副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

【 安妮媽媽第一胎3.5小時生產記錄】

【  安妮媽媽第一胎3.5小時生產記錄】 

【  安妮媽媽第一胎3.5小時生產記錄】  *2017年3月* 零晨5點從夢中驚醒,夢見自己穿水,醒後原來真係已經穿左水,即刻叫醒老公。 老公扶左我落床後,羊水不停流出,開始見紅,情況真係好狼狽,要用好多毛巾墊住地下,叫醒埋奶奶後就執拾好入院袋。 打電話通知媽咪,同老公落樓搭的士去QE。 到醫院時直接去B4產房,老公幫我落去登記入院,媽咪係出面等我。我就入去做檢查,磅重後訓上病床,聽bb心跳,放鴨咀做內檢,好痛!檢查好哂之後姑娘叫我去C2產前房。   入到C2產前房,屋企人唔可以陪伴,我就要訓上床駁機聽bb心跳半個鐘,當時未開始陣痛,只係見紅多左。7點幾姑娘黎到幫我內檢,第一次內檢都唔係好痛,可以忍到,姑娘話第一層宮頸已經軟化,但未開度數,話我已經穿左水,問我打唔打催生針,如果打就即落產房催生,如果唔打就要等自己陣痛作動,但穿水24小時後要打抗生素,bb出世都要打,同屋企人商量後決定打催生針,簽左同意書後,醫生就黎幫我係手背打針種豆,枝針好粗真係超級痛!插得好深! 執好行李就準備過產房,有個姑娘帶我過去,姑娘叫左老公係出面等我。入到產房門口先對名字,探熱。之後就上床駁胎心機,睇住班助產士係我隔離好忙咁睇數據寫記錄,我就開始覺得好驚,驚到雙腳不停地震,個實習姑娘見到我咁驚就不停安慰我,叫我放鬆,但我真係放鬆唔到,係咁震。。。。 半個鐘之後,醫生入黎檢查,幫我人手穿水,原來人手穿水係唔痛的,只feel到有一大攤水係下體再次流出,姑娘幫我墊好床墊。之後醫生話開始幫我落第一次的催生藥,同我講因爲我係第一胎,陣痛時間會係8至10個鐘,開頭會10至15分鐘痛一次,如果催生唔成功就要開刀,果刻真係勁驚,超唔想食全餐! 隔左陣,老公就入左黎陪我,我個心好似當堂安心左好多,見到個熟悉的臉孔都無咁驚!姑娘教我聞笑氣,話我一覺痛就可以用。初頭都頂得住,無用到,仲可以同老公傾下計。點知幾個字之後陣痛開始加劇,差唔多5分鐘痛一次,同醫生講的10分鐘一次差好遠囉!痛楚都慢慢增加,有時傾傾下計都會痛到要聞笑氣,但都頂得順。 一個鐘之後,痛楚再次加劇加密,已經痛到講唔到野,不停聞笑氣,聞到頭暈眼花,有時痛到自己都放唔到個機去個口度,要老公幫手。老公仲話見到儀器上的顯示,知道陣痛已經去到80,幾分鐘一次,但我已經無力回應。。。。 突然姑娘入黎話對面床有產婦要共用產房,叫老公出去先,要問下個媽咪願唔願意俾老公陪我,我聽到真係勁唔開心!果刻好想喊,好想叫老公唔好走,好驚之後的時間要自己一個捱落去! 老公出左去之後,助產士又再幫我落第二次的催生藥,之後陣痛又再加劇加密,已經去到2分鐘一次,有幾次痛到真係想喊出黎,成條尾龍骨,成個肚都勁痛!勁痛!咩姿勢都無幫助,笑氣都無幫助!助產士見我咁痛就話幫我打枝止痛針,但原來枝止痛針係勁廢的,一d作用都無! 隔左陣,有幾個醫生入黎,其中一個幫我做內檢,我果陣已經痛到暈暈登登,連笑氣都忘記用,要個姑娘幫我!呢次內檢真係超級無敵痛!feel到醫生成隻手係入面係咁摸,痛到大叫!但好消息係醫生話我已經開到6度,仲話我的陣痛好規律好密,佢地唔走住,睇多我兩次陣痛先。兩次陣痛後醫生再幫我內檢,又係無敵痛痛痛!今次醫生話已經開到8度,可以試生!我隔離個助產士好驚訝咁問我第幾胎?我答第一胎,佢話我的產程都幾快! 姑娘好快速將我的床變做生產床,拎走左部笑氣機,幫我插氧氣管係鼻,之後將我對腳放上腳架,叫我試生,我果刻突然好清醒咁不停問我老公呢?佢可以入黎未?姑娘話已經通知左我老公,叫我先加油! 醫生叫我一feel到陣痛就用力,教我點用力,但我果時已經痛到咩都聽唔到,用錯哂力,俾醫生打左一下大脾,叫我望實佢睇佢示範,我真係覺得好無奈。試左幾次就見到老公番左入黎,佢坐係我隔離幫我打氣,教我用力。 唔知試左幾多次後,突然全個產房的姑娘變得開始緊張,有個助產士坐係我前面,其他姑娘幫我係下半身放上綠色的消毒布,更提醒我地唔好掂到,我突然feel到下體俾人打左枝針,我諗應該就係麻醉針,之後要剪會陰,但我個肚已經痛到感覺唔到俾人剪左。 陣痛再次黎,助產士再次叫我用力,我每次都要出盡全力去all,仲要時間越長越好,開始聽到姑娘話已經見到bb頭仔出緊黎,果刻我更用力,好想快d生出黎! 最後一次用力時,助產士叫我出盡全力唔好透氣,我feel到好似有一大舊好硬的頭出左黎,之後就係好滑的身體,生左出黎真係成個人鬆哂! 因為對面床的媽咪要生,所以老公快速睇左BB兩眼之後就俾人趕左出去。助產士將BB放係我眼前,問左性別之後就幫bb抹身。 之後幫我按肚排胎盤出黎,按左幾下勁痛勁大力之後胎盤就滑出,原來胎盤係咁大舊的! 姑娘將BB放係我心口肌膚之親,BB好溫暖好細粒,見到BB係我面前真係好想喊,好感動!之後半小時就係會陰鏠針時間,雖然打左麻醉針,但都覺得好痛,又會feel到d線拉黎拉去,但有BB陪伴已經無所謂了,痛就痛吧! 傷口處理好後,老公就再番入黎產房陪我,姑娘幫我地影左第一張全家福,老公又有幫仔仔影左幾張相,姑娘幫仔仔檢查磅重,仔仔重6磅3。 我過床後準備番產後房,仔仔由我自己抱番,老公係門口等我,一出產房就見到媽咪同奶奶,一齊搭電梯上去。我可以經捷徑到產後房,佢地要自己行過去。 到產後房,BB俾姑娘抱走做檢查,我就自己過床,係超級困難的,因為傷口實在太痛....... 由於過左探病時間,所以親人只可以留10分鐘幫我執拾物資,媽咪同奶奶入左黎,我果刻其實想見到老公多d! 媽咪快速餵我食幾口甜粥,幫我整定d炒米水,幫我拎哂d用品出黎就要走。 佢地走哂之後,仔仔好快就番黎我身邊,我果時未可以落床,又剛生完,無哂力又頭暈,所以好快就訓著休息了! 休息過後先可以冷靜地回想生產的過程,見到仔仔係身邊都仲好似發緊夢一樣,一切黎得太快,心情未能平復,太感恩成個生產過程都順利進行,雖然真係痛入骨,但這個永遠無法忘記的痛我覺得好值得! 多謝我的小寶貝平安健康來到爸爸媽媽的身邊,我地愛你! ———————————————————— 歡迎連絡安妮媽媽: Facebook專頁: 安妮媽媽親子日記 IG: @Annie_mama_diary | 安妮媽媽親子日記