副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

萬萬估唔到會早產3個月!

「你BB有幾下心跳跌到60幾,唔好再冒險等啦,今日開刀拎個BB出嚟啦!」

「你BB有幾下心跳跌到60幾,唔好再冒險等啦,今日開刀拎個BB出嚟啦!」 終於,留院第9日的朝早,我要開刀生了!(留醫嘅9日中都見唔少生仔cases,有機會再寫出嚟) 雖然入院果陣醫生一早講明有機會早D拎個BB出嚟,之後都同自己講要接受早產,但一知道自己真係要開刀果陣,腦入面都有幾秒空白。諗起自己幾個鐘後就要瞓係手術床上被麻醉開肚,拎完阿B出嚟又驚佢有事,咁多未知之數加起嚟,確實令我好驚,但BB心跳有幾下咁低 (我附近留醫嘅大部分有150 - 160,我個B成日都只係130 – 140幾),唔即刻開刀拎出嚟阿女真係好危險,因為有機會會胎死腹中,既然係咁,開刀就開刀啦! 但係,原來就算產科醫生確定要立即開刀,都唔係可以即刻做手術。因為早產BB一出生就需要兒科醫生在場急救,然後運去NICU (嬰兒心切治療部)留醫,所以,如果兒科同我講冇位既話,我就要轉院去其他醫院生啦,即係又要再等,胎死腹中既機會又再大啲…. 冇幾耐,醫生就行埋嚟同我講有位,要即刻執嘢去產房,嘩,果刻我真係覺得佢係我兩母女嘅救世主!個心情真係坐過山車咁又上又落… 有經驗嘅都知道,入產房係唔可以拎電話,我到產房後就立即去廁所,偷偷地係廁所影低自己最後的大肚照!我本身想去studio影靚靚大肚照,宜家冇機會不但之,仲要只可以係廁所影… 呢張就係我個女仲係肚入面嘅最後一張相…..非常珍貴,你見我頭髮仲好長,我本身想8個月就去剪頭髮,唉,人算不如天算... 因為要直入手術室,我被推去產房對面嘅房 (我唔知佢叫咩名) 。入咗間房之後非常悶,時間過得非常之慢……因為唔可以帶手機,我都只可以瞓下望下個鐘,希望快D到我做手術。等待期間姑娘拎咗好多表格要我簽名,大多係關於如果BB有咩嚴重情況時,需要授權醫院做緊急程序。而去到做手術前30分鐘,我要打一劑令我畢生難忘嘅針!呢支叫硫酸鎂嘅針,主要用嚟預防嬰兒腦痲痺,D劑液由我右手個種豆位打入身,我即刻感覺到有一股熱力由右手快速去到心口,再由心口去到左手,然後幾秒間就整個人非常極度滾燙!雖然我冇被火燒過,但果種感覺真係好似有一把大火由身體入面燒出嚟,仲要係冇得撲熜佢!我已經係一個好忍得痛嘅人,姑娘係旁邊都有讚我,但我都忍唔住周圍郁,好想整熜團火佢!之後我仲覺得個頭有少少暈,就好似個人被燒過頭果種暈咁,開始出汗,辛苦咗幾分鐘後個人先冇咁辛苦,呢幾分鐘對我嚟講,就好似幾個鐘咁漫長啊... (成個過程我老公都係我身邊睇住我,佢見到都覺得恐怖) 然後,終於夠鐘,我要入手術室啦! 下回再寫!