副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

《QE》13小時催生順產過程上集

鋼牙b係41週催生出黎,係39-40週時我每日都期望會自然穿水見紅,但鋼牙b完全唔想退房

鋼牙b係41週催生出黎,係39-40週時我每日都期望會自然穿水見紅,但鋼牙b完全唔想退房 催生當日一早6點就起身沖涼去廁所去得乾乾淨淨,我唔想篤屎同鋼牙b一齊出世,攪掂曬拎埋走佬袋就同老公去M記食個珍寶套餐,然後就搭的士去醫院 去到醫院8:30左右,做一輪入院手續就要同老公講byebye,姑娘話落得產房時先打電話叫老公返黎陪產,咁姑娘就是但搵個床位比我訓低量胎心,10:45有醫生黎檢查宮頸,原來檢查宮頸都唔少野,痛到我標曬冷汗,因為醫生隻手都對得好入下,然後又左右郁動,個過程係非常唔舒服,不過檢查完有好消息都值得 醫生話:宮頸成熟,唔使塞藥,產房有位就落去吊催生藥家啦,bb一定會今日5號出世 我心諗,順順利利咁應該好快生到鋼牙b啦 做完檢查就訓係床到等,雖然肚餓但姑娘話唔可以食野,唯有頂硬上啦,生完食餐好ge! 11:45終將有姑娘黎種豆,我一向唔會對公院拮針手勢有好大期待,但求入針個時唔好出出入入咁搵血管我己經好開心,依位姑娘一入針我d血就叭曬出黎,手背,床單,被同地下都係血,嚇到行過的醫院嬸嬸衝埋黎問咩事,個姑娘係咁say sorry,我話「唔緊要啦,你都唔想」,依位姑娘都返左黎睇我幾次,檢查隻手仲有無流血,都好盡責家啦! 都中午12點,產房終於有位,即刻打比老公叫佢去產房門口等,我依邊就由醫院嬸嬸帶住行過去,去到產房門口老公要著個套防菌衫 ,而我就被帶去產房訓低駁胎心機同埋落催生藥,13個鐘頭順產過程就開始了⋯⋯⋯⋯