副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

二寶威院生產全記錄 一打二全職媽媽生活start

20190804   懷孕39週2

20190804   懷孕39週2     呢日正正係軒軒23個月既日子,細佬一定係想出黎一齊慶祝兩兄弟都一齊揀4號出世,係咪一早夾定架? 兩兄弟都揀中爸爸係屋企可以一齊入院嘅時間同日子     早上六點半,個肚開始硬得密,大概10分鐘內就一次。到7點,變成7-8分鐘一次,仲開始有啲感覺辛苦啦,要呼吸控制下,因為無見紅,所以我都坐起身觀察下計下時。 8點幾,我決定要起身整野去醫院啦,整好哂落到去買埋份三文治同杯飲品先,已經餓啦,食飽先有氣有力生仔架嘛     11點到達威爾斯落的士,係4分鐘痛一次,上次第一胎軒軒個時我都係去到醫院4分鐘痛一次,不過已經無咩力量自己上產前病房,要行得好慢同停低抖好多次,但今次我可以用正常步速行上去,痛緊個時都係唔講野住呼吸控制下就ok,唔需要停低。     上到產前病房,自己行入去同姑娘講有陣痛想入院,佢地先問我第幾胎,幾耐痛一次,然後咁岩我想去小便,咁就跟手驗埋,呢個時候老公就落去幫我做入院登記。 我驗完小便出番外面間房,啲姑娘一見到我出左黎就好緊張咁,所有野都做得好快,但個時根本都未檢查開左幾多度唔通係因為知道我第二胎嘅關係     一檢查,原來我已經開左四度個感覺同第一胎完全唔同,好多人都話第二胎會痛啲,但第一胎開左一度個種痛同第二胎開四度係一樣,所以我又唔覺得第二胎痛啲 係檢查室就直接換 紫袍,然後佢地推左我入病房埋一邊後,我就有急屎想呵嘅感覺,開始忍唔住細細聲嗌,老公係呢個時候都幫我搞完入院手續上番黎啦。 隨即馬上推我去產房,入到產房頂唔順太痛都已經忍唔住嗌出嚟 好多助產士, 老公數過一共有11個 上次生軒軒都有八至九個。 過床後 有醫生幫我打鹽水豆同抽血, 助產士問要唔要陪產, 同埋聽到我大聲嗌就叫我吹氣呼吸。 仲有原來我中左b鏈 上次軒軒嗰時我都冇中 因為中左b鏈所以要馬上打抗生素, 但因為其實我已經開到四度 都應該已經打唔切支針去保護細佬 就係支抗生素到咗嘅時候, 我就自己穿咗水啦, 原來真係會『pop』一聲咁  上次軒軒都有問我想點止痛,今次無!完全無人問過我!時間同度數已經唔容許我有任何止痛可以做,所以我今次又係零止痛地生細佬 打埋支抗生素之後隔咗唔係好耐, 助產士就叫咗老公入嚟啦, 老公入到嚟我就開始呵,呵左3-4下,就見到細佬個頭出左黎啦 今次成個過程我自己都超清楚睇到下面細佬係點樣出嚟 , 細佬出曬成個身,下一秒馬上喊啦     隨即助產士會放細路喺我個身上面,剪臍帶抹血打針抽臍帶血, 幫細佬著返條片然後去磅重, 搞掂曬就畀返細佬喺我個身上面skin-to-skin。 我再用少少力呵埋個胎盤出嚟, 我又睇得好清楚舊胎盤係點樣 今次冇剪會陰, 但都有啲屙損咗, 助產士話係一級程度,縫一針已經可以, 佢話逢一針好快所以都唔幫我打麻醉針啦, 我一聽到佢話唔幫我打麻醉針我就好驚 好彩冇咩感覺唔算痛, 同埋都真係好快搞掂,因為我心臟嘅問題 所以同軒軒嗰時一樣, 要留喺產房觀察24小時先, 所以助產士就幫我 插埋尿喉。 完成曬以上事項, 助產士就幫我哋影相, 同埋細佬開始啜奶奶, 細佬好叻呀自己已經識去搵乳頭啜,啜左超過一個鐘。 呢段時間啲助產士就 離開曬 ,剩番老公同細佬同我。     雖然我唔覺得第二胎痛啲, 但第二胎真係快勁多,由落的士到醫院嗰刻開始計起, 到細佬出世, 42分鐘! 係42分鐘咋!         3.165 kg的 晞晞細佬         細佬仲喺度啜緊奶奶嘅時候, 老公就落去幫我買咗個包同支飲品畀我, 因為已經過咗醫院派午飯時間喇, 然後兩點幾老公就走啦, 我就繼續留喺產房觀察 等聽日先有得返上病房, 三點鐘左右就有產後房姑娘嚟接細佬上病房先。     我自己一個喺產房就休息瞓覺, 醫院派餐時間就食嘢, 助產士就每個鐘幫我check住血壓同埋排咗幾多尿, 我都自己間唔中手擠下奶奶落針筒, 助產士會搵人送上病房畀細佬食, 因為我生完之後細佬唔係24小時馬上喺我身邊, 未有得埋身住, 所以佢喺產後病房就由姑娘用杯仔餵住佢食奶先。         生產記告一段落, 下篇再講產後病房同兒科病房         產品試用/活動邀請/其他合作 歡迎聯絡:tanleesharon2004@yahoo.com.hk 謝謝 軒軒與小小b facebook page http://www.facebook.com/leessssfamily