副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

【包媽孕記】QE順產27小時全記錄(中)[極長文慎入]

穿水見紅定陣痛先?等足估足9個月,原來包包揀咗穿水做準備出世嘅SIGNAL~~

穿水見紅定陣痛先?等足估足9個月,原來包包揀咗穿水做準備出世嘅SIGNAL~~ 上回講到穿水後首12個鐘嘅情況,有朋友問點解我可以咁清楚記低時間,因為當時喺產前房只有自己一個人,老公要探病時間先可以陪喺身邊,所以一有新動向就用手機MARK低,不過嚟到呢一篇時間就開始模糊,因為真正要開始打大佬啦﹗ 【包媽孕記】QE順產27小時全記錄(上) 【包媽孕記】QE順產走佬袋懶人包(實戰後清單)   6點幾跪求姑娘CHECK度數不果,真係成個人無晒心機,老公陪我去努力UN BALL希望度數可以快啲開 到8點探病時間完結,佢又要走啦得返我一個T.T之後開始愈痛愈勁,每次痛條腰好似就斷咁。。。 2125有位好好人嘅黃姑娘嚟度bb心跳,剛好我正在陣痛,佢主動話幫我check下,嗰一刻簡直覺得佢係天使一樣﹗不過宮頸都係未開佢話仲好厚但起碼叫有人理下自己。check完宮頸,m巾,褲同床墊都濕晒,2140去完廁所換褲同m巾,想起身3次都撞正陣痛又走唔到。。。返到床好人黃姑娘拎咗個電擊鎮痛機俾我好感動 【包媽孕記】Baby Shower公布性別 落手落腳籌備BB首個派對 2230隔離房有媽媽落得產房啦醫生幫佢check完經過,話幫我種鹽水豆先,因為頭先check宮頸未開,穿水24小時要打抗生素&好大機會都要催生佢預我典到穿水24小時即係6點幾。。。仲有八個鐘點捱呀>.<’陣痛之間我就嚟秒暈啦… 0055痛到入廁所嘔胃酸,有個惡姑娘入廁所話:「都叫你唔好咁呼吸會嘔囉﹗」淨係叫我鼻吸口呼,同埋俾2個嘔吐袋過多15分鐘黃姑娘幫我check,宮頸都係未開我頂唔順啦申請止痛針,已經24個鐘無瞓,再係咁我都無力生啦0148打咗止痛針等藥力發作已經有傳說中想生嘅SIGNAL --- 一直想去便便嘅感覺,但宮頸呢一刻都係完全未開,痛到神智開始唔清醒,開始擔心會食全餐,情緒真係好崩潰T.T 【包媽孕記】伊利沙白醫院QE L block登記方法及第一次產檢流程分享 0349止痛針藥力發作,有瞓到一陣,但不停有便意勁痛就痛醒,再無限輪迴。。。姑娘檢查咗話bb頭低係正常,但仲未完全開,叫我等到6點幾夠24小時,打抗生素加上產房催生……止痛針藥力慢慢消退,痛嘅感覺亦愈來愈強烈,一直都努力忍住唔嗌怕嘈到其他媽媽,但開始忍唔到要低聲嗚嗚咁叫…… 更多分享請follow FB Page雲妮手札 https://www.facebook.com/winnie810corner/ 預咗6點幾夠24小時可以落產房催生,0515趁陣痛之間嘅少少時間打定俾老公,叫佢準備嚟醫院。點知收線無耐,自己開始痛到失控大嗌,聲量大到應該護士站都聽到,即刻有姑娘衝嚟幫我檢查,終於可以落產房啦! 0529再打一次俾老公話落得去然後忍痛過床,有姐姐幫手將個人物品仲有檯面嘅暖水瓶、麵包等掃晒落床邊(所以話喺產前房真係唔好放晒啲嘢出嚟),就即刻推我去產房。真係好似睇電視咁,一邊望住天花嘅燈走馬燈般走過,被推入LIFT再推入產房 落到去產房好多身穿手術袍嘅人忙東忙西,老公隔一陣6點前就趕到,檢查先知原來已經開咗7度﹗﹗﹗姑娘交帶落點用笑氣面罩就離開,面前有個大鐘,即使我要吸笑氣除低眼鏡,都大約知道時間。好多時得我同老公2個人喺度,雖然痛楚愈來愈恐怖,但終於可以捉住老公隻手,個心總算定啲。 陣痛與陣痛之間我休克咗幾次,之後又痛醒無限loop。。。有人話呢種痛好似俾泥頭車輾過,或者10條肋骨一齊斷晒,我就覺得係更加恐怖,因為痛起嚟伴隨極度想便便嘅感覺,但又唔去得因為BB根本未夠位出嚟,格硬痾甚至會危害到BB﹗ 雖然痛到不停休克,但我並無好似電視劇咁大嗌「我要開刀」或者「我唔生啦」,因為明知講嚟都嘥氣(那來嘅理智呀……)不過我好記得自己問過老公一句:「我會唔會就咁痛到死架?」老公一直喺身邊無多餘嘅說話,只係俾隻手我捉住,痛緊嘅時候幫我戴好笑氣面罩,其實已經好足夠啦。 更多分享請follow FB Page雲妮手札 https://www.facebook.com/winnie810corner/ 落咗產房三個幾鐘,到0930左右終於可以開始試生,SET好腳踏鋪好消毒墊後,有位明顯係資深助產士入嚟。佢睇到我雙手戴住護腕,知道係筋膜炎後即刻應變,因為PUSH嘅時候正常雙手要握實扶手發力,但以我嘅情況雙手根本做唔到。古姑娘好堅,即刻教我用另一姿勢生,2邊手腕抱大脾,老公幫手喺頸後推 吸一大啖氣忍住十秒PUSH,試咗3,4次左右,姑娘同老公話每次都有進展,見到BB頭頂,個頭出左一半,打側啲等BB更啱位,最終都有剪一刀,終於,終於聽到包包嘅喊聲啦,好響亮好好聽。兩個人都無喊,同老公對望講咗句:「我地個仔呀,終於見到包包啦﹗」而老公就捉住我隻手話:「辛苦你啦老婆﹗」老公剪咗臍帶,姑娘幫包包清潔完,就用相機幫我咃影低第一張全家福 【包媽孕記】終於足月了﹗準媽媽孕期十萬樣擔心 之後仲即刻PRINT出嚟送俾我地,再用老公手機幫手影相。 包包喺隔離做檢查同曬燈時,我又休克咗一陣,以為生完就上得房?真係太天真啦﹗仲有推胎盤同縫針兩個大佬要打呀﹗下體咁敏感嘅位置被剪一刀,剪嗰下我係知道嘅但陣痛掩蓋一切。縫針前有打麻醉針,但感覺到由內到外一層一層,有針線不停穿插都咪話唔驚。 但再驚都不及推胎盤,嗰種痛,好比開足10度時PUSH個仔出嚟嘅痛楚,姑娘要我用力痾,但,生仔好似好大舊便便都仲有得發力,痾空氣點出力呀……佢再死命按落個肚子宮位置,又喺下面伸手拉胎盤出嚟,痛到反白眼失控尖叫終於搞掂,姑娘喺旁邊數齊咁多層胎盤組織確保無殘留。 鏠針加推胎盤搞咗足足30分鐘,親子時間可算係眾多痛楚中最甜一刻。抱住近距離望佢真係幾辛苦都值得,見到佢口郁郁姑娘就幫佢趴喺我心口,阿仔真係識郁下郁下咀仔,第一次食人奶啦﹗﹗大約11點9終於推上產後房啦。 未完待續…… 下一篇會記錄 姑娘係咪傳聞中勁HARSH逼餵人奶? E2產後房   VS A11私家房 【包媽孕記】QE 順產27小時全紀錄(下)[產後房&A11私家房] 相關文章: 【包媽孕記】QE順產27小時全記錄(上) 【包媽孕記】QE順產走佬袋懶人包(實戰後清單) 【包媽孕記】大聲宣布「我懷孕了﹗」瘋狂孕吐佛系媽媽育成記 【包媽孕記】Baby Shower公布性別 落手落腳籌備BB首個派對 【包媽孕記】伊利沙白醫院QE L block登記方法及第一次產檢流程分享 【包媽孕記】終於足月了﹗準媽媽孕期十萬樣擔心 【包媽孕記】孕期最後一個關卡: QE做B鏈檢驗 如果有任何問題,歡迎到雲妮手札留言=) ************************************************* 包媽雲妮有多重身份:新手孕媽,娛樂小編,主播,活動主持…… BabyKingdom駐場Blogger 邀稿│出席/主持活動│試用│試玩 歡迎inbox FB PAGE雲妮手札 聯絡 更多分享 請follow Instagram : Winnie810hung FB Page: 雲妮手札 https://www.facebook.com/winnie810corner/