復活節假期無耐就已經開始聽其他家長話要報暑期班，果時我仲心諗洗唔洗咁早？暑假唔係應該盡情享受，點解仲要安排咁多活動？！ 到五月初同班家長谷開始廣傳暑期班資料 ，除左熟悉嘅游水、唱遊，仲有奧數、劍擊呢類.....我不禁睇到眼都突埋⋯其實會唔會超越左一個三、四歲小朋友嘅能力呢？究竟係家長主觀地想填滿小朋友嘅時間定係小朋友真正有興趣呢？ 如果放假學興趣班仲辛苦過返學，是否本末倒置呢？ 最初睇暑期班係睇下有無一啲試堂性質嘅課程可以俾佢試下，俾大公主自己揀下對咩活動有興趣。到早幾日佢睇完toy story 之後話想整手工畫畫，我就左撲右撲好好彩搵到手工藝班最後一個位俾佢 有時候睇到其他家長嘅對話都幾矛盾，如果你係虎爸媽，應該唔會揀現家讀緊嘅happy school;唔係虎爸媽，更加唔會以填滿小朋友時間為出發點，講到底孩子好似成為佢哋嘅負累。 從前讀書嘅時候放暑假係開心事，到現在我依舊認為放暑假應該係大人小朋友的開心事 快樂童年 – 是要靠家長和小孩一起建構