未做人媽咪之前，我唔明媽咪呢個角色點解可以咁長氣；點解會為咗一件小事咁歇斯底里；更加唔明媽咪點解會專程夜晚坐車送碗湯嚟我屋企？直到我做咗人媽咪......    自從諾諾出世之後我就無一覺好訓過；餵奶換片冚返好張被，就算咩事都無發生，半夜依然會彈起身望吓，呢個技能只有媽咪們先做得到     媽咪技能當然重有好多，例如...  *負重行走：前面孭BB，後面孭住大背囊，依然可以行Bb展或者落街市買餸買廁紙。 *忍耐力驚人：湊BB隨時幾個鐘都行唔開去小便；食飯都一樣，媽咪們都應該有試過為咗湊BB而捱餓。     媽咪技能完全源自愛，因為愛所以唔怕辛苦，唔計較得失，一心為咗仔女好；見到仔女滿足，媽咪自己就覺得值得；終於明白個碗湯嘅意義，感受到個份無言嘅關愛...     我媽咪曾經問：點解每個星期放假都帶住諾諾周圍去，唔去休息下？                       我答：想好好珍惜諾諾童年。    其實我想講：因為媽咪你為我做咗個好榜樣，為我付出咗好多，所以我都想盡力做個好媽咪，多謝媽咪。