孕吐真係好辛苦。。。。我係7-8W開始有孕吐，好慘，咁早就有反應!!! 每朝起身第一樣做既事係乾嘔反胃嘔吐。 之後就係刷牙，都係好大挑戰....除左刷牙時會反胃之外，仲會流牙血...牙血既味道，又係會令到我嘔吐....每朝都要攬住廁所黎嘔... 每次出街銀包電話可以唔帶，但一定要帶幾個嘔吐袋係身...仲有陳皮... （個人認為陳皮止嘔唔錯，可以解一解當時既想嘔） 大約係12W，有一晚零晨我不停嘔，無停過咁嘔，連續嘔成4，5次!!嘔到我喉嚨好似有舊野頂住咁，好唔舒服，仲要嘔到有血!!! 嘔得太辛苦真係嘔到喊出黎，個時馬上叫馮先生車我去屯門醫院急症室。 去到急症室就登記時會問我咩事入院，我講出自己懷孕周數，因為嘔到出血所以入院，之後就馬排我做初步檢查就比左張紙我，入去分流到等見醫生，成個過程都好快，好快就見醫生，照超聲波，抽血。最後安排我入院。 零晨3點幾4點上到病房後，大約5點有醫生黎同我驗查，話我有d脫水，會安排我吊鹽水，同打止嘔藥及維他命B 到左中午，有高級醫生黎見我，大約係講我不停嘔，嘔到有血，好大機會係食道損左有血，如果想做詳細檢查就要做胃鏡，但懷孕一般都唔建議做一D入侵性既檢查，所以我都拒絕做呢個檢查。而醫生話再想同我抽血驗下我甲狀腺，因為怕我係懷孕影響到我甲狀腺高而嘔吐。 呢一日都係不停吊鹽水，打止嘔針同維他命B，維他命B真係好痛!!! 再到左第二日，我份驗血報告返左黎，甲狀腺的確偏高，所以我要等內科醫生黎見我!! 內科醫生黎到，同我解釋左有小數媽媽懷孕初期甲狀腺會偏高導致多汗，心跳快，嚴重嘔吐等等....暫時我都唔需要食藥黎降低甲狀腺，但醫生叫我半個月返去醫院內科一次抽血睇下甲狀腺指數正常返未。醫生見我嘔到個人心情好差又唔開心，仲哄我，話有研究顯示懷孕期間BB令到媽媽甲狀腺偏高既BB出世後係比較聰明架!!!同埋今胎嘔到咁勁，唔代表下胎係咁架，仲叫我加油，其實好感動，哈哈。 住左4日醫院，終於出院了，返到屋企又再嘔過~~~ 每日都好期待唔再嘔既日子.... 大約係懷孕第6個月，我既甲狀腺指數正常返了，唔需要再返醫院抽血!!!! 各位有孕吐既媽媽，加油啊！