【 安妮媽媽的懷孕日記 @ 卓越醫務中心 - 產檢分享 】 第一次聽心跳（ 7w4d ） 由於上胎的婦產科醫生實在太難book，經媽媽群組推介，我今次揾左尖沙咀卓越醫務中心的呂桂英醫生。 第一次上到中心要登記基本資料，磅重量血壓，再等叫名。 尖沙咀卓越醫務中心內有7個婦產科醫生，每個醫生收費都唔同，可以電話查詢。 呂桂英醫生的收費算係合理，每次診金加照超聲波$800，維他命丸就另收費。 第一次見呂醫生，覺得佢態度都幾親切，不過就要自己準備孕期的問題問佢，佢唔會點主動講。 今次係去聽BB心跳，心情勁緊張，當醫生俾我地聽BB的心跳聲時，真係好感動！我覺得係最好聽同最令我安心的聲音。 照完後就可以出去等俾錢，已經預左要等勁耐，因為真係太慢。。。 付款方法有：現金、EPS、支付寶、微訊支付  卓越醫務中心係第一次產檢後會幫孕媽媽開個file，入面會放當天的超聲波相和產檢紀錄，我可以用密碼登入後下載，資料會保存一個星期，之後就會無左，好方便。 ==========================  Nifty Pro (10w4d) 打左好多個電話格價後，知道呂桂英醫生做Nifty Pro好抵，$4400包埋照超聲波。 上到去都係先登記，再要去磅重量血壓，然後就等叫名入房。 入到房先照超聲波，已經可以好清楚見到BB喇。醫生話BB好活潑，好健康，手腳係咁郁，心跳都屬於正常。 呂醫生影左幾張3D圖俾我睇。卓越的儀器真係唔錯，超聲波相好清楚！ 照完後醫生會同我講解Nifty Pro的資料，明白後就簽個名。 見完醫生，就出去等俾錢，都係要等勁耐的。 跟住姑娘會俾張紙我落12樓化驗所度抽血，抽完血就走得。 Nifty Pro約8-12個工作天就知結果。 姑娘會send短訊通知。 ========================== Nifty Pro聽報告 (14w4d) 今次除左做定期產檢照超聲波外，仲要聽埋Nifty Pro的報告，其實診所一收到報告就會send短訊通知報告正常同BB的性別。所以今次主要係聽番長細的數據。 醫生話BB一切正常，好健康。 ========================== 照結構 (20w) 卓越醫務中心得兩個醫生有得照結構性超聲波，其中一個係孫錫鴻醫生，收費都合理，連診金$3800左右，又多媽媽推介，所以我地都揾左孫醫生照結構。 今次我早到左，所以可以第一個入去，孫醫生簡單問症後，就開始幫BB照結構，佢好細心的跟我們每一個器官都看兩次，確保BB是健康和沒有什麼問題。 由於我上兩個星期試過出血入院，所以今次孫醫生幫我詳細檢查埋子宮頸的長度等，確保無早產的風險。 另外，因為出血後我個肚一直都有悶痛的感覺，所以孫醫生開左安胎藥和抗宮縮藥俾我，叫我要多訓床休息。 因為食左安胎藥後就無再肚痛，所以我最後無食到抗宮縮藥，但呢幾盒藥真係貴到得人驚。 ========================== 定期產檢 (24w) 又到左定期產檢的時候，今次見番呂醫生，但我又係產檢前有肚痛。 所以呂醫生建議我睇埋宮頸，要做內診，咁當然要加錢啦。 照完超聲波睇完BB後，就要做陰道超聲波內診，度下宮頸的長度同厚度，呂醫生話一切正常，就咁睇無早產的風險，都係叫我多訓床休息。 ========================== 定期產檢 (28w) 今次除左循例檢查BB的大小外，仲要俾醫生檢查外陰，因為我無端端生左幾粒蒼，仲要有小小痛。 醫生話因為孕期分泌會增多，下陰要時刻保持清爽乾淨，就算好勤力清洗都有可能會生蒼或痕癢。 呂醫生檢查後話問題不大，開左藥膏俾我，但佢話如果粒蒼爆左，都會有幾多血流，要我有心理準備。 今次醫生送左三罐初生奶粉俾我，成個孕期產檢可以送一次，我地揀左哥哥都有飲的美素佳兒。 ========================== 定期產檢 (32w) 32w定期產檢，因為最近開始有假宮縮痛，成日個肚都好硬，所以早左去產檢。 醫生檢查後話BB大左1.5個星期，頭仔已經轉左落去，頭圍偏大又壓得好落，所以我成日都會覺得個肚好墜，好實。 醫生吩咐叫我唔好行太多，要多d休息，假宮縮越來越密又規律的話就要入院。 ========================== 定期產檢 (34w) 34w定期產檢，因為前幾日突然流勁多血，但自己檢查後覺得係因為粒蒼爆左，所以無入到院。 今日話俾醫生聽，佢再幫我做內陰詳細檢查，話問題不大，BB好健康，屬中大碼BB。 今次係最後一次係呂醫生度產檢，因為之後每個星期都一定要番QE覆診，我就唔再兩邊去了。 希望之後都順順利利，期待見到弟弟的出世。 ———————————————————— 歡迎連絡安妮媽媽： Facebook專頁： 安妮媽媽親子日記 IG: @Annie_mama_diary | 安妮媽媽親子日記