傳說，自從BB來了，好多媳婦會數奶奶不是？ 但港爸又會點睇自己老媽？ 喺屋企，跟媽媽同住，基本上飯來張口，要乜食乜，閒時有滋補靚湯；衫拋落洗衣籃，自然有人手洗或洗衣機洗再晾乾；柴米油鹽，廚房放邊唔知，超市/街市價錢唔知。我一直都覺得，讀大學/擇業/升職加人工/結婚等人生成就，都純粹係靠自己爭取，無父蔭，亦無靠屋企。 但BB來了，港爸的我先覺知，無老媽的後盾，我根本無可能放膽向前，起碼我顧及少咗。今時今日，BB已經6個月，過往老媽對BB付出無微不至的關心， 1) 每朝早起身，第一時間同BB講早晨，又抱BB 2) 慣常地，我／老婆餵奶後，老媽都會抱BB出客廳坐梳化，睇電視。可能，大部分媽媽反對，怕電視係電子奶咀，怕影響視力。但通常都係老媽睇電視，BB坐學習椅玩玩具，就這樣 #嫲孫樂 3) 我／老婆閒時出外工作，老媽口說麻煩，心卻想幫忙，連麻雀都唔打，全日照顧BB。 4) BB開始行BLW，但習慣餵糊仔的老媽好擔心BB會唔會瘦。但老婆經過解釋，BLW可以訓練自主，發掘食物好奇心，又俾成功例子老媽睇，就放心。其實，只要媽媳間肯付出時間溝通，係可以達成共識，互相了解。而我通常好少出聲，除非有磨擦，但情況唔多。 5) 有一次，老媽去5日泰國旅行，本來對Whatsapp一竅不通，但仍努力請教同行友人用Whatsapp錄音，因為老媽始終錫BB，孫就是命根，就算相隔多遠，只想孫孫聽到自己的聲音。 6) 最難忘是，BB第15日大的事 話說通宵時份，幫BB換尿片，發現臍帶出血。是我垂直抱整親BB嗎？是沖涼後無用棉花棒加熟水弄得乾淨嗎？BB痛嗎？愈睇愈迷惘。總之，就要去健康院WALK-IN。 老媽：「洗咩去健康院呀？用XX油搽咪得lor」。但她仍選擇陪我搭的士去健康院。她抱B，我手揪媽媽袋，背著一個背囊起行。(別忘執漏奶粉/奶樽/牛牛被/冷熱水) 到埗登記，不消半個鐘到2號房，姑娘超熟手解開BB衫仔，如常用棉花棒蘸點熟水，輕輕翻起肚臍打圈。第一下有血，第二三四下淡了，最後就用乾棉花棒擦乾，就是這樣。總之，放心了。 回程時，老媽：「都話gala，洗咩咁緊張。以前我湊6個仔女都係咁，以前你呀爸行船，我生完都無人幫啦！一個女人傷口咁痛都照頂啦！邊有炒米茶？咪由係我濕水洗衫煮飯。奶奶都無問過我一句，望過我一眼。係你呀公呀婆教我幫我咋。咪又係咁。」 嗰一刻，我頓覺我老母好型，堅型。網上流傳好多港女變港媽的故事，實則我媽媽亦是，只是我從來無關心過，甚至共處過。 #新手爸媽覺得大件事  #老練嫲嫲覺得不外如事 #烈女港嫲是這樣煉成的 P.S. 相片攝於2018/7/8，BB出院日，嫲嫲第一次見湯丸仔