副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

曉桐出世日

預產期原先訂係2019年6月9日,但寶寶實在太迷戀媽媽嘅肚腩,一直遲遲唔肯出嚟。 最後同醫生約好6月12日自行入仁安醫院進行催生! 當日朝早同老公懷住戰戰兢兢嘅心情拎住走佬袋同拎齊入院文件渣車去仁安醫院check-in。 記得好神奇咁當晚已經突然有少量出血,睇嚟寶寶都知道自己係時侯要出嚟嚟個世界啦。 去到reception時講起有輕微出血後,職員就即刻叫我坐上輪椅推上產科。 到產科做基本登記時我先有機會拎封催生入院信比姑娘睇,姑娘就安排我去廁所小便測試有冇穿羊水同隨即比手術袍我著上準備催生程序。 好快就訓上左待產室嘅病床上,等姑娘嚟我幫我接種同接駁儀器監察住我同寶寶嘅心跳,同埋胎動嘅程況。 老公係護士站辦好手續就入嚟陪我。過左陣就有姑娘帶手套嚟伸手入去check我宮頸夠成熟未。 痛嘅程度絕對係難以形容,直情係覺得有野係入面360度環迴大旋轉嘅痛。過左陣醫生又嚟左幫我check同埋人手穿水啦。 見到醫生係將一支棒伸入去一篤就穿左羊水啦。又係激痛激痛!但醫生同我講之後只會更加痛,叫我忍耐...... 但宮頸一直開得唔夠大,姑娘又要人手撐開d加快開宮頸。陣痛的確係密左好多同埋劇痛左!! 初頭諗住唔用笑氣,留返之後更加痛時先用。但姑娘檢查完後提醒我要用笑氣,因為我忍痛時將全身拉緊左,只會阻礙左宮頸打開,所以要我用笑氣減輕痛楚。但陣痛一波波一波波咁嚟,愈嚟愈密,個人又全身勁熱,用笑氣係完全覺得起唔到著用。 老公一直係我身邊捉住我隻手陪住我,媽咪阿妹都嚟左睇我.... 當由訓上床打催生針後,一直痛左7個鐘,當姑娘再嚟檢查時只係開左1度,當時個人係已經崩潰左。 痛左7個鐘都只係開左1度,點等到10度!? 當陣痛稍停左個一刻,我望住老公話真係好痛,可唔可以開刀.... 於是老公就同醫生講我想轉開刀。 最後醫生入嚟問我係咪真係轉開刀,我就話係...唔想再無止境咁痛落去啦。 當我媽咪聽到我選擇轉開刀時,佢即刻心情輕鬆哂,因為佢一直想我開刀覺得順產太辛苦啦。 當決定開刀後,好快姑娘就入嚟推我落去手術室等,等嘅過程都係繼續有陣痛,雖然姑娘有提及過拔左催生針後應該會減少陣痛。 終於等到推入手術室,個刻心情係好輕鬆!無耐麻醉師就入嚟要我彎住個身好似一隻蝦咁,叫我唔好郁要係我背後打麻醉針。 好神奇咁真係好快就下半身係無左感覺。轉頭老公就入左嚟係我隔離陪產啦! 我地兩個仲係度閒談左幾句,突然聽到寶寶喊聲,寶寶咁就嚟左嚟個世界。 姑娘抱住寶寶去房最後嘅保溫箱度,亦叫左老公去剪臍帶。 跟住就老公就跟左bb出去,我一直訓係手術床上等醫生聯針,印象中好似過左好耐先搞掂,推我出手術室時我仲見到老公媽咪阿妹一直係手術房外面等我。 推到返上病房後,其實唔係好倦,個人係好清醒,但始終有傷口,當日係全日就插住尿喉咁唔可以落床同唔比飲食。 寶寶都因為要另行去保溫,4個鐘頭內都唔可以睇。 夜晚我老豆,老公一家都嚟左探我同寶寶,當晚迷迷糊糊咁就過左。 等到第2日姑娘嚟抆尿喉可以飲食,陪月又嚟左醫院拎野食同湯比我,又扶我落床,落床個刻真係痛到痴線!!! 但幸好傷口其實第4日已經好好多,行路已經快好多! 一行到就即刻去bb房睇寶寶!夠鐘餵奶嘅時間又慢慢咁行去餵奶,第一次抱起寶寶嘅感動。 因為寶寶出世都有7磅,所以抱上手唔輕都唔太細粒嘅感覺,可以好安心咁抱住佢! 就係咁,好快就係醫院過左5日就出院啦!