副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

寫寫「世上沒有怕老婆的男人,只有尊重老婆既男人」

喺電影葉問當中,一直有句對白我好鐘意,「世上沒有怕老婆的男人,只有尊重老婆既男人」。前一句,我明。但後一句,直到陪完太太入產房然後初為人父我先體會到尊重真係必需嘅。

喺電影葉問當中,一直有句對白我好鐘意,「世上沒有怕老婆的男人,只有尊重老婆既男人」。前一句,我明。但後一句,直到陪完太太入產房然後初為人父我先體會到尊重真係必需嘅。 回想起太太懷胎十月,滿懷戰戰兢兢心情被移送入產房。凌晨四點幾收到太太喺醫院打黎,之後火速衝入產房陪產。喺度數開得未夠但陣痛加劇加密之時,我除左善用分娩按摩班學果幾招手法同扮鎮定之外,就只有望住心電圖提太太準備下一次陣痛。據聞陣痛係十級痛,利害過骨折。雖然我未試過骨折,亦無緣一試陣痛,但太太平時忍到痛都搣到我手都瘀埋,我就知佢呢刻真係痛到要爆出黎。 我哋以為懷著樂觀總有轉機,可惜事與願違。幾位醫生輪流檢查後都認為度數仍然開得未夠,經過討論後建議開刀做手術。趁太太仲未痛到暈之前我哋達成共識,決定簽字做手術。我好記得當日離開產房前回頭望向太太,作一個類似電影橋段式既回頭告別,但果幾秒我淨係見到好多血既畫面。如果人生要選十個令我記一世既畫面,呢個絕對係其中一個。 就係禁,多謝親朋好友嘅祝福,我小朋友有驚無險地來到呢個世界。而我太太,為我同小朋友流既血同捱左嘅呢一刀,真係將生命作賭注,留下了英雄故事。 然而,俗語話一個完結就係迎接另一個開始。照顧小朋友又係另一個大課題。太太決定做母乳媽媽,給小朋友最佳的營養。喺未戒夜奶之前,每一日都係極具挑戰性。為求奶路亨通,太太每日瘋狂飲用上奶湯水,亦要同小朋友好好配合,隔二三個鐘就要餵一次奶同氹訓覺。日以繼夜、夜以繼日,產後坐月得不到充足休息,會影響往後嘅身體健康。而我,既然泵奶係呢世仔都做唔到,唯有包辦家中嘅大小家務,好讓太太叫做有多少少作息時間。 一般新手父母未完全了解初生嬰兒的需要,我哋都唔例外,有時仲會因為各持已見而有小爭執。忍耐真係必須,有一次我成功爭取小事化大,然後令太太壓力爆煲,哭成淚人。事後回想在地球唯獨你愛我這廢人,介意微塵之事實屬不智。 既然有個女人肯為你忍受痛楚同捱一刀,亦甘願犧牲作息時間同健康,甚至斷送嘅青春或者工作發展的機會,都會為開你開枝散葉。作為男人,做多做少仲有所謂咩?尊重,其實真係好基本。 今次寫既其實係好認真既分享,寫到禁輕鬆只為吸引作為讀者嘅你可以由頭睇到尾。 完! 寫在夜闌人靜而太太在旁泵奶的泥圍爸爸 Facebook Page:泥圍爸爸的育兒時光 (https://www.facebook.com/laiwaipapa/) 歡迎大家Follow Facebook Page,多謝支持!