知佢用咩準則,三來我張表格 hea 填! 但沙律B唔係完全無機會的,因為interview 時沙律B都好乖,尤其時story時間,好定! 唔知係未因為眼瞓所以定,定係其他小朋友太活躍,走來走去,不受控制,相比之下覺得定! Anyway,沙律媽媽一直都係用平常心對待,得就得,唔得就再睇埋其他!   結果,兩星期,收到 offer letter,A校同B校都收左沙律B,仲要係心儀嘅morning class! 但結果沙律媽媽報左B校,雖然 interview 當日感覺麻麻。 以下就係沙律媽媽選擇B校嘅原因: Location: B校近啲,同沙律屋企一站之隔,同埋有親戚住附近,B校再遠啲啲 校舍: B校較大,有窗!A校喺商場,校舍細,無窗 [好多媽媽都唔太鐘意,因為空氣唔流通] 升學: 兩間都可以直升K1,至於升小一,B校多數升直資/私校/港島津校 就係以上3個原因,沙律媽媽喺B校留左位! B校學費,我交完留位費都係係唔知幾多架,聽聞要HK$5100,12期,但番學番11個月! 至於A校,一收到 offer leter 已講明 HK$6390/月,11期,仲未包雜費! 以上兩間學校K1-K3都唔可以用學卷,真心貴,貴過讀大學 [學費]! 但無計,都係要讀!非常無奈。 BTW,好多學校已有PG可上,報PN時,都喺張表格見到 : 是否讀過本校親子班! 沙律媽媽都因為呢句說話而轉PG的!   C校: 12-Oct-2018 / 10:30am / 私校,集團式,同B校同一集團 本身都想去interview,但由於撞旅行日期,所以被逼取消 打左電話去改時間,講明可以出示機票,都唔俾改,咁就算數 D校: 29-Oct-2018 / 10:00am / 私校,集團式,同B,C校同一集團 E校: 03-Nov-2018 / 09:45am / 私校,集團式,全港有9間分校,本區已有4間 F校: 03-Nov-2018 / 11:00am / 私校,集團式,同E校同一集團 G校: 09-Nov-2018 / 09:45am / 私校,集團式,同B,C, D校同一集團 以上4間 [D-G] 都無去 interview,因為已有學校收左   其實報學校之前,沙律媽媽都 join 左好多媽媽谷,本區又有,名校區又有! 身邊亦有朋友嘅小朋友讀國際學校,又有讀傳統私校[九龍區]! 當中沙律媽媽都聽到唔少 ridiculous 嘅說法,唔知有幾成係真,但一定唔會空穴來風! [PN-K] 交針卡? 想睇下你邊間醫院出世咋嗎!父母連一出世都肯俾資源,俾學費都無問題啦! [PN-K] 交針卡都係想知你喺政府打針,定有資源[錢] 搵私定醫生打咋嗎! [PN-K] 面試前,學校啲姐姐/老師會話小朋友條褲著得唔好,幫佢整番好,乘機睇人地著咩牌子底衫 [K-P] 入九龍區私校小一,表格要填識咩樂器,但無鋼琴選項,一問之下,原來鋼琴default每一個都識 [K-P] 面試會問你點由屋企過嚟? 爸爸開車 [都 ok 啦],屋企司機開車 [加分]! [K-P] 平時邊個湊你架? 媽咪 [都 ok 啦]!媽咪+姐姐 [加分] ! 聽我太多,都不能盡錄,信不信由你! 總之,香港嘅教育就係一盤生意! 有資源的,當中包括錢同時間,父母自然會俾多啲機會俾小朋友。 有多資源嘅小朋友,自然會唔同啲! 又如PN,每間都唔同時間 interview,唔同時間出 offer letter,又要俾留位費! 其實好多家長都 look for 更好嘅野,當心儀學校未有 offer,一定會俾錢留位先。 因為都想小朋友有書讀,真心覺得可悲。   嬰兒用品系列︰ 如何選購嬰兒用品の消耗品篇! 如何選購嬰兒用品の奶樽奶咀與配件篇! 好物&癈物分享︰ 精明買物媽媽系列の嬰兒好物大分享 II 精明買物媽媽系列の嬰兒癈物大分享 I 精明買物媽媽系列の平靚正收納妙法! 精明買物媽媽系列の嬰兒好物大分享 I 旅行系列︰ 小腳板走天涯の18m布吉旅行應該帶啲咩?! 小腳板走天涯の如何選擇旅行地點,機票,酒店同其他事宜? 小腳板走天涯の10m台灣旅行應該帶啲咩! 自家製系列︰ 自家製系列の給寶寶最好的護理—自製天然健康湯水! 自家製系列の小兒天然止咳殺菌良方—燉紫洋蔥! 自家製系列の打一歲針前應該煲咩儲涼湯水?! 自家製系列の嬰兒都可以食嘅生日蛋糕—沙律B生日快樂! 其他忙碌日常︰ 加固系列の嬰兒可以食咩零食?! 健康系列の如何應付寶寶の便秘問題?! 暗藏細菌系列の選用沖涼玩具時要當心! 沙律媽媽的忙碌日常の湊B去街應該拎啲咩?! 純粹分享の在職媽媽補身恩物—老協珍熬雞精!!