副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

嚇死人@菠蘿包入院記❤️

12月17號朝早發現菠蘿包發燒,佢睇醫生後食左一日退燒藥都未退到燒,18號零晨2點時候更加升到40幾度高燒,菠蘿包媽驚會再燒得更高所以拍醒菠蘿包爸去急症室。因為都怕會住醫院執定入院用既野,唔洗入院咪最

12月17號朝早發現菠蘿包發燒, 佢睇醫生後食左一日退燒藥都未退到燒, 18號零晨2點時候更加升到40幾度高燒, 菠蘿包媽驚會再燒得更高所以拍醒菠蘿包爸去急症室。 因為都怕會住醫院執定入院用既野, 唔洗入院咪最多拎番屋企, 菠蘿包媽就即刻執哂要用既野。 菠蘿包爸嚇到呆左唔識幫手=_= 菠蘿包: 十幾條尿片,紗巾,沖涼液,臭被,最愛既幾件玩具,暖水壺(三歲以下安全起見唔會提供水放床頭櫃,bb要水就要問姑娘拎) 菠蘿包媽: 好厚既褸(病房一到夜晚就好似雪櫃咁),一盒紙巾,一枝水(醫院只提供bb飲用既水),差電既尿袋(兒科比較嚴d唔可以用佢地既插頭差電) 9秒9執好哂野就即刻去急症室, 好彩唔多人登記完就可以去分流站, 菠蘿包媽講左菠蘿包既情況之後護士分流緊急。 等一個鐘就可以見醫生了, 同醫生講番菠蘿包既情況, 醫生再睇佢d超多既病歷就驚會係罕見病引起發燒建議照x光照肺即刻入院檢查。 從來都冇預計醫生會講呢樣野, 頓時心情掉到落谷底,真係好想喊好想喊。 照完x光係到等安排上房, 5點幾可以上隔離房休息, 訓左一陣主診醫生就黎睇菠蘿包, 主診醫生懷疑係上呼吸道感染, 留左鼻液仲未出報告都係暫時觀察下! 見到菠蘿包好辛苦爸媽都好心痛。 又過多陣有位高級醫生黎睇菠蘿包, 高級醫生話佢有腎漲驚會係尿道炎引起發燒要驗尿睇下有無事! 三位醫生講既野都唔同,呀媽我真係好亂邊樣先係真呢? 到左夜晚護士話鼻液報告出左, 唔係流感又唔係幾隻惡菌(唔記得左叫咩菌) 但仲有十幾項報告仲未有, 因為唔係流感所以可以轉去普通病房! 19號隔離床嗰兩位朋友仔可以出院, 菠蘿包無得出院佢開始扭得好勁又訓唔到教, 主診醫生見到咁就提出比菠蘿包番去度假, 呢個時候菠蘿包仲未退到燒都擔心番到屋企有事咁點算, 護士就解釋醫生會開枝退燒藥番去, 度假原來係醫院會留番個床位係到, 有咩突發事即刻番黎病房唔洗去急症室等! 無事既話就每朝9點番黎見醫生! 龍床不及狗竇何況嗰張係病床, 當然菠蘿包媽即刻答應, 番到屋企即刻開心哂! 20號番醫院見醫生話鼻液報告出哂, 菠蘿包係腸病毒引致發燒唔退, 無藥物可以食要靠自己先可以打勝仗, 醫生話腸病毒可以好簡單經口水飛沫傳播, 即係企係本身有腸病毒既人隔離佢突然之間咳或打個乞嚏無遮住個口,然後你索咗入個鼻度咁就中咗招。 番到屋企菠蘿包就肚屙左4次就退左燒, 而我就比菠蘿包傳染左無發燒但係都屙左幾日, 個人真係好辛苦真係好明白點解菠蘿包會咁扭計! 突然我就醒起15號星期日帶菠蘿包去玩, 聽到有個婆仔話佢個孫琴日發燒肚屙左4次, 今日先無事所以同個孫出黎行下, 而婆仔個孫就係同緊菠蘿包玩緊, 心知不妙已經同菠蘿包即刻走人, 唉,雖然唔知係咪婆仔個孫傳染, 前一日病到咁樣都仲帶佢出街,點解唔比佢係屋企休息下呢? 23號菠蘿包已經退左燒可以正式出院啦! 身上出左好多疹醫生講係正常架! 慢慢會消失! 係呢到好想多謝威爾斯11M&11K病房既醫生護士姑娘同姐姐, 佢地對菠蘿包好好又好錫佢, 多謝你地細心既照顧菠蘿包先可以咁快好番! 特別多謝菠蘿包嘅主診醫生(醫生自我介紹完我地都唔記得左姓咩了)佢見到菠蘿包未退到燒叫幾個教授黎睇下菠蘿包既情況,雖然菠蘿包佢瞓咗教授睇唔到症。。 ~~~~~~~~~~~~~~~~~~~~~~~~~~~ 咁多位靚姨姨~聖誕節快樂!