副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

HEY魚媽孕期產檢分享

 

早兩日有朋友問我孕期其實有咩檢查要做,有咩要注意.. 勾起左我陀HEY魚10個月既回憶… 雖然我係有計劃生BB,但對於檢查既野都係唔太清楚.. 個陣都係周圍問人 XD 第一樣要做既事,排期... 我係自己先0係屋企驗孕,見到有2條藍線再番公司拎驗孕報告. 我係預計0係公立醫院生,所以我就直接上網PRINT張FORM連埋驗孕報告, 住址證明FAX到最近屋企既醫院排期. 大概2個工作天就已經收到電話約我做第一次既檢查(抽血,計算預產期等等) 另外我都預約左私家既婦產科醫生做檢查(因為政府既檢查係無包括每月照超聲波,去私家醫生到就可以睇到BB生長情況,胎盤位置有冇異常等等) **建議想去私家醫院生BB,都去政府排埋期,因為如果孕期有咩突發事都可以有RECORD 私家婦產科醫生又有咩要做呢? 有左BB之後好開心,同時都會好擔心.. 胚囊著床的位置,胚胎數目,確定預產期 7-8週左右就可以去照下睇BB心跳(政府醫院不包), 胚囊著床既位置,胚胎數目同埋確定預產期,另外公立醫院會提供個個都有得做嘅唐氏綜合症篩查..(12週)..但有好多媽媽都會自費另一啲非入侵性檢查(SafeT21同NIFTY) 10週後可做.. T21 同NIFTY詳細可以自行GOOGLE :) 到左大概20至21週就要做照結構檢查啦~~呢樣都係大PROJECT黎,一定要照清楚有冇問題,(內臟器官,頭骨,腦,眼,咀唇,脊骨,肺橫隔膜,腎,胃,腸, 4個心房膀胱,四肢同性器官等等)因為政府醫院照結構檢查提供(除左高齡產婦,有特別原因先會做) 所以媽媽要自費到私家診所照,但留意唔係每一個婦產科醫生都有做照結構檢查架( 重點:因為會做結構檢查唔係好多,所以知道預產期已經可以一早BOOK定) 到左28週公立醫院會安排做妊娠糖尿檢查(即係飲糖水) 飲糖水前會抽血驗血糖水平,之後飲一大杯糖水(咖啡杯咁大),兩個鐘後就再抽血,測試下胰臟可唔可以處理突然驟升既血糖~ 飲糖水前低過5就PASS~而飲糖水後低過8.5就PASS.. (順帶一提,如果頂唔順嘔左..就要改第2日再飲過, 要忍住呀~) 黎到孕後期35至37週.. 公立醫院會安排乙型鏈球菌拭子普及篩查 (即係B鏈) 過程好簡單亦好快,拎2個樣本(低陰道樣本) (直腸樣本) 幾分鐘OK~!!! 但我初頭好緊張,姑娘係咁同我傾計分散注意力XD 之後就可以走得番去等電話啦~有電話即係中左,,, 但我係無收到電話,再去公立產檢先知中左.. :( 醫生都有講預防BB感染嘅方法,雖然都有少少擔心… 衛生署關於預防新生兒乙型鏈球菌感染網頁: https://www.fhs.gov.hk/tc_chi/health_info/woman/478.pdf 公立既檢查就完結啦~但私家既產檢我就到38週都有做… 因為要睇BB轉左頭未,胎盤血流量,臍帶會唔會纏住頸等等… HEY魚媽小TIPS: 我0係第12週買左胎心機,,, 但初頭唔需要用,,因為好難搵位聽心跳...搵唔到會自己嚇自己.. 到20週左右我就早晚到聽胎心..睇埋BB心率正唔正常... 一路聽到生BB前一日..XD 呢部機幾好,有日我番工好耐都無胎動...(  擔心有咩事:(  ) 我就拎埋部機入廁所聽...聽到有胎心先放心~   聯絡我或產品試用:RUBY.1125@HOTMAIL.COM facebook page : @haileybabywhy (hey魚b之日常)