副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

點樣郵寄申請小童特區護照 & 身份證

細佬本護照終於到手喇!!

細佬本護照終於到手喇!! 之前復活節本來想帶埋細佬去旅行,買晒機票攞晒Passport,點知就爆左麻疹出嚟。。。 細佬未夠一歲未打針,唯有留喺香港啦! Anywayzzz,講返點樣幫細佬申請特區護照,如果大家暑假諗住帶小朋友去旅行,都係時候着手申請啦~ BB未有身分證,可以順便一次過申請埋!我哋係用郵寄嘅方式申請嘅,講下有啲咩文件要準備: 1⃣去影一張合乎特區護照規格嘅證件相 (拎特區護照需要交一張相,同時拎埋身分證就要再交多一張相,11歲以下嘅小朋友如果要用埋副署事項表格(ID 641)就再多一張相) 2⃣填好表格ID842 :香 港 特 別 行 政 區 護 照 申 請 書 ( 適 用 於 十 六 歲 以 下 兒 童 在 香 港 申 請 ) https://www.immd.gov.hk/pdforms/ID641n.pdf 3⃣小朋友要出示學校證件(例如學生手冊,手冊須載有兒童的姓名、出生日期及相片,並經校方蓋印證)或其他身證明。 好似細佬咁細嘅小朋友未有呢類證明文件,就要搵人填埋副 署事項表格(ID 641)。 https://www.immd.gov.hk/pdforms/ID641n.pdf 副署人唔可以係父母,我哋叫咗婆婆簽呢份表格。 副署人由頭到尾都唔需要現身去入境事務處,佢只需要簽明證明張表格上嘅相真係嗰個小朋友。 4⃣填好表格ROP3:十一歲以下人士的香港永久性居民身份證申請書 https://www.immd.gov.hk/pdforms/ROP3.pdf 5⃣準備一張支票,支票抬頭註明「香港特別行政區政府」,16歲以下嘅護照有效期係五年,32頁嘅費用係$185 / 48頁係$230 6⃣之後就將所有文件入信封: -兩張相 -表格ID842特區護照申請表  -表格ROP3身份證申請表 -表格ID641副署事項表格(要貼好相) -父/母或監護人身份證或旅行證件副本 - 副署人身份證副本 -BB出世紙副本 - 支票 7⃣ 寄去呢個地址: 香 港 灣 仔 告 士 打 道 七 號 入 境 事 務 大 樓 四 樓  入 境 事 務 處  旅 行 證 件 及 國 籍 ( 申 請 ) 組 記得貼夠郵費啊!穩陣啲貼夠$4一定OK! 8⃣等入境處寄領證通知書 我3月8號寄出所有嘢,大約一個禮拜之後就收到通知書,最快4月3號就可以攞證!即係成個過程一個月內可以搞掂 9⃣上網預約定一個日子去攞證,由於交表嘅時候細佬冇現身,所以攞證嘅時候要帶埋佢本人。 如果申請人(填表嗰個人)唔得閒帶BB去,亦可以寫授權書叫其他人帶BB去~ https://www.immd.gov.hk/pdforms/id678.pdf 我哋星期六去攞,入境處人頭湧湧,不過20分鐘都已經搞掂曬!Yeah! 暑假可以出發去旅行啦~ #特區護照 #passport #去旅行 #郵寄申請