副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

【抵價速遊】海洋公園Marriott Hotel

上次去完海洋公園xOne Piece離場嘅時候,晴朗望見隔離酒店個泳池好正,問下次係咪會去埋酒店玩!估唔到事隔一個月,無端端畀我哋見到個超抵價,就係咁就達成咗佢哋嘅願望喇!簡直係天撞我也!晴朗都勁興奮

上次去完海洋公園xOne Piece離場嘅時候,晴朗望見隔離酒店個泳池好正,問下次係咪會去埋酒店玩!估唔到事隔一個月,無端端畀我哋見到個超抵價,就係咁就達成咗佢哋嘅願望喇!簡直係天撞我也!晴朗都勁興奮!一齊嚟睇下好唔好玩啦! 收工後,整理好行裝就同晴朗一齊向海洋公園萬豪酒店出發囉! 由於時間關係,搭地鐵期間已經order咗pizza~ 諗住一攞房就有得食啦嘛!hehee... 搭地鐵,真係話咁快就到!酒店已經響我哋後面喇! 到達酒店check-in後,響lobby觀賞梗呢個大魚缸之際~ pizza哥哥就打嚟喇! 時間真係較得啱啱好!hohoo~ 一入到房嘅感覺係空間感夠,透徹舒適~ 尤其係浴室塊落地玻璃,好鍾意呢個設計~ 但晴晴問我,如果導遊同旅客住埋同一間房咪會畀人睇晒囉? 係喎!問得好!XD 食飯前,先洗手!而家兩個小朋友都唔駛用高櫈幫手,時間真係過得好快呀!(感觸mode) 洗手間對出就係床舖、梳化同小圓桌,一齊過去睇真啲先~ 回望番門口位置,仲有小食枱、衣櫃同埋擺放行李嘅矮櫃仔~ 靠窗嘅大梳化好正!令整個環境更加舒適~ 晴朗三爬兩撥已經開梗餐喇! 仲撈埋電視汁添!認真識嘆呀! 食飽飽,抖一陣就去沖涼lu~ 以下相片兒童不宜呀!XDD 在迷霧中嘅朗朗,係咪更加sexy呢?(朗朗我對你唔住喇!XD) 原來沖涼嘅霧氣會令玻璃變咗磨沙feel~ 出面可以注視入面嘅情況,咁就可以放心畀小朋友一個人沖涼啦! 大人可以繼續安心咁嘆電視囉!^o^ 我哋準備咗啲嘢食,麵包同飲品留番聽朝嘅! 而零食就係為呢個時候而設~ 零食派對要開動囉! 睇電視梗係要有啲嘢「趙」下先得嘅! 輕輕鬆鬆hea下hea下又一晚~ zZz...Zzz.... 第二天早上,按一下床邊掣,窗簾就自動打開~ 簡直係懶人之選呀!XD 房間景觀望向壽山村同港鐵站,好開揚~ 呢個景好有親切感,事關未嫁之前差唔多日日搭車都會經過呢度~ 以前學車又勁兜呢條路~ 好懷緬南區嘅生活呀!(隨意門please~) 咁啱見到港鐵列車經過,晴朗突然大叫! 殊~ 咁早好多人未起身㗎! 其實列車每日都會經過呢度過百次~ 小朋友就係咁易滿足~.~ 梳洗過後,就開電視邊睇邊食我哋嘅麵包早餐喇! 響呢個時候,發現浴室外原來係有一度手動簾幕~ 拉埋係咁嘅樣,終於解答到晴晴嘅問題喇! 有咗呢度簾,導遊同旅客就唔會尷尬啦! 速食過後,就去到今次旅程嘅重頭戲.... 我哋預備去玩水囉!Are you READY? 危險速逃!晴朗學梗撐木筏呀! 晴朗上船後,就不停loop住瀡滑梯,「玩」真係唔會攰㗎! 朗朗終於肯停下嚟畀我影張相喇! 不過只係維持咗3秒...咁大把~ =.=''' 船嘅另一邊仲有條滑梯,呢條長啲又斜啲㗎!晴晴一副發現新大陸嘅樣子,真係服咗佢囉! 喂喂!唔係咁玩㗎! 其實下面有個掣可以按掣加水~ 當上面個三角形水桶注滿水就會自動倒水~ 不過小朋友總有自己嘅玩法,總之玩得happy就得囉! 跟住就話要鬥快游到岸邊喎!明明呢度水深只去到膝頭哥,佢哋係咪游得好快咁呢? 又可以攞最佳演員獎喇!XD 游游下突然出現大鯨魚,仲好友善咁同我哋玩呀! 海洋多美妙~ 玩得攰就可以抖下,不過抖唔夠一陣又玩過囉!認真冇時停!其實知唔知道影相果個好攰㗎?@@''' 晴晴一於少理,繼續去探索唔同機關~ 仲十分貪玩,不停向哥哥射水添呀! Oh...今次真係救唔到你喇! 泳池總共分咗4個區域,以上係其中一個,亦係最多兒童玩樂設施嘅~ 而呢個池都好啱小朋友玩㗎!水深去到大人嘅胸口位置,池邊由淺至深,而且仲設有按摩池添呀! 大家有冇發現一直唔見我落水?係咁嘅!正當我打算換泳衣之際,竟然發現忘記帶自己套泳衣,認真大頭蝦囉!X_x 不過攤響沙灘椅度望住晴朗玩水,都好relax,好有度假feel呀! 浮板係由泳池提供嘅!之前學過嘅嘢,又可以運用番出嚟喇! 不過唔好以為我哋武功高強!其實都只係學到用浮板踢水階段咋!今個夏天要加倍努力先得喇! 池邊有多張水中沙灘椅,玩得攰又可以攤下,好嘆啫! 泳池嘅按摩池部分令到晴朗不停叫,係咁話好痕喎!Wahaaa~ 鍾意按摩嘅話,可以行過隔離,有個正式按摩池~ 浸響呢個按摩小圓池度,一切壓力盡消,全身放鬆晒~ 最後要介紹嘅係水比較深嘅大人池,小朋友去呢個池玩一定要有大人陪同呀! 都見到好多大人來回咁游直池,咁認真,我哋都冇去打擾喇! 繼續響中池度玩,仲攞埋私伙水槍出嚟玩添! 原來泳池都有提供埋水槍,好多小朋友一齊玩,好熱鬧! 池邊經常有蜻蜓飛過,終於搵到目標喇! 一見蜻蜓就射,玩得幾咁開心呢?^o^ 玩咗3個鐘,開始叫佢哋上水,但係佢哋15分鐘、10分鐘,跟住就5分鐘咁要求加時... 距離check-out時間越嚟越近,真係要番去房間喇! 梳洗過後,我哋把握最後時間欣賞房間外嘅風光~ 攤響大梳化度睇風景好梳乎呀! 酒店有其他主題親子房,不過其實逗留響房間嘅時間唔多,最普通嘅房已經足夠啦! 最後,同門口隻海豚道別,就攞埋鎖匙去check-out喇! 快樂嘅時間過得特別快,又係時間講bye bye! 帶著依依不捨嘅心情回家去~ 回望酒店嘅時候,總係覺得we'll be back!!!^^ 今次旅程由於價錢實在太抵!收工先出發都冇壓力!晴朗爸爸因工作關係,未能一同前來遊玩,拋低爸爸去玩,實在有啲不好意思啊!晴朗開始大個,一帶二去玩都冇咁吃力喇!起碼沖涼、洗面、刷牙同食嘢都識得自動波去做,又會幫忙拎行李,真係輕鬆不少。我哋入住嘅房係最普通果款,酒店有提供威威潛艇、小紅熊森林同埋包包天地嘅主題家庭客房,不過都好快滿,有興趣嘅朋友就要預早訂房喇!如果持有海洋公園年票嘅話,幫襯南海小館同埋Prohibition扒房·酒吧仲會有9折優惠添!酒店總共有三座,暫時只開咗Pier呢一座,等佢開埋另外兩座果陣,我哋都想再嚟玩過呀!晴朗好鍾意酒店泳池,玩咗三個幾鐘都仲話未夠喉喎!已經同酒店要求咗late check-out至12:00,不過如果可以延遲多兩三個鐘就好喇!真係大想頭!臨走本來想去埋兒童遊戲室度玩,但時間真係唔多夠,唯有留待下次啦!今次速遊既抵玩又輕鬆,好開心同回味呀! 最後,講多少少我哋係點樣機緣巧合造就今次旅程啦! 1. 響google簡單輸入"ocean park marriott" 2. 頁面有個位置會顯示晒唔同公司嘅預訂價錢,當時最平嘅係永安旅遊~ 3. 用永安手機apps $785已經包埋稅。輸入房間x1,成人x2,就出到呢個價喇! 其實一向都有留意開呢間酒店嘅價錢,由於前所未有咁平,所以諗都唔諗就即刻book咗!唔知而家仲有冇呢個價呢?不過多啲留意,一定會捕到至抵價,可能仲會平過我哋㗎! 祝各位都可以至抵價去萬豪酒店玩啦!預祝旅途愉快! 精華片段: 香港海洋公園萬豪酒店 Hong Kong Ocean Park Marriott Hotel 地址:海洋公園黃竹坑道180號 電話:3555 1688 官方網址:https://www.marriott.com/hotels/travel/hkgop-hong-kong-ocean-park-marriott-hotel FIND US on:         BLOGs:   CONTACT US: