整到手殘既手工蝴蝶粉、貝殼粉 有3種味，南瓜、紫薯、菠菜 超簡易麵團製法，只需麵粉+蔬菜就做到 因為係即興整，家中有咩材料就整咩色，所以...我既食譜係冇份量 材料：南瓜、紫薯、菠菜、中筋麵粉 有冇發現，平時跟開人地既食譜，做出黎都總係唔成功？ 做麵團其實好簡單，唔好再死記幾多g粉幾多g水，每隻麵粉既吸水性麵不一樣，每種食材既水份亦有多有少，麵粉與水/食材既比例都會因而不同。 只需掌握點搓成團， 之後整其他包點都好容易，配合唔同食材可以有好多變化，唔洗下下死記落幾多材料。 麵團做法： 今次整既蝴蝶粉、貝殼粉麵團顏色來自配搭既食材 南瓜、紫薯分別食切件蒸熟，用叉壓成蓉 菠菜切小段水焯（**建議水煮，因為菜葉既亞硝酸鹽含量高）水滾後煮4-5分鐘左右撈出備用 材料待涼後加入麵粉，南瓜/紫薯/ 菠菜與麵粉比例大概1:5、1:2、1:4，因應水份再加減。 *紫薯水份較少，太乾可加少少水搓 各自用筷子攪到有綿絮狀就可以落手搓（覺得乾就ᗪ加水，覺得濕就加d粉，最緊要少量多次） 搓成團，少少硬都唔緊要、樣衰唔光滑都冇問題 （之後會變得愈來愈軟、愈來愈光滑） 保鮮紙蓋住醒發20分鐘，再搓3-4分鐘，再醒發一個鐘  （**如果想令麵團煙韌，中途每隔20分鐘就搓3-4分鐘，然後又等醒麵，如此類推，適合整餃子皮、雲吞皮、麵類）   擀皮： 醒發完既麵團，分兩份（一份整蝴蝶粉，一份整貝殼粉，如果只做其中一樣就一個麵團夠啦） 蝴蝶粉 用擀麵棍擀薄，每次灑少少麵粉於表面防止黐，擀到想要既厚薄度就可以開始 家中如有曲奇模（花邊形）就最簡單，用模印出圖案，用筷子對邊一夾就可以夾成蝴蝶形狀 貝殼粉 將醒發完既麵團切細舊（一口既份量）逐舊放上捲壽司既竹簾片上一碌就成形啦 完成後，若唔係即時食可以風乾保存，我既做法係用氣炸鍋低溫（80度）焗3-4分鐘左右，放涼後入罐裝好，可以食3-4日都冇問題。   **如果想好食啲、香啲，可加蛋、可少量鹽，麵粉比例再自行調節，總之攪到有綿絮狀就開始搓粉，不過要留意蔬菜遇到鹽會出水，所以搓麵團時要比多少少粉