#Last Update: 8/10/2019 黎到9月尾, 先介紹剛出席的3個產前講座:- 第十二個產前講座: 2019/9/21 uBaby母乳上奶技巧及嬰幼兒語言發展講座(約2小時) 是次講座係黃埔ClubONE搞, 因為有地鐵都算方便. 講返正題, 講座分2部份, 第一部份係由一位陪月員講解下坐月時要注意的事, 仲有餵哺母乳, 上奶技巧, 湯水食療等等, 資訊性都幾豐富, 講者惠子姨姨都講得好好. 第二部份就係講BB係媽媽肚入面時可以點樣胎教, 出世之後唔同階段點樣幫助BB發展學習語言才能, 因為第一次聽, 都覺得好有用, 好有啟發性. 想要BB潛能發展好, 做媽媽真係唔可以懶! 講座開始前, 大約會有10分鐘時間sell下雞精魚精product, 仲有有獎問答遊戲, 今次唔係鬥快舉手, 而係用whatsapp鬥快send答案, 幾有新意, 哈哈. 成個講座我覺得都好好, 資訊好實用, 又多禮物拎. 我最後用會場優惠價買左雞精魚精各一盒, 都有少少combi禮物送. 而廸士尼美語句界嗰隻CD係要係問卷上約時間去了解先會有得送. 第十三個產前講座: 2019/9/21 AEON x Philips Avent 育兒講座(約半小時) 同日下半場就去左Megabox AEON聽育兒講座, 內容都係講餵哺母乳技巧同介紹下Philips Avent的產品, 半小時講座好快完, 拎埋禮物就係AEON買BB野, 依家全線AEON BB野都有折, 真係幾抵買. 禮物內容唔多, 但好實用, 係奶咀&奶樽, 又可以比BB試多個牌子啱唔啱咀型, 正! =D 第十四個產前講座: 2019/9/22 雀巢防敏1000天準爸媽湊B實戰坊 (約2小時) 雀巢呢個講座安排幾有彈性, 事關我本身係抽中左9月頭的講座, 但因為臨時有事去唔到, 打電話去改期(即係今次呢個)佢地都比, 而且唔駛再抽籤就比我出席. 講返呢個實戰坊, 雖然話實戰但並唔係有個BB比您practice, 而係現場有5位陪月姨姨係現場做示範點樣幫BB沖涼, 好處就係可以近距離見到姨姨D動作手勢. 但我覺得做示範嗰位姨姨做得唔係幾足, 佢幫BB洗頭沖涼, 但竟然無幫BB抹面仔...><..anyways.. 講座第一部份係關於媽媽產前產後飲食, 點樣可以減低BB敏感機會. 第二部份就係關於坐月. 而咁啱講者就係早一日嗰位陪月員惠子姨姨, 但有趣係佢講嗰個powerpoint係同之前完全唔一樣, 雖然內容都係講坐月, 但感覺無早一日咁資訊豐富. 可能內容會因應唔同講座而變. 場內仲有一個counter係玩遊戲換禮物, 禮物係一張包被仔. 另一邊有個counter係買雀巢DHA, 買滿某個金額/盒數會有BB床上用品送. 完晒成個講座填返SMS入面嗰個問卷調查就可以出去換禮物喇~ 老公話嗰個紫色袋好肉酸, 哈哈哈 XDD 9月最後一星期, 我依然好勤力出席左3個講座~ 第十五個產前講座: 2019/9/25 卡洛塔妮媽媽講座 (約1小時) 卡洛塔妮係羊奶粉商, 未去講座之前都唔係太了解呢個品牌. 原來羊奶引起BB腸胃敏感比起牛奶的機會係相對低D, 所以如果BB對牛奶蛋白敏感, 都可以一試羊奶. 講座第一部分係由營養師講解如何防止BB食物敏感, 都同之前D講座大同小異. 而第二部分就由同一位講者示範講解點樣同BB按摩. 我個人覺得呢part幾好, 比起之前雅培講BB按摩內容更加清楚同豐富. 除左邀請爸爸媽媽上台一齊示範, 講者會叫台下觀眾一齊跟住做動作, 令大家印象深D. 1小時講座好快完結, 填完問卷就可以拎禮物走人. 今次禮物係BB車掛袋, 計埋之前拎ge依家已經有3個掛袋, 點用得晒, 哈哈. 第十六個產前講座: 2019/9/28 衛生署公眾講座「懷孕及哺乳媽媽適飲適食」 (約1.5小時) 呢個講座係政府舉辦的公眾講座, 係無禮物的. 但佢D內容都幾實用, 想知多D懷孕資訊的媽媽可以上衛生署網站了解多D, 佢仲會有關於BB加固/小朋友飲食ge講座, BB出世之後都可以去聽. 有一樣報名事項要注意係, 佢唔係email/SMS通知登記成功與否, 反而係無通知就等於成功登記, 貫徹政府一向做法, 無消息就係好消息. 第十七個產前講座: 2019/9/29 Wondermami 孕賞日 (約2.5小時) 由Wondermami主辦單位, 當中有好多唔同參展商, 例如修身紮肚, BB用品, 廸士尼美語世界, 孕婦拍攝, 魚精, 藥廠代理等等. 講座開始前半個鐘, 大家都係圍繞住參展商D booth去吸印仔換禮物, 好墟冚! 甚至連講座開始都仲有好多人未坐低換緊禮物. 講座有好多部份, 分別有幾個參展商上台介紹佢地D product, 講完一輪當然有有奬問答環節. 而全個講座主要就係由一位資深陪月員講下坐月時ge Do's & Don't. 完左講座仲有一part Bingo環節, 我見中奬禮物都係一箱一箱咁送. 好吸引呀, 可惜我中唔到 ><! 完場之後仲有一份禮物包可以拎, 正. 整體黎講, Wondermami呢個孕賞日主要就係去拎禮物, 哈哈. 大家有機會記得參與, 踴躍答問題拎奬品. 好喇, 9月份產前講座分享就去到呢度, 跟住我會繼續分享10月份講座~ 多謝收看 =) 10月最新講座分享都出左喇, 如果想重溫之前的媽媽講座分享可以click以下連結:- 2019年8月媽媽產前講座分享 https://mamibuy.com.hk/talk/article/77957 2019年9月媽媽產前講座分享 (上集) https://mamibuy.com.hk/talk/article/78251 2019年10月媽媽產前講座分享 (上集) https://mamibuy.com.hk/talk/article/79198 2019年10月媽媽產前講座分享 (下集) https://mamibuy.com.hk/talk/article/79549
