副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

【嬰兒黃膽症?可以避免嘅錯失!】

大肚嘅時候,淨係關心bb係肚中夠唔夠營養,每日諗要食啲咩嚟幫bb補充。從來無諗過出世之後會有咁多接二連三要面對嘅問題,每一關都有大佬要打。而啱出世頭個幾日,第一個要打嘅大佬就係「黃」,相信好多媽媽都唔陌生,十個bb九個都有,仲比呢樣嘢搞到一頭痕! . 首先要講解一下,有黃係因為體內膽紅素過高,bb肝臟太細未識處理,出世後頭三日好大機會有。 . 點解要特登出post講呢?因為真喺好火滾。話說近幾年政府醫院十分推崇餵哺母乳,尤其是我個間,不停有產前講座講母乳有幾好、每次去健康院覆診又會有姑娘考你識唔識。咁其實我都知係好既,亦有諗住餵,講真,有邊個阿媽會唔想比最好既嘢bb㗎姐?好,入正題,阿b一出世無耐,姑娘就埋嚟睇我有無奶,一嘢揸落我個胸同nipple到,用試管接住所謂嘅黃金初乳,正常係產後3日先上奶,神奇地我已經擠到少少,咁就比阿b食住先。 . 之後番到產房,因為阿b發燒佢係另一個病房,我唯有自己柄埋密密擠奶。咁我又唔知阿b要食幾多先夠飽,幾耐食一次又唔知,唯有有幾多比幾多。後來到第二日,姑娘先走嚟話阿b收水兼有少少黃,咁我緊係即刻問點先會退黃,佢話只要食得夠瞓得飽屙得足,自然就會好快退黃。咁我又再問點先為止夠,佢竟然答我餵人奶係無standard,餵得幾多得幾多。一尾叫我埋身餵,但個時阿b仲細唔識埋身,我只能夠默默地擠出嚟,姑娘仲話啱㗎喇啱㗎喇,其實根本唔夠佢食。隔離左右啲 b都有同樣問題,未上到奶嘅媽咪一早投哂降,話不如補奶粉,一聽到要補奶粉,啲姑娘即刻say no公式化咁拎張「食奶粉壞處」既表比媽咪睇,又話免疫力會差咗又容易發燒感冒之類,講到番唔到轉頭咁,總之就嚇到d媽咪話咁我再試下餵啦,唔補喇。結果d bb成晚呱呱喊、一路唔夠飽、一路退唔到黃。 . 到第三日,本應可以出院,先話阿b唔合格,黃指數超哂標,要留院照燈,焗住我都要留多晚定時泵奶比佢,每三個鐘準時泵好奶送上兒科,傷口劇痛兼無得瞓嘅日子就係由嗰一刻開始⋯呢個時候兒科同產科已有雙重標準,根據要食既「奶粉」量嚟叫你泵「人奶」,而產科依然係叫緊你埋身。之後個幾日因為呢個指數,我同老公阿b不斷進出醫院抽血照燈,來回青衣瑪麗真喺人都癲,最後阿b都係補咗一晚奶粉!(因為我無得出咗院又入番去) . 總結係,提倡人奶係好事,但我覺得真喺over咗,有d可能會發生嘅問題唔講出嚟,一尾唔比補粉,又唔講阿b需要食幾多,淨係強調埋身餵就得,完全無標準。搞到啲b黃最後要留院照燈,屋企住得遠無得供應人奶,到頭來個幾日咪又係要食奶粉,其實一早肯補就唔會出現黃呢個問題,出咗院上到奶想食番幾多人奶都得啦,起碼唔會攪到啲阿媽咁大壓力又擔心,阿b又唔會黃足咁多日先啦!真喺唔怪得啲阿媽會有產後抑鬱㗎⋯ . Facebook: Mylittlesunson Instagram:littlesunson1120 Email:littlesunson1120@gmail.com