副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

孕期裡值得記錄的10個甜酸苦辣moments

 

  一、驗孕 姨媽差不多應該要來的時候就開始密密驗孕,太早驗又失望幾日,姨媽真的來了更是沮喪。翌月姨媽不來兼發現綠D(網路上稱大衛牌驗HCG嘅試紙做綠D,D for David)不是絕對白板,不過又懷疑有否睇錯。拎住條綠D喺咁喺燈光下睇來睇去,又上載到討論區叫盟友幫手睇。結果還是跑去買支會直接顯示pregnant 字樣嘅電子驗孕棒確認一下。確認無誤後立即上討論區找同月預產的盟友join個whatsapp group。 二、跟進綠D加深 懷孕初期好擔心bb有冇好好黐實媽媽,因為呢個時間流產率很高,所以日復日地跟進綠D有冇加深。至少隔日要記住驗一驗第一次小便,如果當日試紙的顏色線沒有加深,就頓時緊張起來,馬上拿試紙拍個照,把近幾次的試紙對比圖傳到whatsapp group,大家就來個集體photohunt。 三、照閃閃 直到綠D深無可深,唯有耐心等候第一次照超聲波,太早去嘅媽媽會照唔到閃閃(BB心跳嘅超聲波影像好似一夥星星閃下閃下),即使醫生話有胎囊有胎芽,媽媽還是會好擔心。冬甩媽媽第一胎6週去照就照唔到閃閃了,今胎醒目足8週才去照就一切順利,唔使作多餘嘅擔憂。 四、懷孕初期嘅徵兆 有啲媽媽好好彩,無被荷爾蒙影響,真係無咩嘔喎,冬甩媽媽第一胎嘔過一次咁大把,第二胎就數唔到嘔過幾多次喇。一嘔又擔心冇嘢落肚會唔會唔長胎,不過事實證明兩者係冇關嘅,冬甩冬薑都好長肉,生長線都好穩定地高。 五、懷孕中期最舒服 嘔到16-17週,突然發現,咦,好似幾日冇嘔囉喎。個肚又未係好大,仲著到襪著到鞋剪到腳甲,活動自如,仲可以同大女去下迪士尼。 六、胎動 通常16-20週開始感覺到胎動,有時係震一下,有時像手指劃過一下,有時bb打嗝,個肚皮就好有規律地彈下彈下。由最初輕微嘅郁動到後期嘅猛烈攻擊,媽媽真係好想有透視眼可以確切知道bb喺裡做緊乜嘢,究竟係手定腳定頭郁呢?可以隔住肚皮感受到另一個生命嘅存在,呢個moment可算是整個孕期最amazing的了。 七、體型突變 24週有一日照鏡,突然發現自己肥過部坦克車!(可能視線太集中喺條腰度啦,噢,其實條腰已經不存在)。陀第一胎時仲好有心機每足一週就影下個肚嘅大小變化,今胎不了。不過見肚有度好,就係搭車會有人讓座,爸爸也會幫我著襪著鞋綁鞋帶。肚圍每週一吋一吋咁增加,小生命在急速成長嘅一種指標。 八、凑大B,停餵人奶 有大B嘅媽媽才會明白呢一點。正處於「麻煩二」嘅冬甩咪話唔惡搞,每朝唔肯刷牙唔肯換衫倒瀉牛奶整到統地食物殘渣,最辛苦個肚籮咁大嘅冬甩媽媽嘅係,佢仲未肯用potty,有時屙到前前後後都係,近乎爆片,洗洗抹抹都很累人。有時勞氣到一個點嘅時候好怕會驚動到肚入面嘅冬薑,幸好暫時一切安好,夜晚爸爸收工返黎就有人接更。為咗陀得安心,冬甩被迫戒奶睡,好多謝冬甩嘅配合,媽媽其實好唔捨得啊! 九、貓奴孕媽媽 懷第一胎嘅時候,有長輩叫我棄養毛孩,我堅決拒絕!毛孩係家庭嘅一部分,點可以因爲自己有BB就離棄牠們呢?不過就要拜託爸爸暫當首席鏟屎官了。而冬甩出世至今,已經被毛孩接納,經常待在冬甩附近任佢摸,偶爾還會一起睡。 十、好驚早產 冬甩媽媽兩胎都揀喺私家醫院生,第一胎差不多去到32週去私家醫院交訂金,交完就開始好驚BB無啦啦要出黎,未足月要去政府醫院生的話,訂金就凍過水。到咗35週左右產檢,想不到竟然係最後一次產檢嘞,book好手術室嘅第二日就見紅,那天才36週5天而已⋯⋯當時好擔心係咪要去政府醫院架?冬甩會唔會太輕磅架?會唔會未發育好架?幸好一切擔心嘅事情都無發生,37週0天出世,重3.01公斤。   冬甩冬薑媽媽全職照顧一家七口兩大兩小三隻貓,每日以女兒「食曬碗飯」為目標,不停鑽研新菜式,由昔日的「無飯」太太搖身一變成為煮到幾味嘅合格廚娘!  想知更多冬甩冬薑的日常趣事,歡迎 follow 【小貓奴冬甩冬薑】 Facebook 和 Instagram 喔! www.facebook.com/gingerdonut |www.instagram.com/gingerdonuthk