副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

第一胎。兩小時極速生B。連助產士都話快 之 QE順產記(下)

當日去廁所發現見紅,嘴角不禁微微向上笑

當日去廁所發現見紅,嘴角不禁微微向上笑 終於可以卸貨,而且唔需要催生 入院後,靜待阿女嘅來臨   6:30pm  開始feel到輕微經痛,我即刻用apps count宮縮 keep住5分鐘陣痛一次,每次痛30-50秒   10:30pm 陣痛次數密咗又長咗,每3分鐘痛一次,每次痛50-60秒 我同姑娘講,姑娘話因為我係第一胎,陣痛維持1分至分半鐘再通知佢哋   1:30am 都係keep住3分鐘痛一次,但痛嘅時間再長咗,1分鐘-分半鐘 我就行去護士站通知姑娘,然後上返床,姑娘幫我check宮頸 誰知我1度都未開,不過宮頸鬆軟 當時心諗:下,痛到咁都未開度數,仲要痛到咩程度先生得 之後姑娘攞咗紫色袍比我,叫我換定衫,又比咗暖豆袋我敷   2:00am  按call bell,再次呼喚姑娘 嗰時超級超級超級肚痛,好想姑娘幫我再check宮頸 但佢好快走咗,無幫我check到 而我痛到飆晒汗,典嚟典去,最後要坐喺到先無咁痛   2:30am 痛到不禁呻吟,ee air air,cici sasa 今次姑娘主動過嚟,問我係咪好痛 然後再幫我check宮頸,原來已經開到3度 可以種豆,之後上產房 我即刻打電話通知胡生,whatsapp媽咪   雖然痛,但我仍然超級清醒 姐姐推我上產房嘅時候,我跌咗副眼鏡落地下 反而姐姐唔知,我同佢講,佢先見到,行返轉頭幫我執返   2:40am 上到產房,姑娘叫我過床 但嗰刻真係好Q痛,我話:等陣,痛埋先 姑娘話:過嚟有得吸笑氣,唔過就無得吸 痛完嗰下,即刻過床,姑娘話比我聽笑氣位置 當我想吸嘅時候,姑娘鬧鬼我:自己揸住呀 好鬼惡死   吸咗幾下笑氣,姑娘見我唔識吸 糾正咗我,試咗幾次先掌握到 第一次吸笑氣,覺得佢陣味勁似腸仔   當姑娘settle好所有嘢,所有人走晒 得返自己一個孤令令喺產房   2:45am 姑娘喺門口話胡生已經到咗,可唔可以比佢入嚟 當時又痛,又吸梗笑氣,想講嘢都講唔到 之後仲要比姑娘話:你答我先得架 我心諗,我唔係唔想答你,我答到先得架   3:00am 已經無咗肚痛嘅感覺,但換嚟嘅係超級超級想屙pu 我知道未開夠10度,即使想屙都唔屙得 如果唔係下面會撕裂,所以一直忍,忍得勁辛苦 期間我叫胡生叫姑娘入嚟,但姑娘只係話嗰個係BB頭仔,之後又走咗   3:20am 幾個姑娘入咗嚟,幫我check度數 當時已經開到7度,但未穿水 姑娘話:等開埋嗰3度啦 我再次同姑娘講,「好想屙佢出嚟」 而姑娘仍然都係話,嗰個係BB頭仔,跟住又走咗 我唯有feel到開始宮縮,想屙前一刻就吸笑氣 減低我想屙出嚟嘅意欲   3:30am 姑娘走咗無耐,想屙嘅程度就快令我忍唔住 當時我已經變晒聲地叫胡生:「叫醫生」 隨後幾個姑娘同醫生入咗嚟,醫生幫我再check宮頸 用人手穿埋水,穿水嗰一刻,feel到一咋暖水爆發出嚟 攪到成床、成腳都係,連醫生成身都有 胡生見到咁澎湃嘅羊水,都嚇到「嘩」一聲 醫生仲講笑話:係呀,穿水穿得比較激動   之後姑娘喺張床抆腳架、手柄,叫我放對腳上去 再鋪灰色布喺我下身,然後就企喺到等我宮縮 而我即刻好緊張地同姑娘講:我唔剪(會陰)呀 姑娘都順應我要求,無剪到   當有宮縮時,姑娘叫我雙腳用力撐出腳踏,拉緊手抦,下巴緊貼心口 鼻吸,然後閉氣用力push,最後用口呼氣   第一次用力push,姑娘已經話見到BB頭仔啦 但最後唔成功,縮返入去 姑娘叫我唔好嗌出聲,咁樣會蝕左道氣   期後當我feel到急pu嘅時候,就重複姑娘指示 試咗3、4次,姑娘話:BB頭仔出咗嚟啦 又叫胡生睇,胡生話:係喎,加油呀 雖然阿B個頭出咗嚟,但姑娘喺我下面不停打圈咁‘了’ ‘了’到超級痛,仲痛過生嗰下   而喺生產期間,姑娘不斷叫胡生企埋我到多啲 叫佢唔好好似搭枱咁   ~3:50am  當我仲回梗氣,以為仲要出力屙之際 聽到姑娘好大聲話:BB 3點5x分出世 嗰刻我先知自己生咗,跟住就聽到BB喊聲 哎,終於生咗啦   姑娘幫阿女抹好身,抱阿女埋嚟,叫我確認BB性別 然後再幫阿女檢查、抽血,包好片,我哋就skin to skin 而另一位姑娘叫我屙埋胎盤出嚟,再幫我縫針 縫針前,姑娘已幫我打咗麻醉針 但我都係覺得超級痛,又係覺得縫針仲痛過生嗰下 要吸住笑氣減痛,無笑氣真係唔掂呀 有兩下吸得deep得滯,吸到個人wing wing地   生完身體真係極之虛弱,我凍到不停喺咁震 姑娘見我震到咁,攞咗張暖blanket 包到我實一實,我先覺得無咁凍   另外,又幫我哋拍照留念,一家三口第一張合照 由大痛到生,只係用咗兩個鐘 姑娘見到我個report都話我好快,仲叫我快啲生第二胎 我即刻話:我唔生呀 生仔真係好攰,好攰同好攰 喺等落產後病房期間,有個姑娘話要幫我種豆同抽血 我即刻同佢講我種咗啦,比埋佢睇 但佢都仲想幫我種,嚇到我即刻縮手 有種過豆嘅朋友,一定知種豆有幾痛   而嗰位姑娘又幫阿女做漏檢查 雖然我十幾個鐘無瞓,剛剛生完 又吸笑氣吸到wing wing地,但我都仲清醒過個姑娘   Anyway, 阿女出世重3.15kg 生產順利,唔洗食全餐,Yeah