唔知幾多新手的全職媽媽同我一樣，晚晚臨訓前都會諗：聽日煮乜比bb食呢？經過兩個半個嘅摸索，開始摸到自己嘅方法，無咩專業可言，只係純粹分享一下。   從黑珍珠6個月開始加固，起初只係比米糊，食到米糊之後就比唔同嘅蓉佢試，食得唔錯之後就再比粥仔，最近試埋bb 麵，哩兩個半月嘅加固路程，真係好考耐性，抖膽講句，bb 每一小啖，都係媽媽嘅一大心血呀！   講咁耐，到底我有乜法寶？ 其實就係BB 煲粥神器 ─ 電瓦煲。     煲仔細細，大 tommee tippee 暖奶器少少， 煮bb 1個人分量岩岩好，最好就係唔洗睇火，又唔怕煲燶粥，起初用個陣，我都煮過失敗嘅粥，唔識落份量，煮出黎水還水，米還米，試下試下就覺得較岩份量用2小時煲出黎嘅粥仔最岩胃口。     煮出黎有半碗粥仔，我煮嘅粥仔偏稠，因為咁樣好喂點。   我真係懶，唔係扮。通常夜晚會落定米同水，第二朝早10點起一起身開著個制，掉埋前一日晏畫拖過水嘅瘦肉落個煲到就拿拿臨返上床訓覺，12點黑珍珠起身流洗過後就食得。同埋有時晏畫出街，就會較定時間制煲粥，返黎同黑珍珠沖完涼就食得。這個電瓦煲真係我嘅恩物，可以唔洗睇火，賺更多訓覺時間。