產後修身係好多媽媽都關注嘅話題，產後肚皮鬆弛更加係令媽媽們最傷腦筋嘅問題之一。回想剛剛有BB嘅時候，我已經同老公講生完BB我一定要紮肚！事關我實在接受唔到產後身形大走樣。老公對於我嘅要求雖然支持，但佢男人之家實在唔明白點解要紮肚、同埋紮肚其實有咩用呢？ 我地一齊黎了解下產後腹部鬆弛嘅成因： 「婦女在懷孕及生產期間會分泌鬆馳荷爾蒙，令肌肉及韌帶變得柔軟，以助擴張體內空間容納胎兒，而膨脹的子宮更會把腹直肌拉扯，導致產後腹直肌分離、內臟移位及盆骨增寛，如產後沒妥善處理，或有機會引致失禁、子宮下垂及陰道鬆弛等問題。」 紮肚係利用鬆弛荷爾蒙於分娩後完全消失前、身體組織依然柔軟時，透過外部加壓，從而幫助產婦回復體態。 咁幾時紮肚係黃金時期呢？一般建議，順產媽媽：產後2-4星期  / 剖腹產媽媽：產後6-8星期。我係剖腹產，產後明顯感覺到個胃好似跌左落去咁，真係好得人驚，所以產後6星期我就開始左紮肚療程。 呢張係產後6星期未開始紮肚嘅相，肚皮漲漲咁、我以為生完咁樣好正常，之後先知原來唔係。 治療師事前提我買一支薑油，用黎幫我按摩去肚風。我選擇上門紮肚嘅療程，因為紮完盡量少走動先可以達到最佳效果。 首先治癒師幫我用薑油按肚，雖然治療師手法好溫柔，但我都覺得有啲痛，治療師解釋係肌肉痛、按多幾日之後就唔會痛。按完肚就拎出一條紮肚帶幫我由盤骨至肋骨位置紮緊。誰不知！我個人闊到條紮肚帶拉唔埋！好在治療師夠經驗，幫我用條薄毛巾墊底再拉埋，咁就解決左。 第一晚我一路訓，一路放屁，原來係因為按肚驅風排左啲肚風出黎。第二朝我拎返產前嘅運動褲出黎，竟然著得落！好surprise！ 到第五日，好明顯個肚無咁漲，按肚時亦已經唔痛，同埋塊紮肚布唔單止拉得埋、仲可以重疊到！ 紮晒10日之後，睇相已經睇得出個分別！ 紮肚療程一連10日，每次紮最少8個鐘，然後就可以自己解左佢。建議大家沖完涼食完野之後先紮，紮左肚一樣可以去廁所、唔洗解開紮肚布、只要拉底內褲仔就可以，好方便架。 溫馨提示：紮肚其實係醫療級嘅療程，大家記得搵讀過相關課程嘅治療師去處理，自己黎嘅話可能會令內臟下垂嘅情況加劇架。   歡迎聯絡作合作/試用/邀稿：chuiyiho@gmail.com／FB: Chuiyiho.chuiyi／ FB Page: www.facebook.com/Chuiyi80sMama ／IG: Chuiyiho