副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

出血入院…估不到出院已是兩星期後…

27週時照超聲波發現個胎羊水突然減少,但我又無陣痛…正常會見到3個Bubbles位,我只有1個,而且Bubble尺寸偏小。醫生表示羊水少會對減低對BB嘅保護,令到BB手腳難郁動,間接會影響到佢嘅發展,

27週時照超聲波發現個胎羊水突然減少,但我又無陣痛…正常會見到3個Bubbles位,我只有1個,而且Bubble尺寸偏小。醫生表示羊水少會對減低對BB嘅保護,令到BB手腳難郁動,間接會影響到佢嘅發展,所以醫生睇咗我個情況後,建議我第二朝一早就去醫院,同埋要有心理準備即時入院。 但喺,個肚等唔到第二朝,半夜去廁所時流鮮血,血嘅顏色就好似平時M到嘅鮮紅色。之前醫生有講過,流出嚟如果喺啡色,有機會喺胎盤邊緣位嘅組織,屬於正常理象;但若果喺鮮紅色,就有危險,需要即時入院!所以我見自己流咁多鮮紅血,諗都冇諗就立即換衫收拾入院。 因為本身週數仲細,所以我完全未準備走佬袋,當時只喺拎咗毛巾、沖涼及刷牙用品、拖鞋同幾塊普通衛生巾就落街搭的士去急症室,可想而知果個時候都幾徬徨同無助… 去到急症室,基本上同醫院講大肚出血佢哋即刻好緊張,問咗我本身有冇喺呢間醫院做開產檢後就有姐姐用輪椅推我上產房 (生平第一次坐輪椅)。所以,強烈建議就算第時喺私家醫院生產的,一定要喺公立醫院做個登記,好讓醫院都有個紀錄,有事時去公立佢都知道個胎嘅情況,咁就唔會延誤救治。 去到產房,所有貴重物品都唔建議帶入去,所以我都只係帶咗個關機嘅電話 (產房內不可用電話,如果要打電話就必須問姑娘借)同幾塊普通衛生巾而己。產房入面嘅助產士/ 姑娘明顯有經驗同細心,而且人數頗多,可以做到1:1,即喺每個產婦都有個助產士/ 姑娘。我上咗床後就有助產士幫我駁測心機來睇住BB心跳,同埋不停問我有冇陣痛及BB有冇郁。之後亦有醫生幫我用超聲波睇BB個情況,一切都正常 (當然羊水都係少,但見到BB有郁同埋位置都正常) 。雖然我疑似穿咗水,但因為我冇陣痛 (完全沒有痛嘅感覺),所以大家都冇咁緊張,面上都開始多咗笑容,而我就開始肚餓了 (笑~~醫院早上7點就有早餐派,雖然係難食粥,但我都食晒) 。 每次駁胎心機都要花一段時間去搵BB心跳,因為個胎仲細,比較難搵。 成個產房分兩邊,每邊各有8張床,我果邊產房連埋我就有3個產婦。我最右手邊果個就由我入產房到落返待產房呢8 - 9個鐘都不停叫:「姑娘,好痛啊,我唔得啦,真係好痛啊!」而周不時姑娘過去睇都係話:「未開晒啊,你忍忍啦,唔好痌住啊!你忍忍啦!」佢哋呢個對話都來回咗好多次,而個產婦嘅聲音都愈來愈細,我唔知佢幾時生到,因為我落返去待產房時佢仲大叫緊… 我對面床係一個印巴籍的後生女,個樣似只有10幾歲,週數同我差不多,都係穿咗羊水但又冇陣痛。但佢嘅體重只有42KG,係,我冇聽錯,佢大住個肚都只得42KG…我聽到佢因為體重小而有其他問題,佢無耐就去咗心臟科,唔知有咩特別檢查要做。 最初入產房都非常緊張,很怕BB心跳有問題,或者需要緊急開刀拎BB出嚟。但當見到BB心跳數據理想 (沒有突然有幾下跌得好低,大部分時間都過140) ,而我又冇陣痛,姑娘都叫我唔洗太擔心,一切等醫生再睇我個情況而定。夜晚醫院只有實習醫生駐院,遇有緊急開刀就要叫顧問醫生返醫院,半緊急就要等醫生返工再問。我嘅情況就係半緊急,所以我等到第二朝10點幾由產科的主管醫生睇我,主管醫生正正就係21週時幫我睇結構。見到咁有經驗嘅醫生睇自己,老實講個心都定好多。佢睇咗我個情況,建議我再觀察多幾日,因為他曾經遇到類似的Cases,最後個羊水自己再儲返,BB等到足月先出世。聽到有呢個先例後,我立即充滿希望!希望我嘅羊水好快會儲返晒!希望我嘅BB可以足月出世!希望我可以順產而且唔洗痛咁耐! 然後,我滿懷希望咁落返待產房,但我兩星期後就出院啦,因為我個BB最終都早產了… 再寫!