副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

陀B驚險住院記之兩度流啡出血(下)(28-29 weeks)

29W0D

29W0D 出院後,在家休息,請咗一星期假 夜晚返娘家食飯,食完飯,正準備返屋企之際 媽咪發現我流血,我即刻入廁所睇   今次嚴重咗,流鮮血,唔係流啡 我保持冷靜,沖埋涼,call的士,媽咪陪我入院 另一方面,通知胡生,幫我返屋企執日用品   再到醫院急診室 同上次一樣,分流後,好快有醫生接見 問症、照超聲波,BB有心跳,無生命危險 但要留院觀察   然後到產房檢查,核對資料、問症、磅重、check BB心跳 姑娘整理好文件,我再到普通病房,辦理入院手續   5日4夜留院觀察 Day 1 當時已經係晚上8點多,已經過咗探病時間 去到病房門口,姑娘唔比胡生同媽咪入 只有我一個辦理入院手續   事隔一日,病房床位已經爆滿,病床加到出走廊 上到病房未有床,要等上手出咗院,姐姐執好床先安排到比我 姑娘叫我先驗小便,我換好衫就出去搵胡生同媽咪 胡生買咗乾糧同水比我,因為醫生要檢查 我好快就返入去,胡生同媽咪就離開   今次入院,開咗兩次鴨咀鉗check宮頸 第二次仲帶血,黏咗喺鉗到,超級痛 然後照超聲波、check宮頸長度 同上次一樣,胎水、心跳、臍帶、胎盤位置一切正常 又係唔知咩原因流血,醫生話因爲第二次出血 驚BB早產,有機會打強肺針,不過觀察下咩情況先   Day 2 每日6點姑娘都會準時開燈,幫全部孕媽媽量血壓同聽BB心跳 8點派早餐,8點半醫生巡房 食完早餐,左下腹突然好似上次咁,有少少經痛感覺 一郁就痛,但醫生話係啲韌帶扯住,唔需要擔心   之後姑娘駁胎心機聽BB心跳,駁咗一個鐘 駁駁下我都瞓著咗 醫院餐雖然健康,但唔好食 我每次只會食晒啲菜、少量肉同少量飯 生果就留返tea time食 全日卧床休息,但keep住流啡 為安全起見,醫生都唔比我出院   至於夜晚,瞓得超差,keep住有媽媽作動、叫、推入產房 姑娘不斷出出入入,就算帶咗ear plugs都聽到聲   Day 3 9點幾醫生巡房,我又keep住留啡 都知道無得走,只有卧床休息   今餐嘅lunch較豐富,粟米肉片、蕃薯糖水 lunch過後,玩玩下電話,姑娘通知我 終於上得私家病房啦 私家房環境好好多,靜啲、舒適啲 連啲飯餸都好味啲,超吸引 宵夜一包梳打餅 + 一包脫脂奶 但因為我唔飲奶,姐姐比多包餅我 上到私家房,兩個人一間房 夜晚瞓得好好,同房已生產媽媽雖然要起身泵奶 有少少聲,但帶咗ear plugs後都無阻我瞓覺 我仲瞓到兩邊ear plugs都甩晒,好瞓到呢   Day 4 私家房嘅精美早餐 9點醫生巡房,我已經連續12小時無再流啡流血 醫生問我想唔想出院,但我住到唔想走,比胡生話啋   如果我仲住喺普通房的話,一定會出院 但上咗私家房我寧願睇定啲先,免得出院後又再流啡流血入過院   另外,醫生建議我38週入院催生 因為29週兩次不明原因流啡出血,其實唔正常 有機會係胎盤邊出血,驚胎盤脫落,影響胎盤功能 BB會因為咁而缺氧,影響所有器官   但我超唔想催生,然後顧問醫生再巡房 佢話雖然搵唔到流啡流血嘅原因係件好事,但出現依啲情況都唔正常 可能係胎盤邊出血,但檢查時check唔到,所以建議催生 不過依家言之尚早,距離38週仲有一段時間 可以再睇定啲先   住院咁耐,都無抽過血,醫生又安排我抽血 10點幾抽完,3點幾有result,話我血色素低,就開咗鐵丸我食 姑娘亦keep check住我嘅血壓同聽BB心跳   lunch,兩餸兩菜一湯一生果 3點仲有下午茶 又有餐單比你揀,完全係JCL service 6點幾食晚飯 住院期間不斷食食食,但我嘅磅數反而輕咗 可能醫院餐較清淡,每餐又食到飽飽 無時間食其他零食   全日卧床休息,情況已經穩定,無再流啡流血 預計第二日出得院   Day 5 7點姑娘量血壓,聽BB心跳 8點食早餐 9點醫生巡房,再一次叫我38週返醫院催生 都係嗰句,唔想催生,始終想BB順其自然地出世 若果我無見紅、穿水、陣痛嘅情況下,要我催生 我絕對唔想   連續24小時無流啡出血,可以出院 但食埋lunch、tea、dinner先走 lunch仲有檸檬撻,超好味 胡生放工後就過嚟接我出院 而同我同房嘅媽媽都出得院,仲同佢交換咗contact keep in touch 住咗醫院一星期,雙腿竟然去咗水腫 啲腳趾、腳眼都出返晒嚟 唉,都唔知入院係好事定壞事