其實本身我個人性格都好開朗， 但產後一兩個月都有輕微產後抑鬱嘅狀況出現，奶奶日夜追魂call真係搞到我精神好緊張， 呢個時候不得不讚下我老公呢個神隊友， 老公嘅支持同埋幫助真係好重要， 所以我都好好彩好快就冇事啦! 但我身邊有好多嘅朋友或者媽媽group入邊嘅媽媽就冇咁好彩, 有好多時奶奶話幫手，但結果係越幫越忙，搞到自己仲更加大壓力， 須知奶奶易請難送，真係搞到人都癲，唔壓力爆煲就奇啦！   以下幾點希望大家諗清楚先決定需唔需要奶奶幫手： 1. 奶奶的衛生問題 呢個問題我好concern, 因為我奶奶正正就係千年難得一遇，污糟到想死嘅例子 照顧BB真係衛生好重要，如果呢關搞唔掂，真係奉勸大家千其唔好搵奶奶幫手！ 2. 奶奶容易相處嗎？ 生完其實媽媽好需要休息，好嘅奶奶幫到手媽媽就梗係多啲時間可以休息，但係相反一個難相處嘅奶奶係你屋企由朝對到晚，其實你真係比死更難受！萬一佢照顧BB方法樣樣同你打對台，你要照顧阿B之餘仲要應付奶奶，其實真係百上加斤，自己搵自己笨！ 3. 奶奶識唔識湊BB 千祈唔好講你老公都係奶奶湊大，點會唔識姐？！須知以前嘅湊仔方法同宜家好唔同！以前唔使湊，自生自滅嘅大把！我奶奶好經典係其實佢係咩都唔識，但又要成日教你！但教你嘅野10樣有9樣都係錯嘅！仲要係佢d fd（三姑六婆）個個教佢，拼拼湊湊集大成咁學返黎！問你死未？！所以唔係話你唔信佢，但你真係要考考佢，睇佢係咪真係識湊B, 如果唔係你仲要教佢、睇住佢、擔心佢，其實仲攰! 4. 萬惡的錢 有啲奶奶錢字行頭，講錢大過天！你叫佢幫你手湊B，佢開天殺價，想食咗你隻車????????‍♀️到頭來你不如請個工人或者陪月姨姨仲好！起碼你鬧得炒得，又唔使激死自己都要忍忍忍！   所以大家搵奶奶幫手之前真係停一停, 諗一諗! 身邊有太多嘅例子, 我怕大家後悔莫及! 仲有就係無論情況幾差, 最重要係叫老公出面解決, 好多野新抱出聲就死罪黎架啦! 一個神隊友幫你處理, 佢講一句好過你講十句!!!