副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

分享3次不同嘅生產經歷,第二篇中集,二哥哥順產篇

  嚟到第二篇中集,記錄下由開刀生大哥到順產生二哥嘅經歷,提到二哥就一定要由佗佢開始講起...... 《極長文一篇》   可能之前開刀生,所以令身體回復得比較慢,有咗之後仍然要照顧BB嘅大哥哥加上打理日常家務,相對可以休息嘅時間真係少之又少。再加上各方面嘅影響,所以佗JORDAN嘅時候覺得特別辛苦,無論身體上或者情緒上都承受住一定程度嘅壓力。有時更會無情情大喊,當時覺得自己有少少產前抑鬱,不過天生樂觀嘅我只要諗到細BB嘅可愛樣,每次負面情緒出現時都可以好快回復,同更期待弟弟嘅來臨。(但係,其實生完二哥哥後有見過精神科姑娘同社工)   當初知道再有BB當然開心,不過,我隨之而嚟就諗「係米要再開刀﹖………」   《我極度唔想……..!!》   的確,佢哋兩兄弟出世日子相差好近,只有14個月。 之前醫生已經講過最好隔2年至好再生第2個,因為傷口會因為佗B或者順產生B而有機會爆開。所以當時醫生見意就算有咗最好繼續開刀生。   《但係,我真係唔想… …》   因為總覺得最自然嘅生產過程,可以帶俾BB同媽媽都有更好嘅健康身體。 而我更加上有好多開刀生B後嘅事情影響我(相信其他開刀媽媽唔會遇到嘅),令我#真係真係真係….. 唔想再感受多一次不為外人道嘅經歷!   由有咗開始,滿腦子都係開刀定順產、開刀定順產?! 因為咁,上網睇下有無人分享類似情況,再加上問咗3位產科醫生。 第一位係去驗唐氏嘅產科醫生,佢幫我檢查後好快俾到見意我,答案「要繼續開刀」。原因係生產期同第一胎太接近,佢話喺我生第2個嘅時候身體內嘅傷口好有可能只係啱啱好返好短時間,所以順產爆開傷口嘅機會一定比其他隔開2年或以上至再生嘅媽媽大好多。 另外,我透過短訊向一位只見過一面嘅產科醫生朋友詢問意見,向佢請教我嘅情況適唔適合順產。(到咗今日,仍然非常感謝佢俾咗好好嘅意見我) 佢話好睇BB嘅位置同size作評估風險,如果照超聲波見到BB 位置唔係貼近上次開刀體內傷口愈合位置,而BB size又唔算大嘅話,其實爆開嘅機會非常非常細,不過佢亦提醒我要喺37-38週左右一定要再去照超聲波確定到時BB位置同尺寸係唔係真係合適順產。 雖然當時仍然未係好肯定選擇開刀定順產,但呢個見意對我嚟講係非常大嘅好消息,我嘅擔心減輕咗好多好多。 第三位產科醫生係生大哥哥時去睇過嘅產科醫生,到JORDAN我地又再次搵呢位醫生問意見,佢亦都俾咗好大信心我,同樣地佢話如果BB 位置唔係貼近上次開刀體內傷口位同埋BB size唔算大的話爆開機會係好微,佢話加上二十幾年經驗只見過兩三次出現傷口爆開嘅情況。30週左右時醫生評估JORDAN出世時大約有6磅幾至7磅,所以估計順產應該無問題。但係一定要喺37-38週再照多一次,以確定JORDAN到時嘅位置同SIZE至可以放心順產。   雖然醫生話要37-38週再照至可以確定能唔能夠順產,但係另一邊廂已經到咗要見威院醫生決定順產定開刀喇,當時我已經決定選擇順產生JORDAN。到38週再照,好開心JORDAN無論位置同SIZE都好適合順產,就係咁我就由第一個開刀生,變成第二個順產生啦。   解決咗開刀定順產嘅問題之後,當然就要面對自然順產嘅十級痛楚啦!因為生HOLDEN嘅時候痛咗1X個鐘只開得3度就要開刀。所以我雖然生第二個,但其實順產計的話只係生緊第一個,由陣痛到生足足痛咗三十幾四十個鐘。最記得由星期六中午出現唔密嘅陣痛,到星期日早上入院開始規律陣痛,一直到星期一半夜至生到出嚟。呢三、四十個鐘對於產婦嚟講真係非常漫長嘅時間。 今次威院終於可以用到笑氣,姑娘俾我吸過,感覺HIGH HIGH哋令人覺得無咁痛。但係去到產房唔俾再用變相又係痛,不過發覺生產呼吸法的確好有用,起碼當時覺得work。 痛咗咁耐Jordan 終於出世啦,爸爸終於可以入產房陪產啦。(本來生大哥哥時已經打算入產房陪產,最後要開刀無得陪) 助產士話需要剪幫助生產,一剪Jordan 好快已經出嚟啦,喊得好大聲。姑娘幫佢簡單處理一下就已經抱嚟俾我同爸爸睇,不過姑娘幫我哋合照完,9秒9請爸爸出去。話要做產後程序,等醫生嚟縫針。   見姑娘咁講以為好快有人嚟處理,誰不知生完瞓喺產房一等就等咗成個幾鐘無人理過,話搵醫生嚟嘅姑娘都消失埋,一個人都無。我當時仍然攬住Jordan,我瞓嘅產房真係一個人都無又好凍,原本仍然聽到隔離房生緊B嘅媽媽叫聲,到最後佢都完成任務推走埋。我同Jordan 仍然喺到等,估計啲血都已經乾曬。 終於,有姑娘經過我瞓嘅産房,即刻叫住佢,佢都好驚訝點解我重喺到?!見到佢,我即刻請佢幫我放好Jordan,因為其實好用力攬住滑滑嘅Jordan成個幾鐘好驚跌咗佢落地,我已經好攰!之後,姑娘即時打電話急call醫生嚟……..   終於有醫生出現啦! 但係呢位女醫生嘅表情話我知,佢對自己無咩信心。不過,佢仍然鼓起勇氣幫我縫針。我估計佢有打麻醉止痛,然後開始縫針。開頭只見佢埋頭苦幹,又不時皺眉頭又有時好似有問題咁嘅表情! 佢縫縫下突然打電話,不過我聽唔到佢講咩,之後佢停咗喺到等……. 過咗一段時間後,有位睇落似有經驗嘅醫生出現咗。佢仔細觀察咗傷口,亦開始皺眉頭,跟住同呢位好不安嘅醫生講咗啲嘢。隨後見到佢開始剪返之前縫咗嘅缐,再縫過。其實由佢開始鏠到call經驗醫生嚟,已經又過咗成個鐘,依咖要重新縫過,我已經諗會唔會麻醉藥過埋都未縫完呢?!…....   果然,真係!!!  救命呀!! 其實麻醉藥慢慢過嘅時候我已經有少少針刺嘅感覺但係唔算痛,不過最後都係頂唔到不安醫生嘅縫針時間。麻醉藥退後佢每刺一針,我都同佢講真係好好好好好痛再問佢OK未?! 當然佢仍然埋頭苦幹緊無理我。瞓喺到完完全全感覺到佢每一下刺落去再拉線嘅動作!! 救命呀!……..   終於完成啦!不過由半夜兩點幾生完,到去到產後房已經天光6點幾啦! . . #聽日分享(下集)生妹妹催生成功篇    請續 (上集)#生大哥哥全餐編「上一個post」   (下集)#生妹妹催生成功篇 「下一個post」     請「Like 」 FB: www.facebook.com/threekids.gloria   「Follow 」 IG: www.instagram.com/threekids.gloria   #全職媽媽#香港媽媽#開刀#順產#催生#母親節#mothersday