大鄉里出城，第一次去住迪士尼嘅酒店，皆因前排推出港人優惠，$990可住一晚 迪士尼探索家度假酒店 (星期一至四入住)，好似話真係好抵～由於想慳一日假，咁就揀咗星期五入住，$1199（+$119服務費）。 迪士尼三間酒店都係喺同一條直路，住其中一間都可以享用埋另外兩間嘅設施。每間酒店都有一間playroom。Check in嗰日我哋就急不及待參觀晒所有酒店～   迪士尼探索家度假酒店：海底奇兵小天地 ★★★✰✰ 香港迪士尼樂園酒店：童話天地 ★★★★✰ 迪士尼好萊塢酒店：馬里布遊戲室 ★✰✰✰✰   先係　探索家　嘅playroom（開放時間：0900-1245；1500-2145），我哋兩點嚟到已經可以上房，放低完行李就落嚟玩3點嗰節。Big爸唔記得帶襪嚟，好彩可以即時喺隔離café度買，盛惠$25。 依間遊戲室以海底世界做主題，旁邊嘅長椅放咗好多海底角色同海洋生物嘅公仔。有半隻船造形嘅滑梯兼小繩網，不過Big都未夠歲數玩。隔離有個低B板小滑梯，但Big始終都唔夠膽sir。 其他玩具方面，就有幅牆可以俾小朋友插啲一支支唔同顏色入去、有超大版MEGA BLOCK。 玩緊期間，職員有問我哋參唔參加聖誕大合唱遊戲，但原來要出去參觀啲聖誕裝飾，仲要行成20分鐘，所以無帶BB Big出去，之後佢哋參觀員會返嚟著聖誕袍唱聖誕歌，嗰時我哋就再抱返Big去join返。開頭Big拎住個搖鈴聽到音樂時好開心，仲喺度搖，但當其他小朋友一齊唱首歌時，佢應該好驚，完全唔敢郁，呆咗好耐。每一節玩45分鐘後就會清場做個小清潔(我望咗陣好似係執一執位放返好晒啲玩具，唔知有無拖地呢～)。 清潔度：★★★★✰ 玩具種類：★★✰✰✰ 大型設施：★★★✰✰ 主題環境：★★★✰✰   喺 好萊塢 食完夜晚嗰餐自助餐後，我哋去咗嗰間酒店嘅 馬里布遊戲室（開放時間0900-2200），依間嘢，其實一眼睇晒，得幾部冒險樂園嗰啲機動遊戲，唔洗錢玩嘅，有部夾糖機就要俾錢買代幣玩嘅。但就算唔洗俾錢嗰啲都唔太想玩，有個掉波波的機，啲波波得返幾粒，唔知邊個掉晒啲MEGA BLOCK入去，都無人執嘅。另外有個小corner有playmat，似乎係俾小朋友除鞋入去玩，有幾個小廚房，但所有玩具都好似黏痴痴咁，好污糟。而且無職員在場，大家都係自己自律，自己決定喺度做啲咩。 清潔度：✰✰✰✰✰ 玩具種類：★✰✰✰✰ 大型設施：✰✰✰✰✰ 主題環境：✰✰✰✰✰   影咗幾張相就諗住逃跑去 迪士尼酒店嘅 童話天地，每晚2000-2045有故事環節！不過我哋一行出 好萊塢 個花園，遇見露天影員。小朋友可以坐喺小跑車入面睇迪士尼卡通，仲要係播緊Big媽細個時Big公公會去租鐳射碟俾我哋睇嘅同一套卡通，即刻唔捨得走，又坐咗陣。 之後我哋就行海旁條路去迪士尼酒店，去到時已經2100了，故事已經完晒了，可惜！！！不過依個playroom以童話故事為主題（開放時間：0900-1245；1500-2145），光線比 海底奇兵小天地 柔和，成個感覺好舒服。依個playroom有好多小玩具，放晒喺兩個架度俾小朋友拎嚟玩，又有一架小船、小城堡滑梯，同埋廚房仔。中間仲有電視一直播緊卡通。 清潔度：★★★✰✰ 玩具種類：★★★✰✰ 大型設施：★✰✰✰✰ 主題環境：★★★★✰