副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

【小腳板大探索】城門水塘親子遊戲工作坊

星期六早上,晴朗爸爸突然話想去釣魚,問我哋有冇興趣跟埋去。見佢咁有興致,當然捨命陪君子啦!於是我哋就睡眼惺忪咁去咗城門水塘喇!行山郊遊相信大家都去得多,但估唔到原來而家有埋親子遊戲同工作坊玩,好意外!一定要同大家介紹下呀! 藍色線(1)~(6)係我哋今次嘅路線,揸車去到(1)號起點泊低,然後開始起行。如果搭小巴去到城門水塘,落小巴後,向車尾方向一路沿斜路向上行,一樣可以到達(1)號位置㗎!藍色呢段路比較多樹摭陰,幾好行!而粉紅色路線遲少少會再講。(可按圖放大) 早晨呀!報時訊號一響,8點鐘喇!本應唔駛番工可以瞓到黃朝百晏,而家嚟到呢度吸一口清新空氣都唔錯丫!~.~ 今日天氣好好,水塘嘅風景特別靚呀! 晴晴都忍唔住攞起相機不停影相~ 每次經過呢度都會覺得自己好似去咗森林一樣,同大自然融為一體~ 行到去地圖上(2)號位置,有樓梯可以行到去比較接近水邊嘅地方,沿住小路行好有探險feel~ 嚟到水邊嘅風景好靚,晴晴即刻把握時機擺post影靚相喇!XD 晴朗爸爸搵到理想嘅釣魚位置,正向前方果排樹木進發~ 晴朗就欣賞梗湖光山色,對於中間個小島好有興趣,如果可以坐船仔過去視察下就好喇!^o^ 爸爸已經默默釣魚中,我哋都唔打擾佢喇! 天氣除咗好得很之外,仲有陣陣秋風由山上吹落嚟,好舒服呀! 晴朗睇咗陣風景後,都嚷著要爸爸教釣魚,當咗支魚杆係釣魚玩具咁,仲不停哈哈大笑~ 咁嘈吵嘅環境,有魚都嚇走晒啦!@@''' 當過下手癮都ok嘅!XD 坐響石頭上一邊望住佢哋嘻嘻哈哈,一邊感受涼快嘅秋風同優美嘅景色,心曠神怡~ 呢個位置冇乜收穫,我哋就行番上去大路,繼續向山上行喇! 行唔夠5分鐘,又見一條樓梯小路,就行落去睇睇~ 經過兩條要踏上石頭行嘅小水澗路,有啲崎嶇,終於行到另一個釣點(地圖上3號位置)~ 水位有啲高,唔可以繼續向前行,就停低抖抖先啦! 晴朗爸爸會留響度釣多陣,我哋影完相就折返大路,相約響(4)號位置等~ 兩對小腳板行到嚟(4)號位置開心大發現! 看似簡單嘅平衡木遊樂區,對於佢哋嚟講一啲都唔簡單~ 由第一次行到驚驚青青咁,到行多幾次開次熟練同有信心,好有進步呀! 反僕歸真,淨係平衡木都玩咗好耐喇!上次嚟都唔見有平衡木玩~ 如果響行山徑唔同位置增設多啲唔同遊樂設施就好喇! 現在報時10:15~ 行咗兩小時15分鐘先嚟到呢度,當然要好好抖下啦! 獨自享受花草樹木嘅風光,咁寧靚優美嘅環境頓時係屬於我一個㗎!^^ 晴朗爸爸突然傳來一張相片,原來佢已經去到白千層果邊,樹木在水中央嘅景色好特別呀! 我哋就繼續逗留響(4)號位置等候,呢度除咗有平衡木玩,仲有涼亭、公廁、垃圾筒~ 之前漁農處實施咗「自己垃圾 自己帶走」之後,響郊野公園範圍已經好難搵到垃圾筒喇! 我攞住啲垃圾企響垃圾筒面前,諗咗好耐唔知掉唔掉落去~ 再睇埋英文先理解到原來上面果格係收集非作回收嘅垃圾,即係一般垃圾囉! 我誤以為垃圾筒「不可回收垃圾」,好低能呀!XD 同晴朗爸爸會合之後,就原路回程,向地圖上(5)號位置進發~ 半路中途,同晴朗爺爺相約會合,一齊繼續旅程~ 望住三爺孫嘅背影,好有意思~ 跟住菠蘿壩自然教育徑行,就會去到蝴蝶園(地圖上5號位置)喇! 果然名不虛傳,真係好多蝴蝶呀!突然好似去咗世外桃源一樣~ 不過相片顯現唔到蝴蝶翩翩起舞嘅情況,睇片就清楚好多喇! 同時間可以見到咁多蝴蝶,響香港真係好少見~ 離開蝴蝶園後,沿住樓梯繼續向下走,好快就會見到「城門郊野公園遊客中心」(地圖上6號位置)~ 正想快步入去嘆冷氣之際,被門外攤位遊戲嘅義工熱切咁邀請我哋玩遊戲~ 每人一筒膠圈,晴晴負責將圈圈套落唔環保嘅事上,而朗朗就負責套落去環保事情上~ Let's go~ 話咁快就完成!每人獲得行山襟章一個作獎勵,哈哈! 入去遊客中心參觀期間,又有另一班義工熱誠邀請我哋參加工作坊~ 義工姨姨介紹咗一啲昆蟲嘅知識畀我哋,仲玩咗「找找看」小遊戲添! 我哋睇完之後,對唔同昆蟲嘅知識都了解多咗呀! 原來蝴蝶嘅壽命只得兩星期㗎咋!由蟲繭飛出嚟開始計~ 接住落嚟就係蝴蝶小手工製作時間喇! 晴朗都好投入咁整呀! 呢兩個係晴朗爸爸(左)同我(右)嘅作品,晴朗都一致認為我整得靚啲喎!Yeah~ ^^V 之後就繼續響遊客中心四圍參觀~ 呢度有一啲互動遊戲畀小朋友玩,晴晴玩梗嘅係昆蟲常識問答遊戲~ 朗朗就玩梗帶昆蟲同動物回家遊戲呀! 城門水塘最多嘅就係馬騮喇!點樣可以令佢哋響大自然生活得開心自在呢?呢度都有介紹到~ 中心除咗昆蟲、動物知識外,仲會將保育訊息灌輸畀小朋友,帶小朋友嚟行山一定要參觀埋呀! 離開水塘時間係12:30,咁就玩咗一個上午喇!hohoo~ 由於城門水塘係最接近我哋屋企嘅水塘,所以時不時都會嚟行下~ 睇番幅地圖,如果由小巴站開始,沿粉紅色線一路行,圍繞水塘行一圈去到(1)號位置要五、六個鐘㗎! 實不相瞞,晴朗媽媽其實係一名鐵騎士,有時平日放假,都會一個人揸車嚟呼吸下清新空氣㗎! 呢度係地圖上嘅(A)位置~ 如果好彩,仲會見到牛牛添!哞~ 哞~~ 沿住粉紅色線一路行,途經多個燒烤場後,就會嚟到水塘主壩~ 呢度晴朗由細嚟到大,主壩係必到景點呀! 望落去水塘,除咗魚之外,有時仲會見到龜㗎!小朋友都會覺得好有趣~ 嚟行山不妨帶備一個透明盒,話唔定可以同小朋友上埋生物課~ 有次我哋就捉到蚱蜢喇!觀察完之後記得放生啊! 響主壩望到嘅風景係最靚㗎!多啲嚟眼睛都健康啲啦! 晴朗細個好鍾意響主壩度跑,睇番啲相,真係好回味呀! 秋天最好就係去郊遊㗎喇!涼涼哋咁行唔會汗流浹背,好舒服!如果唔係臨時臨急,其實可以帶備一啲食物去野餐添呀!晴朗爸爸有魚牌,所以得閒就會去水塘釣魚。如果大家都有興趣,可以向水務署申請番個釣魚牌呀!本來諗住陪釣魚,點知加插埋行山同親子遊戲活動,行程突然變得豐富咗好多呀!嚟咁多次都係第一次參加遊客中心嘅攤位遊戲同工作坊,負責嘅義工都好有愛心,佢哋仲話下次可以嚟參加導賞服務添!全部都係免費㗎!大家都趁住秋高氣爽,帶埋小朋友嚟玩下啦! 城門水塘 位於荃灣區城門谷一帶,可乘搭專線小巴82號來往荃灣兆和街與城門水塘,而遊客中心就響小巴站附近(地圖上6號位置)。 城門郊野公園遊客中心 查詢電話:2489 1362  網址:https://www.afcd.gov.hk/tc_chi/country/cou_lea/cou_lea_ven/shingmun.html FIND US on:         BLOGs:   CONTACT US: