副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

生產系列の30分鐘生產過程+老公陪產的重要性!

上一次分享完生沙律B嘅price list,今次輪到生產過程! 沙律B係第一胎,其實都有少少驚,最驚食全餐 除左痛兩次之外,仲要勁貴,你都未話唔驚 未生之前,睇左好多生B大戰72小時,咩3日兩夜啲文 真心覺得睇左仲衰過唔睇,但好奇心作怪,一定會睇 今次沙律媽媽就同大家分享下30分鐘左右嘅生產過程 連醫生都話快靚正!! 倒帶20個月前,即2017年4月14日,即沙律B出世當日 當日懷孕周數35W3D,醫學上稱之未足月 [37W先叫足月] 當日更加係一連4日Easter Holiday 第一日 喺毫無準備之下,沙律B要出世啦!! 2017年4月14日,早上11:10 剛起身,食左個麥皮早餐,打算洗 BB 衫 再出去鋸扒,順便買埋尿片,一切已安排好曬 點知,一企起身,已感覺到有水快速流出 [有用護墊] 沙律爸爸當時喺廚房洗緊野 沙律媽媽大叫一聲﹕死啦...好似有好多野流出嚟呀! 九秒九後入左廁所,見到塊護墊有些少分泌同埋透明嘅水 其實果陣好驚,一來未足月,二來唔知要去私家定政府 於是,沙律爸爸建議打俾醫生問下 醫生叫我形容情況如何,沙律媽媽如實報導! 由於同醫生講左有白色分泌,醫生都懷疑未係真正穿水 因為穿水係無色無味!但醫生吩咐 monitor 住,有事再打俾佢 所以沙律媽媽當時換左塊新護墊就算數 點知,換完1分鐘又濕曬,於是打左俾沙律姨媽問 因為沙律姨媽已經係2個小孩之媽媽,可俾意見 沙律姨媽聽完描述,話情況似穿水,入院 check 下好啲! 所以沙律媽媽再打俾醫生,再講明情況,醫生話似穿水,要即入浸會   2017年4月14日,早上11:30 Call左的士,只係拎左個銀包,就同沙律爸爸去浸會 擔心去醫院途中穿水,沙律媽媽已用M巾代替護墊 但全程都無唔到有野流出!   2017年4月14日,中午12:10 到左浸會,見到醫生,即被安排去 check 下係未真穿水 老老實實,係有少少驚,因為沙律媽媽真心未ready 好彩當日係紅日,產房好吉,好多姑娘招呼我   2017年4月14日,中午12:30 入左個臨時房,醫生即檢查,成個過程都唔太痛,但好唔舒服 因為醫生會不停地用工具測試,最後證實已穿水,就再人工穿水 醫生話我子宮已經完全成熟,沙律B自己想早啲出世 人工穿水後,只感覺到有勁多水流出 自己又控制唔到,真係好唔好受 呢頭穿水,果頭已經有姑娘幫我種豆 再打抗生素,因為B鏈 report 未出,要打定抗生素 另一隻手又俾人抽緊血,因為份血報告係診所 所以要再抽血去驗,其實我有醫健通 由於當時好緊張,咩都唔記得曬,唯有再痛多次 一切搞掂之後,姑娘跟手幫我換埋衫就陪我入產房   2017年4月14日,下午1:30 已經入左產房,即刻吊支水,開始禁食 其實果刻我好想痾尿,由於羊水不斷流出,搞到我完全痾唔出 去到中期,姑娘幫我用個尿兜喺張床度痾左,感覺好差 因為第一次連尿都要人幫手,但要絕對相信佢地 因為醫護真係好專業的!   2017年4月14日,下午1:50 沙律媽媽瞓上床後,即有姑娘幫我駁儀器 一個 monitor BB心跳,一個 monitor 陣痛 再拎左兩個枕頭俾我,一個用腳夾住 一個放肚下邊/後背 [一定要側身瞓] 由於當時我開得兩指,完全唔覺得痛,但儀器 check 到有陣痛 所以我果陣狂 Whatsapp,數胎動,同埋同姑娘傾計 入左產房後,醫生又離開左一陣醫院,下晝3點左右回來 沙律爸爸回家執走佬袋,再通知家人買薑買醋,整炒米茶 一句講曬︰亂到九彩!   2017年4月14日,下午 2:30 每次姑娘走入房,都會幫沙律媽媽我 check 下開左幾多度 但由入院到下午2點幾依然兩指,有排玩 姑娘次次亦都會問有無痛 但真心唔太痛,好似輕微 M 痛,間唔時三角位有野彈下彈下 於是,姑娘就教沙律媽媽點聞笑氣 中間都好多笑位,嘻嘻哈哈,完全唔似生緊 B   2017年4月14日,下午3:30 依然開得果兩指,都係唔痛! 醫生打左電話入產房問,佢知道情況後就安排落收縮藥!   2017年4月14日,下午3:50 落完藥,沙律媽媽終於 feel 到陣痛密左,同埋痛左少少 姑娘話開多左一指,有三指,都係有排 喺果刻,沙律媽媽心即諗﹕早知開刀,唔使等咁耐! 其間醫生都有打電話問,姑娘話陣痛愈強,BB心跳會跟住 DROP 醫生叫姑娘唔好加快收縮藥,因為沙律B臍帶纏頸 [34W先發現] 如果再落重藥,加快子宮收縮,BB有機會有危險   2017年4月14日,下午4:20 醫生番到,入左產房,又幫沙律媽媽 check 左一輪 一切都正常,之後醫生就幫我填 from,其實入院果已一直填緊 去到下午4點幾,其實都已經幾痛下 但沙律媽媽依然有意識,同埋仲忍到,仲答到醫生問題     2017年4月14日,下午4:30 沙律爸爸都番到醫院,仲辦番入院手續,仲同我請有個窗口靚位 沙律爸爸之後一直陪住我,同埋沙律媽媽一路都痛緊 仲要愈來愈痛,係出曬冷汗果啲痛! 當時,沙律媽媽真係當個笑氣係救命神器,簡直同隻手一體化左!     2017年4月14日,下午5:30 喺4點半至5點半之外,係最痛嘅時段 但沙律媽媽都尚算忍到,同埋好彩有沙律爸爸喺身邊 雖然幫唔到沙律媽媽捱痛,但沙律媽媽心靈上得到安慰 因為,至少唔係一個人面對! 去到差不多5點左右,沙律媽媽不斷地話好急屎 講左呢句之後,成個產房嘅人都好開心! 佢地話當個胎愈低,就會壓到條腸,會產生便意 因為沙律媽媽當日未去大便,都好驚會痾埋出嚟,好驚尷尬 直到去到5點半左右,醫生話可以 ready 生啦 啲姑娘就開始架起我對腳,跟手拎走埋個笑氣! 果一刻,沙律媽媽想喊,因為個笑氣拎走左 我想拎番,姑娘話唔可以,因為聞太多會無力生!   2017年4月14日,下午5:45 醫生換曬袍,入左產房,開始幫沙律媽媽生B 當時仲有兩個姑娘幫手,同埋沙律爸爸都在場 醫生話,當子宮收縮時,閉氣10秒,跟住就痾個 B 出嚟 連做3次,之後休息一下再嚟過!   好彩當時有沙律爸爸在場,佢全程幫我數,同醫生姑娘配合得好好! 同埋沙律媽媽係一個好合作,好聽指示嘅孕媽,全程都配合佢地 開頭都幾簡單,但做左幾次,真係好難受,又勁累,好想放棄 但放棄,即係食全餐,都係快快脆脆生完就算啦! 於是,沙律媽媽頂上硬上,生左半個鐘左右,就生左沙律B出嚟 最後一次用力,姑娘有幫手推肚! 沙律B即將出世果一刻,沙律媽媽 feel 到醫生打左支針 跟手就聽到佢幫我剪左,咁就生完!! 剪果下係無感覺架,一啲都唔痛,但事後另計!   2017年4月14日,下午6:13   御貨成功!!沙律B出世了!重4.9lb,全場最細粒!                沙律B出世之後,醫生剪完臍帶,姑娘清理完就俾我地抱 果刻好爽,但好累好開心! 醫生再幫沙律媽媽生埋個胎盤 [又係無感覺] 跟手又打多支針,之後聯針,就搞掂左,超快! **醫生同姑娘都好專業,聯針後真係會數下用左幾多野 要同醫生對數,工具都對埋有幾多! 沙律媽媽見搞掂曬,就即小睡片刻 [其實昏迷左.....] 其他人就開始清場,忽然又有個姑娘走過來 喺盤骨位置打左支子宮收縮針,再教沙律媽媽按摩子宮! 生完喺下腹位置會摸到一粒波形物體 姑娘話要搓散佢,但搓嘅過程好痛好痛!   Conclusion: 整個生產過程快靚正!醫生姑娘都讚沙律媽媽叻! 沙律媽媽好得戚咁講:我琴晚先做完yoga架! BTW,浸會俾我嘅感覺好良好,無論醫生定姑娘 同埋,好彩有沙律爸爸在身邊,原來係一種精神支柱!   嬰兒用品系列︰ 如何選購嬰兒用品の初嬰服飾篇! 如何選購嬰兒用品のSwaddle﹑包被﹑包巾﹑睡袋的重要性! 如何選購嬰兒用品の消耗品篇! 如何選購嬰兒用品の奶樽奶咀與配件篇! 好物&癈物分享︰ 精明買物媽媽系列の嬰幼兒好物分享 III 精明買物媽媽系列の嬰幼兒癈物分享 II 精明買物媽媽系列の嬰兒好物大分享 II 精明買物媽媽系列の嬰兒癈物大分享 I 精明買物媽媽系列の平靚正收納妙法! 精明買物媽媽系列の嬰兒好物大分享 I 旅行系列︰ 小腳板走天涯の18m布吉旅行應該帶啲咩?! 小腳板走天涯の如何選擇旅行地點,機票,酒店同其他事宜? 小腳板走天涯の10m台灣旅行應該帶啲咩! 自家製系列︰ 自家製系列の給寶寶最好的護理—自製天然健康湯水! 自家製系列の小兒天然止咳殺菌良方—燉紫洋蔥! 自家製系列の打一歲針前應該煲咩儲涼湯水?! 自家製系列の嬰兒都可以食嘅生日蛋糕—沙律B生日快樂! 教育系列︰ 教育系列のPlaygroup 有感! 教育系列のPN Interview 有感! 生產系列︰ 生產系列の早產嬰私院收唔收?生產費用又有咩唔同?! 其他忙碌日常︰ 加固系列の嬰兒可以食咩零食?! 健康系列の如何應付寶寶の便秘問題?! 暗藏細菌系列の選用沖涼玩具時要當心! 沙律媽媽的忙碌日常の湊B去街應該拎啲咩?! 純粹分享の在職媽媽補身恩物—老協珍熬雞精!!