副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

【懷胎40w3生產記】@QMH

【懷胎40w3生產記】

【懷胎40w3生產記】 由37週足月開始,就日夜期待b的降臨,38週頭仔落盤一大半,以為快啦,點知佢住係我個肚住得太舒服唔願出嚟,一直等到40週都無聲氣,搞到我心急如焚,驚留太耐胎盤會老化,佢會有危險,仲要遲遲未有催生期,成41週先有覆診期,擔心到癲。連瑜伽中心都要停我牌(過咗39週就盡量唔好出街)。 . 唯有日日逼老公陪我周圍行下,瘋狂散步,等阿b再落盤多啲,快啲出嚟。好彩,係40w1個日去完赤柱9行咗一個下午,夜晚食咗餐勁既,瞓瞓下就開始有d冤冤痛,似係輕微m痛,痛下唔痛下咁,但唔算密,咁就繼續瞓,第二日天光又冇乜嘢,相安無事過咗一日,夜晚八點食完晚飯就開始嚟料喇! . keep住5至10分鐘一次陣痛,開始有規律,但仲接受到,嘗試忍痛如常休息,到半夜都係典下典下,越嚟越痛,似強烈m痛,完全瞓唔着,再計時,變成5分鐘陣痛一次,每次痛足1分鐘,停下痛下停下,3am就準備入院,出門口前去個廁所發現見埋紅,確信行得!p.s.穿水、見紅、規律性陣痛,是但一樣先係作動嘅徵兆,先至可以入院,唔係太早入政府醫院都會頒你扯。 . 入咗院就開始駁機check住胎動阿b心跳,期間要熄電話,驚影響部機運作。之後都無咩可以做到,一直計住陣痛時間,等醫生巡房check宮頸,睇下有無開度數。基本上都唔會瞓到覺,幾經辛苦捱到朝早,醫生過嚟問咗幾句都無check到,可能覺得我仲未有耐就調咗我床位,咁我就坐下波仔先等宮頸開得快啲。跟住就係惡夢嘅開始,痛到不!得!之!了!3至4分鐘痛一次,每次維持1至分半鐘,即係話透啖大氣又再嚟過,子宮收縮嘅痛真喺非筆墨能形容,痛慢慢伸延至背脊,頂唔順,㩒鐘同姑娘講好痛,佢仲話未有急屎要賴既感覺都唔好亂㩒鐘,鐘係用嚟救命,真係密到2-3分鐘一次先走出嚟搵佢地,跟住求其比咗d香薰油我,貼左係我件衫到比我聞下,咁當然係無L用㗎啦,再過多陣我再同另一個姑娘講,佢提議我坐波同比咗部機我貼背脊,原理係類似釋放啲電流分散痛嘅注意力。 . 捱到中午十二點,當部機都已經幫唔到我嘅時候,我發哂癲又搵姑娘,9up話2,3分鐘痛一次喇!有急屎感覺喇!先至有助產士理我,過嚟幫我check宮頸,伸咗成隻手入產道了來了去,血流到一床都係,噢,原來已經開咗兩度半,差半度就入得產房,老公先可以陪產。個時個人已經虛脫,好攰好眼瞓但瞓唔到,每次陣痛停嗰半分鐘個人係會差啲pass out ,然後又痛醒,每下都全身顫抖,老公係隔離睇到都心痛眼濕濕,但咩都做唔到。 . 入到產房我即刻request打無痛,但原來想打都唔係即刻就有,要抽血驗血等報告,麻醉師得閒先可以打。擾擾攘攘又等咗粒幾兩粒鐘,差d拆咗人地張床,期間仲穿埋羊水,不停換床墊,有無賴屎賴尿我都唔識分了。打無痛嘅過程動魄驚心,我痛到不斷左右搖擺,但打無痛係要將麻醉藥刺入脊椎再放條細管入去,過程中係唔可以郁,唔係就會好危險,有機會癱瘓。加上我有脊椎側彎,仲難打,一路比人鬧唔好郁,我一路喊住講對唔住但我真喺控制唔到。完成後我個人就昏迷咗,5點左右起番身,已經開咗8度!thanks god!無痛真喺偉大發明,我諗減咗8成痛。之後過多2個鐘到就開到10度,呼氣!吸氣!幾經辛苦我終於成功屙到阿b出嚟喇!佢出到嚟個下好乾淨,一啲都唔醜樣,我表示很滿意流咗滴眼淚,感受一陀熱騰騰濕立立嘅嘢扒係我心口,成個人舒服哂,好滿足。 . (睇到呢度,係咪天真以為生完可以好似豬一樣好好咁坐月休息?少年你太年輕了,生完簡直係另一個惡夢嘅開端⋯⋯待續。) . Facebook: Mylittlesunson Instagram:littlesunson1120 Email:littlesunson1120@gmail.com